1Tesalonika 3

1 Eme ꞌouge faḡa guhiu radoga mene idararotene, emeḡe daꞌo Atena zamaḡano radiꞌuma rae zamariro, 2 ebu Timoteoꞌe zae vaḡe tuḡuniro. Aniꞌe emeḡe nego zu Keriso hari manoḡa haramifine emeḡe teite Badiꞌa gau haḡaeꞌeteꞌe vazeḡa. Aniꞌa amine, zae inaraziꞌuma zu zaeꞌa fie gigaranoga veize danaziꞌuma. 3 ꞌOugine, za ꞌuguḡa aduga hideꞌeteꞌe zamaḡano zamazeꞌa mene hagariꞌuma. Zaꞌe edere huneꞌohe, fieꞌeteꞌe azaḡa, emeḡe niduꞌa aduga ꞌuguḡa hube hune hidiꞌuma. 4 Eme zae teite radiunuteꞌe zamaḡano emeḡe niduꞌa aduga hidiꞌuma rae irina ziro, ebu izidi zaꞌe edeḡa, eꞌe aduganiꞌa fureraro. 5 Eꞌanoꞌo eꞌa faḡa guhiu radoga mene idararotene, zaeꞌa nougenouge fieꞌeteꞌe ederoga veize Timoteo tuḡuniro. E Sataniꞌa ibi nunuo zae soꞌozadu emeḡeꞌa zae veize gaue arirotaꞌaꞌe huga oꞌoꞌa reꞌuma rae riharo.

Timoteoꞌa Tesalonika Ekalesia moneo Hari Manoḡa Odohe Ariro

6 Rehano Timoteoꞌa izidi zae mazaonoꞌo emeḡe vaḡe bare aradu zaeꞌa fieꞌeteꞌe zu zamarotiteꞌeteꞌe moneo hari manoḡa meꞌodofiro. Ebu zaꞌa matuꞌeꞌenaꞌa iḡaiḡa emeḡe zamareꞌeteꞌe ihofiro, zu emeḡeꞌa ḡiaze hunihi raꞌeteꞌe teige, zae zuni ḡiafe hunihi raꞌeteꞌe ihofiro. 7 Eꞌanoꞌo, nego nabudi, eme aduga zu sauꞌa hideꞌeteꞌe zamaḡano zuni zaeꞌa fieꞌeteꞌe uꞌano zamafeꞌa inariro. 8 Zaeꞌa Zuhiꞌa Boro teite tiburanadu edau gigaruꞌe ꞌahine, izidi emeꞌa matuꞌeꞌenaꞌa, ḡabode radiuꞌohe. 9 Emeꞌa zae uꞌano Badiꞌa mazao ufeta manoḡa tauḡi raꞌohe, mazaḡa zae uꞌano emeꞌa emeḡe Badiꞌa zamao matuꞌu niduꞌa meiro. 10 Eme zae bare ḡiazoga veize zu zaeꞌa fie gigarafine danazoga veize, ohere zu madai niduꞌa ufeta inare kurauꞌohe.

11 Badiꞌa emeḡe Mama zu emeḡe Zuhiꞌa Boro Iesuꞌa eme zae vaḡe amiteꞌe ibiḡa mae bohanifine, kurauꞌohe. 12 Ebu emeḡeꞌa zae zamare borofeꞌeteꞌe teige, zaezaeꞌa zamarotitoga veize zu Zuhiꞌa Boroꞌa danazadu vaze zamare borofoga veize kurauꞌohe. 13 Ebu aniꞌa zamaze inaraneadu emeḡe Zuhiꞌa Boro Iesuꞌa ane mone azaḡa niduꞌa teite ovaiteꞌe madaḡano zaꞌe Badiꞌa emeḡe Mama ubumao veꞌoḡa oꞌoꞌa zu zaḡoḡa rouga veize kurauꞌohe.

<- 1Tesalonika 2 1Tesalonika 4 ->