1-2 Eme ꞌouge guhiu onamoga mene idararotene, eme raenaꞌa, Timoteoꞌe zae vaḡe tuḡune amiꞌuma, ebu emeꞌe emeḡe daꞌo Atena neḡano radiꞌuma reiro. Timoteoꞌe, emeḡe nego, emeḡe teite Badiꞌa gau haḡaeꞌohe, ebu Keriso hari manoḡa harameꞌohe. Eꞌanoꞌo eme Timoteo tuḡuniro, aniꞌe zaeꞌa Badiꞌa mazao fie gigaranoga veize danaziuma. 3 ꞌOugine zaeꞌa aduga hidine, zamazeꞌe mene hagariꞌuma. Mazaḡa zae zaeꞌe edeḡa, Keriso mazao fieꞌeteꞌe azaḡaniꞌe aduga hidiꞌuma. 4 Eme zae teite radiudoteꞌe zamaḡano, emeḡe niduꞌa nariga aduga hideꞌohe rae, bare bare iraduguzido. ebu zae edeḡa, eꞌe haḡaiḡaniꞌe zae mazao fureraro. 5 Eꞌanoꞌo eꞌa guhiu onamoga mene idararotene, zaeꞌa nouge nouge Keriso mazao fieꞌeteꞌe ederoga veize Timoteo tuḡuniro. Mazaḡa eꞌa riharotaꞌaꞌe, Sataniꞌa ibi nunuo soꞌozadu zaeꞌa Keriso mazao fieꞌeteꞌeꞌa dauḡiꞌuma reiro. ꞌOugine, emeḡeꞌa zae veize gaue onairotaꞌaꞌe, huga oꞌoꞌa reꞌuma.

6 Rehano Timoteo ani izidi zae mazaonoꞌo bare onaeha, ebu zae hari manoḡa odohe onaeha, raenaꞌa, zaꞌe Badiꞌa mazao ize fieꞌohe, zuni Badiꞌa zu vaze zamareꞌohe. Ebu zaꞌe iḡaiḡa eme zamareꞌohe, ebu emeḡeꞌa ḡiaze hunihi raꞌeteꞌe teige, zae zuni ḡiafe hunihi raꞌohe. 7 Eꞌanoꞌo nego nabudi, emeꞌe ꞌahama aduga boro hideꞌe rehano, zaꞌe ize Keriso mazao fieꞌohe rae egatene, zamafe inaraneha. 8 Ebu izidi emeḡeꞌa matuꞌufeta radiuꞌohe, mazaḡa zaꞌe Zuhiꞌa Boro mazao edau gigaruꞌe ꞌahine.

9 Mazaḡa zaeꞌa Keriso mazao ize fieꞌeteꞌe haḡaiḡaniꞌa matuꞌofiꞌohe, eme kurauꞌetene, zae uꞌano Badiꞌa mazao nouge nouge manoḡa tauḡi reꞌuma? 10 Mada niduꞌa ohere niduꞌa, zamafe niduꞌa hina kurauꞌohe, emeḡe zae teite bare hidoga, zu bare ihozoga, zae Keriso mazao arane fie gigarafine.

11 ꞌOugadu eme ꞌahige kurauꞌohe: Badiꞌa, emeḡe Mamaꞌa, zu emeḡe Zuhiꞌa Boro Iesuꞌa, emeḡeꞌa zae vaḡe amiteꞌe ibiḡa mae bohanifine! 12 Ebu Zuhiꞌa Boroꞌa zae zamarone borofadu, vaze niduꞌa zamaroga, zuni zae zamarotitoga, emeḡeꞌa zae zamareꞌeteꞌe teige. 13 Ebu eme ꞌadige kurauꞌohe: Kerisoꞌa zamaze inare radoga, Badiꞌa emeḡe Mama zamao haḡaize deheḡa reifine, zu sauꞌa moneo mene debazifine, aꞌe Zuhiꞌa Boro Iesuꞌa ane moneo raꞌeteꞌe azaḡa teite bare onaiteꞌe madaḡano.

<- Tesalonika Ibiꞌa 2Tesalonika Ibiꞌa 4 ->