Tesalonika Ekalesia Azaḡa Mazao Pauloꞌa Ibiꞌa Mirihiro

1 Eḡe, Paulo zu Silasi ebu Timoteoꞌa Tesalonika habaꞌa ekalesiaḡa azaḡa veize fefa ꞌadi miriheꞌohe. Zaꞌe Badiꞌa emeḡe Mama zu Zuhiꞌa Boro Iesu Keriso moneo raꞌeteꞌe azaḡa. Eme ꞌahige rae zihi: Badiꞌaꞌa manoḡa zu zama roḡeḡa ziniꞌenoꞌi!

Tesalonika ekalesiaḡa azaḡaniꞌa Badiꞌa mazao firoteꞌe haḡaiḡa

2 Emeḡe kuru zamaḡano, zae veize kurauꞌetene, eme zae uꞌano Badiꞌa mazao iḡaiḡa manoḡa tauḡi raꞌohe. 3 Mazaḡa emeḡeꞌa, Badiꞌa emeḡe Mama mazao kurauꞌetene, iḡaiḡa zae zamareꞌenaꞌa, ꞌahige raꞌohe: Zaꞌe Badiꞌa mazao fieꞌenaꞌa, gaueꞌohe. Ebu zae zamarone vaze mazaoꞌe boro ꞌahine, zaꞌe zeḡe veize gau boro haḡaeꞌohe. Ebu Zuhiꞌa Boro Iesu Kerisoꞌa hube hune bare onaiꞌuma raꞌeteꞌe ḡoeꞌa mae obene giganeꞌohe.

4 Nego nabudi, Badiꞌa zamarone azaḡa, eme edeḡa, za ꞌai Badiꞌaꞌa ohotiro. 5 Emeḡeꞌa hari manoḡa haramo zinirotene, mene ḡoere isoḡa hina rehano, inaraḡeita haramido. Eꞌe zamaḡano Vine Zaḡoḡaniꞌa zae mazao gauadu, emeḡeꞌa haramidotaꞌaꞌe hube hune huga rae ihozido. Zu zae zuni edeḡa emeḡeꞌa zae teite radiunuteꞌe zamaḡano, nouge nouge zae danazinutaꞌe. Zaeꞌa emeḡe radoneo horonidotene, hari manoḡaꞌe mene ḡuriro hariḡa reido. 6 Zaꞌe hari manoḡa mae ḡihinirotene, aduga boro hidiro. Rehano, Vine Zaḡoḡaniꞌa matuꞌu hina iriꞌavoziro ꞌahine, za matuꞌuzeta hari manoḡa mae ḡihine onainu. Zaꞌa ꞌouginutaꞌaꞌe, emeḡe haḡai zuni Zuhiꞌa Boro haḡai haḡaiḡano onainu.

7 Eꞌanoꞌo Makedonia zu Akaia habaꞌano radiuꞌeteꞌe ekalesiaḡa azaḡaniꞌa zaeꞌa haḡaeꞌeteꞌe haḡaiḡa hariḡa egaduni, zae haḡaio haḡae onamiꞌuma raꞌohe. 8 Mazaḡa Zuhiꞌa Boro hari manoḡaniꞌa zae mazaonoꞌo bororanadu, mene Makedonia zu Akaia habaꞌano daꞌo rehano, haba ꞌahoga ꞌahoga zamaḡano zuni bororu onaeha. Ebu zaeꞌa Badiꞌa mazao fieꞌeteꞌe hariḡa vaze niduꞌa igi hauḡeha. Eꞌanoꞌo emeꞌe zae hariꞌe mene bare reꞌuma. 9 Mazaḡa vaze niduꞌa edeḡa, zeꞌe, emeḡeꞌa Tesalonika habaꞌano hari manoḡa haramadu, zaeꞌa mae ḡihiniroteꞌe, eꞌe hariḡa meꞌodofiꞌohe. Ebu zaeꞌa nouge nouge ḡuriro badiꞌaḡa higone modadu, hube hune radiuꞌeteꞌe Badiꞌaḡa daꞌo zae Zuhiꞌa Boro radu, tuḡureḡa haḡaeꞌeteꞌe, eꞌe hariḡa zuni meꞌodofiꞌohe. 10 Ebu zaꞌe Theovaiteꞌe guhineꞌohe, rae meꞌodofiꞌohe. Aꞌe Iesu, Badiꞌaꞌa runeonoꞌo bare ḡaboniroteꞌe vazeḡa, zuni mada ḡonagano haḡai sauꞌa uꞌano Badiꞌaꞌa aduga ziniꞌuma madaḡano, ani eme ḡabofiꞌuma vazeḡa.

Tesalonika Ibiꞌa 2 ->