1 A tarai Iuda dia nunure God;

A iangina i ngala pire ra tarai Israel.

2 Ma kana pal tabu i tur ta ra gunan Salem,

Ma ra kubana ta ra gunan Sion.

3 I ga bubur ra umana pu na panak abara;

A bakbakit ma ra pakat na vinarubu bula, ma i tur bat ra vinarubu. Sela.

4 U ti mamar tuna, ma u ti ngala kakit ta ra lualuana i tur tukum.

5 Di ra pa ra tabarikik kai ra umana tena ongor, dia tar va na minat;

Ma ra lima i ra umana rangrang pa i torom mulai.

6 God kai Iakob, a umana kiki na vinavana ma ra umana os

Dia matmat ika ta kaum varbor.

7 Ma u, di burut na kaia tam;

Ma to ia na tur ta ra luaina matam ba u ngangal na kulot?

8 U tar vatang ra varkurai marama ra bala na bakut;

A rakarakan a gunagunan i burburut ma i ki mut uka,

9 Ba God i tut upi na varkurai

Ma upi na valaun diat i madu ra bala i diat ta ra rakarakan a gunagunan. Sela.

10 A dovot a kankan kai ra tarai na ga pite pa u,

Ma una ga vi pit ma ra kankan i tur valili.

11 Ona ava tar vavalima, avat a pait ot pa ia pire ra Luluai kavava God;

Boina ba diat par dia ki kikil ia diat a kap tabar ia, tago i topa ia ba da ru ia.

12 Na vamutue ra nilaun kai ra umana luluai;

A umana king ta ra rakarakan a gunagunan dia burut na kaia tana.

<- A Umana Kakailai 75A Umana Kakailai 77 ->