6 Ma Iosua natu i Nun i ga oro pa ra umana tena tinabar, ma i ga biti ta diat dari: Avat a puak pa ra bok na kunubu, ma lavurua na tena tinabar diat a vature lavurua na tavur ma diat a lua ta ra bok kai ra Luluai. 7 Ma i ga ve ra tarai: Avat a tut, ma avat a vana kikil ra pia na pal, ma ra tarai nina dia kap vargal diat a lua ta ra bok kai ra Luluai.
8 Ma ba Iosua i ga tata ta ra tarai, lavurua na tena tinabar nina dia ga vature lavurua na tavur ta ra luaina mata i ra Luluai dia ga vanavana ma dia ga pupunge; ma ra bok na kunubu kai ra Luluai i ga mur diat. 9 Ma ra tarai dia ga kap vargal dia ga lua ta ra umana tena tinabar nina dia ga vu ra tavur, ma ra umana murmur bat dia ga mur ra bok, ma ra umana tena tinabar dia ga pupunge vanavana.
10 Ma Iosua i ga vartuluai pire ra tarai dari: Koko avat a ngenge, ma koko da valongore ra nilai vavat, ma koko ta tinata na irop ta ra ngie i vavat, tuk tar ta nam ra bung ba ina ve avat upi avat a ngenge; ta nam avat a ngenge. 11 Damana i ga varkurai ba ra bok kai ra Luluai na vakopono vana kikil ra pia na pal; ma dia ga pot mulai ta ra gunan kai ra tarai, ma dia ga va ie.
12 Ma Iosua i ga tut ra kavunvun, ma ra umana tena tinabar dia ga puak pa ra bok kai ra Luluai. 13 Ma ra lavurua na tena tinabar nina dia ga vature ra lavurua na tavur ma dia ga lua ta ra bok kai ra Luluai dia ga vanavana vatikai ma dia ga pupunge; ma ra tarai dia kap vargal dia ga lua ta diat, ma ra umana murmur bat dia ga mur ra bok kai ra Luluai, ma ra umana tena tinabar dia ga pupunge vanavana. 14 Ma ta ra vauruana bung dia ga vakopono vana kikil ra pia na pal, ma dia ga lilikun tadav ra gunan kai ra tarai. Laptikai na bung dia ga pait ia damana.
15 Ma ta ra valuvuruana bung dia ga tut ta ra lar, ma dia ga valavurua ma ra vinavana kikil ra pia na pal da lua; ta nam uka ra bung dia ga valavurua ma ra vinavana kikil ra pia na pal. 16 Ma ta ra valavuruana pakana, ba ra umana tena tinabar dia ga pupunge, Iosua i ga biti ta ra tarai: Avat a kukula, tago ra Luluai i tar tul tar ra pia na pal ta vavat.
17 Ma ra pia na pal kai ra Luluai upi na virua, a pia na pal ma ra lavur magit tana; ia kaka Rakab ra paiga na vavina na laun, ma diat par ta ra kubana, tago i ga ive ra ura tultul nina da ga tulue dir. 18 Ma avat, avat a balaure avat ta ra magit di ga vatabue, kan ba ava ga vatabue namur ava vatur vake ta na tana, ma ava vabilak ra gunan kai ra tarai Israel ma ava vapurpuruan ia. 19 Ma ra silva ma ra goled par, ma ra lavur tabarikik di ga pait ia ma ra palariam gobol ma ra palariam tuna, da vatabue diat upi kai ra Luluai; da kap diat ta ra vuvuvung kai ra Luluai.
20 Io, a tarai dia ga kukula, ma ra umana tena tinabar dia ga pupunge; ma ba ra tarai dia ga valongore ra nilai ra tavur, a tarai dia ga manga kukukula, ma ra liplip na vat i ga bura palar, ma ra tarai dia ga vana urama tikatikai ta ra luaina matana iat, ma dia ga uvia pa ra pia na pal. 21 Ma dia ga kamare vue tuna ra lavur magit ta ra pia na pal ma ra mangi na pakat na vinarubu, a tarai ma ra vaden, a umana patuana ma ra umana bul, ma ra bulumakau, ma ra sip, ma ra as.
22 Ma Iosua i ga biti ta ra ura tutana nina dir ga makile ra gunan: Amur a vana ta ra kuba i ra paiga na vavina, ma amur a agure vairop ra vavina ma kana tarai, da amur ga vavalima pirana. 23 Ma ra ura barmana a ura kilao dir ga ruk, ma dir ga agure vairop Rakab, ma tamana, ma nana, ma ra umana taina, ma kana tarai par; ma dia ga vairop vue ra umana niuruna par, ma dia ga vaki vaire diat kan ra gunan kai ra tarai Israel. 24 Ma dia ga tun vue ra pia na pal ma ra iap, ma ra lavur tabarikik tana; ia kaka ra silva ma ra goled, ma ra lavur tabarikik di ga pait ia ma ra palariam gobol ma ra palariam tuna, dia ga vung kapi ia ta ra vuvuvung ta ra pal kai ra Luluai. 25 Ma Iosua i ga valaun Rakab ma diat ta ra kuba i tamana, ma kana tarai par, ma i ga ki livuan ta ra tarai Israel tuk tar ta go ra bung; tago i ga ive ra ura tultul nina Iosua i ga tulue dir upi dir a makile Ieriko.
26 Ma Iosua i ga vartuluai pire diat ma ra vavalima ta nam ra bung dari: Na kaina ta ra luaina mata i ra Luluai nam ra tutana ba na tut ma na pait mule go ra pia na pal Ieriko; ba i vung ra vunapaina, natuna a luaina na virua, ma ba i vatur ra mataniolo tana, kana bul a muruna na virua. 27 Damana ra Luluai i ga maramaravut Iosua, ma i ga rararang ta ra lavur gunagunan.
<- Iosua 5Iosua 7 ->