1 Ma ra tarai Israel par dia ga ki varurung aro Silo, ma dia ga vatur ra pal na varbarat ie; ma dia ga tar uvia pa ra gunan.

2 Ma lavurua na vuna tarai boko pire ra tarai Israel ba pa di ga tibe tar boko ta pakana ta diat. 3 Ma Iosua i ga biti ta ra tarai Israel dari: Aivia ra bung ava vavuan boko upi avat a ongor pa ra gunan nina ra Luluai ra God kai ra umana tama i vavat i ga tul tar ia ta vavat? 4 Avat a pilak tar ta ututul a tutana ure tikatika na vuna tarai, ma ina tulue diat upi diat a vana ma diat a valivute ra gunan, ma diat a tumu ra lavur magit ure varogop ma kadia lavur kakalai; ma diat a talil mulai tadav iau. 5 Ma diat a tibe upi na lavurua na pakana; Iuda na ki vatikai ta kana langun ta ra papar a taubar, ma diat ta ra kuba i Iosep diat a ki vatikai ta kadia langun ta ra papar a labur. 6 Ma avat a tumu ra varvai ure ra lavurua na tiniba ta ra gunan, ma avat a kap ra varvai uti piragu; ma ina padapadailam upi kavava tiniba ati ta ra luaina mata i ra Luluai kada God. 7 Ma ra tarai Levi pa dia vatur vake ta tiniba pire vavat, tago ra papalum na tena tinabar kai ra Luluai kadia tiniba; ma Gad ma Ruben ma ra ngungu vuna tarai Manase dia tar alube pa kadia tiniba ta ra papar a Iordan maro ta ra matana taur, nina ba Moses ra tultul kai ra. Luluai i ga tul tar ia ta diat.

8 Ma ra tarai dia.ga tut, ma dia ga vana; ma Iosua i ga vartuluai pire diat dia ga vana upi diat a tumu ra varvai ure ra gunan, ma i ga biti dari: Avat a vana, avat a valivute ra gunan, avat a tumu vake ra varvai ure, ma avat a talil mulai piragu, ma ina padapadailam ure avat ati Silo ta ra luaina mata i ra Luluai. 9 Ma ra tarai dia ga vana ma dia ga valivute ra gunan, ma dia ga tumu vake ra varvai ure ra lavur pia na pal tana tai tika na buk, lavurua na tiniba tana, ma dia ga lilikun mulai tadav Iosua ta ra gunan Silo.

10 Ma Iosua i ga padapadailam ure diat aro Silo ta ra luaina mata i ra Luluai; ma Iosua i ga tibe tar ra gunan ta ra tarai Israel abara, varogop ma kadia lavur tiniba.

11 Ma dia ga padapadailam pa ra tiniba kai ra tarai Beniamin varogop ma kadia lavur apik na tarai, ma di ga tibe diat ma ra langun livuan ta ra tarai Iuda ma ra tarai Iosep. 12 Ma kadia langun ta ra papar a labur i ga tur pa ia ta ra Iordan. ma i tutua ta ra ul a luana maravai Ieriko ta ra papar a labur tana, ma i bolo ta ra gunan i lualuana upi ra matana taoai, ma ra mutuaina ra bil Bet-Aven. 13 Ma ra langun i vana maro upi Lus tadav ra luana Lus (Betel nam), ma i mur ra matana taubar; ma ra langun i kuba tadav Atarot-Adar, i pakit ra luana i ki ta ra papar a taubar tai Bet-Koron nina i ki ara. 14 Ma ra langun i vana likun ta ra papar a taoai ma i mur ra matana taubar, i tur pa ia ta ra luana i ki maravai Bet-Koron ma i vana upi ra papar a taubar; ma i tuk uro Kiriat-Baal (Kiriat-Iearim nam), a pia na pal kai ra tarai Iuda; go ia ra langun ta ra papar a taoai. 15 Ma ra langun ta ra papar a taubar i tur pa ia aro iat ra mutuai ra langun Kiriat-Iearim, ma i mur ra matana taoai, ma i tuk tar ta ra mata na tava Neptoa; 16 ma ra langun i kuba tuk tar ta ra mutuai ra luana i tur pire ra male kai natu i Inom, nina i ki ta ra male Repaim ta ra papar a labur; ma i vana ur ta ra male kai Inom ta ra papar a taubar ta ra luana kai ra tarai Iebus, ma i kuba tadav En-Rogel; 17 ma i mur ra matana labur, ma i vana rikai pire En-Semes, ma i vana rikai Gelilot nina dir tur vartalai ma ra tututua Adumim; ma i vana ur tadav ra vat kai Boan natu i Ruben; 18 ma i vana bolo upi ra papar a lualuana ta ra papar a labur ta ra male Araba, ma i kuba tadav ra male Araba; 19 ma ra langun i bolo maravai Bet-Kogla ta ra papar a labur tana, ma ra langun i tuk tar ta ra tungunana ta ra papar a labur ta ra Ta Mat, ta ra tukuna Iordan ta ra papar a taubar; go ia ra langun ta ra papar a taubar. 20 Ma ra Iordan ia ra langun ta ra papar a taur. Go ia ra tiniba kai ra tarai Beniamin, ma ra langun kikil ia, varogop ma kadia lavur apik na tarai.

21 Ma ra lavur pia na pal kai ra vuna tarai Beniamin varogop ma kadia lavur apik na tarai, go diat: Ieriko, Bet-Kogla, Emek-Kesis, 22 Bet-Araba, Semaraim, Betel, 23 Avim, Para, Opra, 24 Kepar-Amoni, Opni, ma Geba; a vinun ma a ura pia na pal ma kadia lavur gunan ik; 25 Gibeon, Rama, Berot, 26 Mispe, Kepira, Mosa, 27 Rekem, Irpel, Tarala, 28 Sela, Elep, Iebus (Ierusalem nam), Gibeat, ma Kiriat; a vinun ma a ivat na pia na pal ma kadia lavur gunan ik. Go ia ra tiniba kai ra tarai Beniamin varogop ma kadia lavur apik na tarai.

<- Iosua 17Iosua 19 ->