A BUK KAI RA PROPET IONA

1 A tinata kai ra Luluai i ga tadav Iona natu i Amitai dari: 2 Una tut, una vana uro Nineve, nam ra ngala na pia na pal, ma una varvai takun ia; tago kadia bilak na mangamangana i tar vana rikai piragu. 3 Ma Iona i ga tut uka upi na lop tar uro Tarsis kan ra mata i ra Luluai; ma i ga vana ba uro Iopa, ma i ga tikan tadav tika na parau ba na vana Tarsis; ma i ga tul tar ra totokom ure, ma i ga koa tana pi na varagur ma diat uro Tarsis kan ra mata i ra Luluai.

4 Ma ra Luluai i ga vatut pa ra ngala na vuvu ta ta ra ul a ta, ma ra karangap na ta i ga dekdek, ma ra parau i ga to na tapamar. 5 Ma ra umana tena ta dia ga burburut, ma tikatikai i ga kail upi kana god, ma dia ga vue vadudu ra lavur tabarikik ta ra parau upi na papa. Ma Iona i ga tar vana ba ta ra bala na parau, ma i ga va ma i ga diop uka. 6 Ma ra luluai na parau i ga tadav ia, ma i ga biti tana: Ava ra kukurai go, u a lup nidiop? Una tut, ma una kail upi kaum god, kan ra god na nuk pa dat, upi koko dat a virua.

7 Ma dia ga biti vargil: Uti, dat a ilailam, upi dat a nunure nina i vuna ta go ra kaina magit i tup dat. Io, dia ga ilailam, ma dia ga ilam ot pa Iona. 8 Ma dia ga biti tana: Boina una ve avet ba to ia i vuna, tago go ra kaina magit i tup dat? Ava kaum papalum? Ma u mamave? Ava ra iang i kaum gunan? Ma nuve kaum vuna tarai? 9 Ma i ga biti ta diat: Iau a tutana Ebraio; ma iau ru ra Luluai, ra God marama ra bala na bakut, nina i ga vaki ra ta ma ra pia bula. 10 Ma ra tarai dia ga burut na kaia, ma dia ga biti tana: Ava u ga pait ia? Tago ra tarai dia nunure ba i ga tar takap kan ra mata i ra Luluai, tago i ga tar ve diat.

11 Ma dia ga biti tana: Ava avet a pait ia tam, upi na malila ra ta pire vevet? Tago ra ta i ga manga urung vanavana. 12 Ma i ga biti ta diat: Avat a vue vadudu iau ta ra ta, ma ra ta na malila pire vavat, tago iau nunure go ra ngala na vuvu i tup avat ure ke iau. 13 Ma ra tarai dia ga ongor ma ra vinalu, upi diat a pukai mulai; ma i ga dekdek, tago ra ta i ga manga toptop vanavana. 14 Kari dia ga kail tadav ra Luluai, ma dia ga biti: Luluai, ave lul u, koko avet a virua ure ke go ra tutana, ma koko una bali ra gapuna ta vevet, ona pa i rara; tago u, Luluai, u ga pait nam u mainge. 15 Ma dia ga vatur Iona, ma dia ga vue vadudu ia na ta; ma i ga malila ra ta. 16 Ma ra tarai dia ga manga ru ra Luluai; ma dia ga tul tar ra tinabar pire ra Luluai, ma dia ga pait ra umana vavalima.

17 Ma ra Luluai i ga mal pa tika na ngala na en upi na konome Iona; ma Iona i ga ki ta ra bala i ra en a utul a bung na keake ma a utul a bung na marum.

Iona 2 ->