Rome vene 3

1 Ye Jew amiye di buni bi beika? O roaita nugana di buni bi beika? 2 Ida tau vanu dudu ini buni bi rama iniye. Ouresi bi Sei di ago Jew vene rofu nimagamo. 3 Ye bedakai yaku mokena vari gira de aeyadi vonisi, bi beika? Ini mokena vari gira de aena bi Sei di vegu rama rena moi koina rigo ba? 4 Ide iniye! Sei bi rama iniye, idu amiye tau gade ka bi ofa ofa ago nidedi vene. Bura reyo kana,✡Ps 51.4

“Ye yi agori rama nigiya;

ma ya kota rego medari ya bi ebu rego.”

5 Idu amiye yokoi yaku nigo, uni mokena rorobo de vegu bi buni, adina makai dudu amiye yaku Sei di mokena rorobo bi gokai vegedi. Mina kana, Sei yaku ini gubuyo tora una rofu maro, mina bi mokena rorobo de vegu nigifa ba? (Nai ago bi amiye di ago kana.) 6 Ide iniye! Adina gokai dudu Sei yaku kono tora noibanu di amiye kota rego?

7 Idu nai ofa ago dudu, Sei di ago rama bi ini vabara moi ogau iniye rigo vonisi, na bi beika resi vegu no redo amiye kana nifafana redo? 8 Bedakai nifafana resi nidedi uni ago bi, “Ye vegu no renadi kumo buni baku regifa.” Ye Sei di kota rena bi rama.

Amiye yokoi mokena rorobo nufa de

9 Ye makai una Jew vene bi buni iniye ba? Ide iniye iniye! Adina senagi nioteimarafa, Jew vene ma tutubena idana vene,* ina vene tau vakoi bi vegu no di vava gabireri amededi. 10 Bura reyo kana:✡

“Amiye yokoi mokena rorobo nufa de, yokoi de iniye iniye;

11 yokoi de yaku vegu buni diba nido,

ma yokoi de Sei maina redo.

12 Ina tau vanu gedu maradi;

tau vakoi rei tavoi reyadi;

yokoi maka yaku buni de redo, yokoi de iniye iniye.

13 Ago ninari ini vena sau bi amiye guri ruba fafa rina de kana;✡

ini afiye dudu eru rededi,

gadeva aruma di gemiso no bi ini venari.

14 Kiraini ma ago ru yaku ini vena vata baeyadi.✡

15 Ini yuka dudu bi evade raga resi dava rausi regika;✡

16 moi kekevata una ma moi no rena bi ini dina idari amededi.

17 Ma uka amuta di ida bi diba de niyadi.

18 Ini nemokori ka bi Sei ori de rededi.”✡

19 Gua una diba beika ago gira yaku nido, bi kaere ago gira di vava gabireri amedo ina rofu nido, ye vena biri risi ago nina de, ma kono tora noibanu di vene tau bi Sei di nemokori ini vegu dada kota regi are reyaganedi. 20 Adina ini nemokori ago gira usi dina dudu, amiye yokoi bi vegu rorobo de nigo, ago gira dudu vegu no neide mama rego dada.✡Ps 143.2; Gal 2.16

Gokai Sei ini nemokori vegu rorobo nigifa

21 Idu gua Sei di mokena rorobo bi ago gira etofarori moi ogau riyo, adina ago gira ma Sei di ago niyadi vene di ago ina rofu ninegau rededi. 22 Sei yaku amiye di mokena vari gira Iesu Keriso rofu aena dudu amiye moi rorobo rido; mina bi amiye tau gade rofu, kaere mokena vari gira aededi. Adina bi idana de:✡ 23 mina bi amiye tau gade yaku vegu no resi Sei di vabara moina, bi ne tumuri keto reyadi. 24 Ye davana de nufa, beika buni tora gade maro dudu vegu rorobo niyadi; mina bi Iesu Keriso yaku voi resi erufuyo. 25 Ina bi kaere Sei yaku ini dava dudu, vegu no di obini voi regi ori sisika kana aeyo. Ye mokena vari gira aenari moigedi; ma makai reyo, Sei di mokena rorobo oteimagi, ini toro renari sena reyadi vegu no moi tai reyo dada. 26 Makai Sei yaku gua ini mokena rorobo oteimaro, ye makai bi rama ma kaere Iesu rofu mokena vari gira aego, ina rofu nigo ini vegu bi rorobo.

27 Mina dada uni nivasena rena bi beika? Bi de iniye. Ago gira neidesi nivasena reyafa, makai mokena rorobo moiyafa ba? Ide, bi mokena vari gira aena dudu maka mokena rorobo moisifa. 28 Adina amiye yokoi mokena vari gira aena dudu maka, bi vegu rorobo nigo mina mokesifa, ma ago gira di reremama dudu bi de. 29 Ye Sei bi Jew vene di Sei maka ba? Ye ina ka bi tutubena idana vene di Sei ide ba? Yo, ina ka bi tutubena idana vene di Sei, 30 adina Sei bi yokoi maka dada. Ye roaita nugana vene†roaita nugana vene: Mina bi Jew vene. ini mokena vari gira aena dudu vegu rorobo nisi roaita nugana de vene‡roaita nugana de vene: Mina bi tutubena idana vene. mokena vari gira aena dudu ka vegu rorobo nigo.✡Deut 6.4; Gal 3.20 31 Mina dada mokena vari gira aena dudu ago gira moi eyaresifa ba? Ide iniye! Idu, ago gira moi gigi risifa.

<- Rome vene 2 Rome vene 4 ->