Niokuna sina 15

Sei di naivo naivo vima metona beika baika no iniye nufa

1 Mina usi moi tururu rena rebe tora yokoi omari ne rei veyaka. Bi Sei di naivo naivo vima 7 metona beika baika no iniye 7 nufa, adina mina dudu Sei di gubuyo iniye koina nigo.

2 Resi veveri kana, beika bi davara garasi itasa moi fui reyo ma tuma dona nadina, ini vima ma ini roka di naba[a] ebu reyadi vene veyaka. Ina vene yaku mina davara garasi odorori, Sei di yabo feya gita asini kana ini vanari moigamadi. 3 Resi Sei di moimai rei tavoi reyo amiye Moses di yauta ma Mamoe mida di yauta nigamadi:[b]

“Yeiva iniye Varika amiye Sei,

yi reremama bi tora ma moi tururu rena!

Gagani gagani[c] di Kini,

yi nana rena ida bi rorobo ma rama!

4 Varika amiye, kaere amiye ya ori de rego?[d]

Kaere amiye yi roka moi odoro de rigo?

Adina ya maka bi kikifa.

Ye gagani gagani vene tau noibanu baesi

yi nemokori ya nivakegedi,

amiye tau noibanu yaku yi vegu rorobo bi oteimaro ma veyadi dada.”

5 Mina usi ne rei veyaka omari niogau rena karaga, mina bi Sei nivakena yava rama mini, bi ekeyo.[e] 6 Ma naivo naivo vima 7 yaku beika baika no iniye 7 nufa Sei nivakena yava gutuna yakuyadi. Ina bi varuka buni, kino yokoi de nufa ma kamanika, goro dabuasa ini kokobari akugamadi. 7 Ma vegu amededi vibani 4 ri, yokoi yaku goro dodoku 7 mina naivo naivo vima 7 maro. Mina dodoku bi Sei, kaere toga toga amedo di gubuyo iniye vata baeyo. 8 Kamini Sei di vabara ma vava gutuna iroka yaku Sei nivakena yava vata baeyo, ye naivo naivo vima 7 di beika baika no iniye 7 koina nigedi mamo amiye yokoi yaku nivakena yavari dui regi anua rego.[f]

<- Niokuna sina 14 Niokuna sina 16 ->