Mark 6

Iesu bi Nazareth ri fufuta maradi

(Mt 13.53–58; Lk 4.16–30)

1 Iesu ini usi dina venesa mina sana feresi ini tora niyo taoniri dairiyo. 2 Sabati meda niyori, usa usa yavari amiye rofu oteimagi kora reyo. Amiye tau ini beika niyo neidegasa tururu resi iniye iniye niyadi, “Goidu mina baku reyo? Mina mokena tora moiyo bi beika? Gokai dudu mokena vegu makai redo? 3 Mina bi yava rina amiye, ma Mary di mida ma ini dubuiyaka bi James, Joseph, Judas ma Simon ba? Ma ini tobaiyaka ka minari unasa amededi ba?” Ye makai ina rofu uka no reyadi.

4 Iesu yaku mina vene rofu niyo, “Gagani tau vene yaku Sei di ago nido amiye vei odoro regamadi, idu ini rauturi bi ini davatu vene ma usika ourena yaku bi de.”✡Jn 4.44

5-6 Ma tururu reyo, adina bi mokena vari gira de aeyadi. Ye minari bi mokena vegu yokoi de reyo, idu gauka vene be maka ini vana moi fafau aesi moi buni riyo.

Iesu yaku ini usi dina vene 12 nifeideyo

(Mt 10.5–15; Lk 9.1–6)

Kamini bi rautu rautu amiye ago oteimagamo. 7 Ye ini amiye 12 raka nisi niegogo resi remanu remanu dudu nifeidegi kora reyo. Ina yaku vima no meki rena di vava magamo. 8 Resi ago gira ina rofu niyo, “Gugura yokoi ida di ga moifa, idu yukana maka—iruku bi de, dura bi de, ma fore kopa yi foketari aena ka bi de.✡ 9 Idu yi yuka ro maka bi risi varuka remanu ga aku mafa. 10 Goina yava dui regedi, bi minari amegedi bogo ferei digedi mamo. 11 Ma goina gagani yokoiri* ya moi dui de regedi, o yi ago de neidegedi, bi minari feresi yi yuka di budoka usi eyarefa. Ye mina bi ini vegu makai regedi yaku bi vei mama regedi.”†✡

12 Kamini disi ago buni nirausi reyadi, dada amiye yaku neidesi vegu no feresi moi etagae riyagane. 13 Minari bi vima no tau gade amiye di roaitari meki resi, gauka bi diga adari rausi regasa moi buni rigamadi.✡Jas 5.14

John Baptist di muyena

(Mt 14.1–12; Lk 9.7–9)

14 Ye kini Herod‡kini Herod: Herod Antipas, Galilee di ourefeidena amiye. yaku beika vata nigamo bi neideyo, adina ini roka bi gagani tauri ogau nigamo. Amiye yaku nigamadi, “John Baptist bi muyena gutuna dadi rae reyo. Mina resi bi mokena vegu redo.”✡Mt 16.14; Mk 8.28; Lk 9.19

15 Idu amiye be yaku niyadi, “Ina bi Elijah.”

Ma be yaku niyadi, “Ina bi Sei di ago nido amiye, kaere bi senagi senagi Sei di ago niyo amiye yokoi kana.”

16 Idu Herod mina ago neidegasa niyo, “Ina bi John Baptist, kaere bi ini ada nugai feideyaka, ma dudusa dairisi vegu niyo!” 17 Herod ina kaya mina ago niyo, adina bi sena ago maro ma John moisi ini yuka ukita risi dibura yavari aeyadi, Herodias, kaere bi Herod di ini dubuini Philip di rema, dada.✡Lk 3.19–20 18 Ini adina, John yaku Herod rofu nigamo, “Yi dubuini di rema§yi dubuini di rema: yi abuata. meyo bi tabu.”

19 Mina dada, Herodias ini uka esika John rofu bi tora gade ma ini ura bi umuyego vo nigamo, idu ina rofu ida bi de. 20 Herod bi John rofu ori regamo, adina bi ina diba John bi mokena rorobo amiye ma amiye kikifa, mina dada buniri maka aegamo. Ini sina neideyori, bi ini mokena forovai reyo. Idu, ini ura bi ini sina neidegi, vo niyo.

21 Herodias ini mokegamo meda bae okiyori, bi Herod di vata niyo medari, ina yaku ini ourefeidena vene, iya vene di tora tora, ma Galilee di ourefeidena vene raka nisi irakuna maro. 22 Herodias di vefa**Herodias di vefa; bura bedakai Ini vefa Herodias nufa. dui resi adena usi Herod di okiyadi venesa di uka moi ada reyo. Ye kini yaku mina rema ofi niyo, “Ya ura beika ya magida? Yi beika ura regiya bi ya magida.” 23 Nitore resi mina rema niyo, “Gua ya nida, mini beika na usa nigiya bi ya magida, ye nai ourefeidena amena sana mina berou afona tu ya magida.”

24 Mina rema mida minari maka nesi ini nono nikaiteyo, “Beika nigida?”

Ma niyo, “John Baptist di ada.”

25 Ma evade maka dairi nesi kini rofu niguba reyo, “Nai ura bi ya yaku ruika maka mereki odorori John Baptist di ada na ma!”

26 Ye kini bi iriyeduka no niyo, idu ini nitore reyo ago ma okiyadi vene dada, ini ura bi ina rofu rego. 27 Ye evade ini iya redo amiye nifeidesi ago gira maro ini ada moi baeyaganedi. Ma dibura yavari nesi ini ada nugai feideyo. 28 Resi mereki odorori aesi moi baeyo, mina rema ofi maro, ma ina yaku dadisi bi ini nono maro. 29 Ye John di usi dina vene mina neidesi baesi ini roaita moisi guri aeyadi.

Iesu yaku amiye 5,000 vana reyo

(Mt 14.13–21; Lk 9.10–17; Jn 6.1–15)

30 Kamini ini nifeidena vene bi inasa amei desi bi ini beika reyadi ma beika oteimaradi mina nigamadi. 31 Minari bi amiye tau gade gade ma nega baegasa reyadi, dada iri-iri di meda bi de. Ye niyo, “Ya yaku maka nasa baegedi ma disi mafumafu sanari sifere regifa.” 32 Ye boutiri keu risi mafumafu sana yokoiri boyadi.

33 Idu boyadiri, bi amiye tau, kaere ini goidu digo sana bi vesi diba niyadi, bi taoni tau gutuna yuka dudu raga resi sena bogamadi ini boi okigedi sana. 34 Ye bouti feresi soka regasa bi amiye tau gade gade vesi ina rofu iriyeduka reyo, adina bi mamoe ini dogo amiye bi de kana, dada ago tau gade nioteimagi kora regamo.✡Num 27.17; 1 Kgs 22.17; 2 Chr 18.16; Ezek 34.5; Mt 9.36 35 Ma meda bi uriyenau eta rofu niyori, bi ini usi dina vene ina rofu baesi niyadi, “Mina bi autu sana ma ari bi koina niyo mini. 36 Amiye nifeide kumo mina atafu gagani sanari ma rauturi disi ini iruku voi resi iriyaganedi.”††Bura bedakai ka adina ini irina iruku bi koina nufa.

37 Idu nikabai resi niyo, “Ya yaku iruku mafo kumo iriyaganedi.”

Ma niyadi, “Una yaku siriva fore 200 dudu beredi voi resi mina vene magifa ma irigedi ba?”

38 Ma ina yaku niyo, “Beredi gokaisanu? Disi vefa.”

Ye baku resi niyadi, “Beredi 5 ma oyena remanu mini.”

39 Ye ago maro bi amiye tau neinei dudu mutaka odoro ameinu reyainedi. 40 Dada amiye bi tau neinei be bi 100 dudu ma be bi 50 dudu ameyadi. 41 Ma beredi 5 ma oyena remanu moisi oma rofu vegasa buni tora gade Sei rofu masi bi beredi moi okusi ini usi dina vene maro bi amiye tau rofu rau reyaganedi. Ina ka oyena remanu moi odesi amiye tau rofu rau reyadi. 42 Ye ina tau noibanu iriyadi ma ini uka bere niyadi. 43 Ma beredi ma oyena tuta butu resi foroka 12 moi vata baeyadi. 44 Ye mina iriyadi vene bi rumana vene maka 5,000.‡‡Bura bedakai ka kana nufa.

Iesu koru fafau nana reyo

(Mt 14.22–33; Jn 6.16–21)

45 Ye amiye tau gade nifeidegasa evade ini usi dina vene rofu ago maro bi bouti keu risi ina siko Bethsaida ri moka daidai tora berou eta rofu boyaganedi. 46 Ye amiye feresi bi omuna ikari usa usa nigika boyo. 47 Uriyenau tumu niyori, bouti bi moka daidai tora tobo ramari, ye inaike konori ameyo. 48 Ne resi veyori, bi ini usi dina vene bi fayo rena bi gira iniye nigamo, adina aura bi bogamadi sana baegamo dada. Ye ari uvego atafuri ina vene urana koru toboma nana regasa boyo. Ina vene ebu rego§§ebu rego; o ina rofu yova rigo. vo niyo. 49 Idu Iesu moka daidai tora fafau nana regamo vegasa mokeyadi mina bi godiyo. Kamini imuna niyadi, 50 ina tau vakoi vesi ori reyadi dada.

Idu minari maka Iesu ina vene rofu niyo, “Mina bi na; uka gira nisi ori ga refa!” 51 Kamini boutiri ina venesa keu riyo ma aura amuta niyo. Ina vene bi tururu iniye reyadi, 52 adina ini ada de fateyo amiye 5,000 vana reyo bi, ini uka forovai reyadi dada.

Iesu Gennesaret gaganiri gauka vene moi buni riyo

(Mt 14.34–36)

53 Kamini moka daidai tora ugasi bi Gennesaret gaganiri okisi minari bouti utae reyadi. 54 Ye bouti fereyadiri, amiye evade vei mama reyadi. 55 Resi mina gagani di berou berouri raga resi ini gauka vene ekamari uakaisi afei okigi kora regamadi. Mina bi Iesu ini goidu amegamo sana bi neidegamadi dada. 56 Ye goidu soka regamori, rautu rautu neinei, o taoni, o gagani, bi maketi sanari gauka vene afei baegamadi. Ina rofu guyaguya nigamadi ini varuka metona maka avaka moisi buni niyaganedi. Ye amiye tau yaku avaka moigamadi bi buni nigamadi.

<- Mark 5 Mark 7 ->