Matthew 13

Yo varina amiye di mokena ago

(Mk 4.1–9; Lk 8.4–8)

1 Mina medari maka Iesu yavari gutuna yakusi moka daidai tora adinari nesi ameinu reyo. 2 Amiye tau gade gade ina atafuri egogo reyadi, mina dada bi boutiri ameinu regi keu riyo ma amiye tau gade bi seriri are reyadi.[a] 3 Kamini mokena ago dudu ago tau gade nioteimasi makai niyo:

“Amiye yokoi ini yo varigi diyo. 4 Ye yo moi faraka reyori,[b] bedakai bi ida sanari yareyadi ma erena yaku okisi iri vau reyadi. 5 Be bi abita fore odoro yareyadi, minari kono bi keika maka. Evade meto boyadi, adina kono bi tora de. 6 Kamini meda are reyori, bi vai taresi abiye niyadi, adina ini daru kono ideri nei mona de reyadi. 7 Ma be bi imiye tafa fogori yaresi boi tora niyadi ma imiye yaku fafa risi fono reyadi. 8 Idu be bi kono buniri yaresi rama niyadi; be bi 100, be bi 60, ma be bi 30 niyadi.

9 “Kaere neidego, bi neideyaine!”

Mokena ago di ida

(Mk 4.10–12; Lk 8.9–10)

10 Kamini ini usi dina vene ina rofu baesi nikaiteyadi, “Beika resi mokena ago dudu ina vene rofu ago nisa?”

11 Ma nikabai reyo, “Sei di ourefeidena amena sana omari di sui ago diba nigika bi ya maro, idu ina vene bi de. 12 Adina kaere ini beika baika nufa, bi besa tau gade moi tanu mago; idu kaere ina rofu bi de iniye iniye nufa, ka ina rofu amedo bi moi dairigo.[c] 13 Mina resi ina vene rofu bi mokena ago dudu ago nida: adina vededi, idu vei mama de rededi. Neidededi, idu neidei mama de rededi, ma diba de nidedi. 14 Isaiah, Sei di ago niyo amiye, yaku beika vata nigo ago niyo bi makai rama aeyo:[d]

‘Ya bi neidebigedi, idu diba de nigedi;

ya bi vebigedi, idu vei mama de regedi,

15 ini adina mina vene di uka bi gira iniye,

ma ini anema kebi risi neidena de resi

ini nemoko muguna reyadi.

Bi ini nemoko dudu vesi

ini anema dudu neidesi

ini uka dudu diba nigedi baebu,

ye na rofu kero regedi

ma na yaku moi buni rigida.’

16 “Idu yi nemoko bi buni tora gade maro, ina bi vededi dada, ma yi anema, neidededi dada.[e] 17 Adina rama ya nida, Sei di ago niyadi vene ma mokena rorobo nufa vene tau ini ura bi ya beika vededi mina vegedi, idu bi de veyadi, ma ya beika neidededi mina neidegedi, idu de neideyadi.

Yo varina amiye di mokena ago nirorotari reyo

(Mk 4.13–20; Lk 8.11–15)

18 “Ye mina yo varina amiye di mokena ago di adina neidefa. 19 Kaere amiye yaku Sei di ourefeidena amena sana di ago neidego, idu diba de nigori, bi amiye no yaku baesi beika ini ukari aeyo mina moi digo. Mina bi ida sanari yo variyo kana. 20 Ma yo abita foreri yareyo, bi amiye kaere ago neidesi ada dudu bi evade maka moigo kana, 21 idu ini daru bi de, ma amei doba de rego. Ye mina ago dada toe ma esika esika baegediri, bi evade youfeidego. 22 Ma yo imiye tafa fogori yareyo, bi ago neidedo amiye kana, idu mina kono di mokena toe ma ini gugura tau gade di ofa ofa ago yaku ago buni moi forovai reyadi, ye ina bi meko varena de reyo. 23 Ma kono buniri yo yareyadi kana, bi kaere mina ago neidesi diba nigo bi; rama nido, be bi 100 nido, be bi 60 nido, ma be bi 30 nido.”

Oruma no di mokena ago

24 Iesu yaku mokena ago yokoi dudusa nioteimaro: “Sei di ourefeidena amena sana omari bi amiye yokoi yoyava buni ini murori variyo kana. 25 Idu ini amiye varegamadiri, amiye no yaku baesi mina witi fogori oruma no varisi diyo. 26 Mina witi meto bosi rama niyadiri, oruma no ka mina fogori dadiyadi. 27 Ye yava di varika amiye di moimai rei tavoi rededi vene ina rofu baesi niyo, ‘Varika amiye, ya bi witi yoyava buni maka murori variyo, idu mina oruma no bi goinari gutuna baeyadi?’ 28 Ina yaku nikabai reyo, ‘Amiye no yaku mina reyo.’ Ye nikabai reyadi, ‘Ya ura reisa bi bosi oruma kurugifa ba?’ 29 Ma niyo, ‘Ide, oruma kurubigediri ka orumasa witi rama kurugedi baebu dada. 30 Ferefo kumo vakoi bogedi butu rena medari mamo. Mirona medari mamo butu rededi vene nigida: Oruma siko butu resi origi rugurugu dudu mitai regedi, idu witi rama butu resi nai totoa yavari moi baegedi.’ ”

Mastadi meko di mokena ago

(Mk 4.30–32; Lk 13.18–19)

31 Dudusa mokena ago yokoi ina vene rofu nioteimaro: “Sei di ourefeidena amena sana omari bi mastadi di yoyava kana; amiye yokoi yaku moisi ini murori variyo. 32 Bi keika keika iniye, idu tora nigori, bi yabo tau vakoi ebu resi yabo tora nigo, ye odorori didedi erena yaku okisi ini tetekari buri rigedi.”

Yeast di mokena ago

(Lk 13.20–21)

33 Ma mokena ago yokoi nioteimaro: “Sei di ourefeidena amena sana omari bi yeast[f] kana; ye rema yokoi yaku moisi farava siua tora regode[g] sa moi foyomai reyo bogo mina yeast yaku farava tau vakoi moi uruyo.”

Iesu mokena ago nioteimana

(Mk 4.33–34)

34 Iesu yaku mina sina tau noibanu mokena ago dudu amiye tau gade rofu nioteimagamo; ina bi mokena ago dudu maka sina nigamo. 35 Ye beika Sei di ago niyo amiye yaku niyo bi rama aeyo:[h]

“Na bi mokena ago dudu ago nigida;

Na yaku kono riyori gutuna sui niyadi beika baika bi niokugida.”

Oruma no di mokena ago di adina nirorotari reyo

36 Mina usi amiye tau feresi bosi yavari dui reyo. Ma ini usi dina vene bi ina rofu baesi niyadi, “Mina muro di oruma di mokena ago di adina una nirorotari re.”

37 Ye nikabai reyo, “Amiye kaere yaku meko buni variyo bi Amiye di mida. 38 Muro bi mina kono tora noibanu, ma meko buni bi Sei di ourefeidena amena sana di mida mida. Ma oruma bi Amiye no di mida mida. 39 Ma oruma no variyo tuma amiye bi Bodaka. Butu rena ari bi meda di bae koina nina, ma butu rededi vene bi Sei di naivo naivo vima. 40 Mina oruma no butu resi itari ori kamu regedi kana, meda bae koina nigori bi makai: 41 Amiye di mida yaku ini naivo naivo vima nifeidego ma Sei di ourefeidena amena sanari beika tau yaku vegu no rofu eyarededi ma kaere tau ago gira de neidededi bi butu resi 42 ita tora fairo redo sokuri makugedi; ye mironari ini gade aki gigi regasa isaka nibigedi. 43 Mina usi mokena rorobo vene bi ini Baba di ourefeidena amena sanari meda vabara nido kana vabara nibigedi. Kaere neidego, bi neideyaine!

Sui amedo gugura buni di mokena ago

44 “Sei di ourefeidena amena sana omari bi kono kefukari gugura buni moi sui riyadi ma amedo kana; ye amiye yokoi yaku baku resi dudusa mina moi sui risi ada dudu nesi ini gugura tau mina sero resi mina kono kefuka voi reyo.

Fore buni vayavaya roka pearl di mokena ago

45 “Yokoi bi, Sei di ourefeidena amena sana omari bi gugura voi reyo amiye yaku fore buni vayavaya roka pearl maina reyo kana. 46 Yokoi ini davana tora iniye veitao regasa disi ini gugura tau mina sero resi mina fore buni vayavaya voi reyo.

Fate di mokena ago

47 “Dudusa, Sei di ourefeidena amena sana omari bi fate moka daidai torari eyareyadi ma oyena deda moiyadi kana. 48 Oyena yaku mina fate vata baeyadiri, amiye yaku seriri moi rutu rei baeyadi. Ameinu resi moi etagae riyadi, buni buni bi moigasa foroka ideri aesi no bi moi makuyadi. 49 Mina bi gokai vata nigo meda bae koina nigori: Sei di naivo naivo vima yaku desi vegu no vene mokena rorobo vene di ideri moi etagae risi 50 ita tora fairo redo sokuri maku negedi; mironari bi gade aki gigi regasa isaka nigedi.”

Ago rama ruaka ma kori

51 Iesu yaku nikaiteyo, “Mina ago tau vakoi niyaka bi diba niyadi ba?”

Ma[i] nikabai resi yo niyadi.

52 Ye ina vene rofu niyo, “Mina dada ago gira oteimana vene neinei kaere Sei di ourefeidena amena sana omari usi dina vene niyadi, bi yava di varika amiye kaere bi ini gugura buni fogori gugura ruaka ma gugura kori moi yakudo kana.”

Nazareth ri Iesu rofu fufuta maradi

(Mk 6.1–6; Lk 4.16–30)

53 Kamini Iesu mina mokena ago ni vau regasa bi mina sana feresi boyo. 54 Ma ini tora niyo taoniri dairi nesi bi ini usa usa yavari oteimagamo, ye tururu resi niyadi, “Mina mokena tora ma mokena vegu bi goidu baeyadi? 55 Mina bi yava rina amiye di mida ba? Ini nono di roka bi Mary, ma ini dubuiyaka bi James, Joseph,[j] Simon ma Judas ba? 56 Ma ini tobaiyaka tau bi unasa mini ba? Makai mina amiye bi mina beika tau bi goidu moiyo?” 57 Mina dada ina rofu uka no reyadi.[k]

Idu Iesu yaku ina vene rofu niyo, “Gagani tau vene yaku Sei di ago nido amiye bi vei odoro regamadi, idu ini rauturi ini usika ourena yaku bi de.” 58 Ye minari bi mokena vegu tau de regamo, ini adina ini mokena vari gira aena bi de dada.

<- Matthew 12 Matthew 14 ->