John

di bura regode ere

Ago di ini adina

Mina bi John di bura regode ere. Ina yaku dubu ourefeidena amiye yokoi roka Gaius rofu mina bura reyo. John yaku Gaius rofu ada ago niyo, adina ina bi ekalesia vene be aedeyo, ye amiye roka Diotrephes rofu ago gira maro.

Beika sina ideri

Ago di ini adina 1–4

Gaius di roka moi odoro rina 5–8

Diotrephes di vegu no 9–10

Demetrius di vegu buni 11–12

Metona ago 13–15

Gaius, kaere sina rama dudu bi nai uka maida amiye, mina fefa ya rofu bura reida.

2 Nai uka maida amiye, Sei rofu usa usa nida beika vegu tau reisa, mina yaku buni moi vata riyainedi. Ma usa ka nida, yi roaita di vegu tau noibanu buni niyainedi. Adina na na diba yi vima bi buni amedo. 3 Adina ekalesia usika ourena be yaku baesi na niokuyadi, ya bi vegu rama reisa amiye. Ada tora gade iniye reyaka bi sina rama dudu nana reisa dada. 4 Beika vegu yokoi yaku de na moi ada redo, idu neideida bi nai mida mida bi sina rama regasa amededi.

5 Nai uka maida amiye, ya yaku yi ekalesia usika ourena aedega ameisa, bi moimai buni iniye reisa mini, adina bi amiye idana. 6 Ina vene bi ekalesia vene di budari, yi uka mana rofu niokuyadi. Ye, buni bi Sei moi ada rego ida kana, aedesi ini yava ika oto dinari nifeidegiya. 7 Keriso di roka dada, yava ika oto diyadi. Ini makai dibo regasa bi tutubena idana vene*tutubena idana vene; o mokena vari gira de aededi vene. rofu aedena buni yokoi be de moiyadi. 8 Mina dada, bi mina kana vene aedegifa†aedegifa; bura bedakai dui regifa nufa. bi buni, ye makai kana sina rama urafo renari rau regifa.

9 Fefa tumu yokoi ekalesia vene rofu sena bura reyaka, idu Diotrephes, kaere iniye nigi ina bi ourefeidena amiye ura redo, bi una mokei vava de redo. 10 Mina resi ya vene rofu baegida vonisi, bi ini vegu ma fufuta ago una rofu nido, mina moi ogau rigida! Mina maka de, idu ekalesia usika ourena okidedi ka de moido. Ma kaere yaku ina vene moigi ura redediri, ka duburi gutuna moi etagae rigi redo!

11 Nai uka maida amiye, vegu no mina tari ga re, idu vegu buni mina maka tari re. Kaere amiye yaku vegu buni redo, bi Sei di;‡Bura bedakai ka idu nufa. kaere amiye yaku vegu no redo bi Sei de vego.

12 Amiye tau noibanu yaku niokudedi Demetrius bi vegu buni redo amiye, ma Sei di sina rama yaku ka makai nido. Una ka makai niokusifa, ma ya ya diba una yaku beika niokusifa bi rama.

13 Ye nai bura regida ago ya rofu bi tora gade, idu fefari bura rena bi ura de reida. 14 Nai uka mokena bi agiya aineka ya vesi ago nigida.

15 Uka amuta yasa amebiyaine.

Yi asiyaka minari ka ini yuata ya rofu nifeidededi. Uni asiyaka mironari amededi ka uni yuata ni.