2 Tesalonia

1 Bolo, Sailasi, Timoti noeabulike levaleva ko hisaliai Tesalonia ekalesia ata laheho hanavoma. Nahie Mama Dilava isi nahie Kosive Iesu Keliso keau la malevege laeau ataeabe holievelu. 2 Iale no isivialeike abu la huhuevei la hoesegevege ue dua vave.

3 No haokuvuia, no vani bahata la vahaeho vai laheho Dilava imihama. Kosealemo la evievi kemo la negolahage keu balugai lohoge la moleho isivilahamale ketau balugai lohoma. 4 La vaveve kateimale vamale kemoike no la ivi tabagevei ekalesia ata haivema. Kosealemo vaveve toela isi vatehani keau laemo lohosege la evievi kemo dobuluviholisito kemo negolahama.

5 La vaveve bahata kemo no hilokage Dilava vaveve keu seleve unaha. Iale la vatetumu kemo negolahalemo auna bae la malevege matamave doga keve uve. 6 Isito oleteau la aiogevei vatehani laovemale kebia auna bae vatehani ovei. Vatehani oveale kemo nahi hilokage Dilava vaveve keu seleve unaha. 7-8 Vani kela nahi vatehani malemale kemo auna nahie hoesegevege nahiabuna ke halioi ue dua vai. Iesuna au anelu vuvunetebiahi otogomo dobai lohoniege Dilava hilokaholimale kebia malevei venemo hatuevege abuna vatehani baluga malei. Oleuoleu nahie Kosive Iesu Keliso hoto evisi vaholige auna vatehani ovei. 9 Vatehani ovege Kosiveu au atagae matamamo umale keve abu bae talivebene. Isito abuna Dilavamo uoholi seleveai. 10 Vani kela Kosivena dobai lohoge atave abuna hoesehavoi ivive ebagevai loui kosea, “No Kosive kou baluga.” Ige la no hoto louale ke evisi la uvu mai avuemo mavoale lataeabuna vani kela abuhi Dilava hoesehavove.

11 Katealemoike no vani bahata laheho guligulilahai isiviale Dilavau la hoesegevege lana isivive vai vaveve dua unaha vageve. No Dilava imihai loui kosea, “Tesalonia ata keau isiviale vaveve dua vagei. Iale ana a vuvunemo evieviabe ke negotige abuna a lovi ke vage uoholisi.” No kateai Dilava imihama. 12 Iale ataeabuna la vaveve ke elehai nahie Kosive Iesu ivi ebagevai. Ige nahie Dilavana Iesuti la ivi tabagevei abu uvu laovei la tedaevei.

2 Tesalonia 2 ->