1 Moleho isivilahai mole tedaevemale keu baluga. Dana ata degomole hotomo hoto loui mesoho anelue hoto ketamo Dilava hoto loui luleleaito kemo ataho isiviholisi kebia tedaeveholige di hoto keu bae ihualivebene. 2 Dana gabie vaveve loui kemo luleleai Dilavau au vaveve mahogovale ke ihu loui ata haivei di evievimo negoai tana moleho louge au halei lotai moleve lamige keu duave. Isito dana kateaito ataho isiviholisi kebia tedaeveholige di vaveve kemo ihuveu uoholinu. 3 Dana di kunai bahata malei kunaiholimale kebia oveale keu vaveve dua. O mesoho di Dilava hoto loui ata haivesege abu di mai mahoge di hatige keta duave. Isito dana kateaito ataho isiviholisi kebia tedaeveholige di vaveve keu bae ihualivebene.

4 Ataho isivilahai kebia tedaevemale vaveve keu koseanu. Nahiabuna solekai itumuholisito mole hoesegevei mole isivi vagei. Vaveve kemo nahi bae mole maina mai isi nahie ebika tabagevelivebene. 5 Moleho isivilahai mole tedaevemale kemo nahi bae nahie isivimo mole aiogevei moleho itumualivebene. Vaveve kemo ata moleu nahi aiogevege nahi bae ke ibina vai aiohavolivebene. 6 Moleho isivilahai mole tedaevemale kemo nahi bae vaveve toelae vahaeho valivebene. Isito nahiabuna hoto seleve vahaeho vai. 7 Nahi moleho isivilahai mole tedaevemale kemo abu nahie aiogevege nahi ke huhu halevaito nahie evievimo negolahai ono vadeu gabie lohoveve ke huhulahai tigei.

8 Gabie vaveve hoto loui ata haivemale kena bae gabiai. Ige abu hoto nimoletemo hoto loumale kena bae gabiai. Nahi vatae vavevemo lulelelahamale kena bae gabiai. Isito nahi moleho isivilahai mole tedaevemale keu bae uoholilivebene. 9 Nahie lulele keu aike esevehame. Ige nahi nova gabie vaveve ke loui hilokamale keta eseve. 10 Isito vanie gabila nahiabuna gabie vaveve ke bahata hilokai avuemo lulele balugai.

11 Di esebuluta usege di huhuihuhui di hoto keu esebulue huhuihuhui esebulue hoto. Isito di aike kosi baluga holiale kemo esebulue vaveve ke bahata di halenu. 12 Nahi aike Dilava elehaholisito vaveveve ke unaha hilokalu. Isito nahiabuna gabie nahie nitela Dilava elehai vaveveve kemo lulelelahai. Di aike luleleamale keu esevehame. Isito Dilavau aike di vaveve bahata hilokamale ke nahate dana gabie Dilava vaveve bahata hilokai lulele balugai. 13 Nahi aike vaveve abuita igaetamo uma. Vaveve moleike nahie evievi. Vaveve moleike nahi ono vadeu vanie gabimo lohoveve huhulahamale. Isi vaveve moleike nahi moleho isivilahai mole tedaevemale. Isito vaveve abuita igaeta kebiamo moleho isivilahai mole tedaevemale keu balugataho.

<- 1 Koliniti 121 Koliniti 14 ->