91
God Namondeda Gagara Ari Katori.
1 Mave Bajari Iká Beká irira, aikena ya nunda sonemba bari dae sise irá gheraira amo,
Bajari Fakina Isambu da Tofo, aimi genembo amo, tavo ururari eveva irarira, Bajari da dombuda.
2 Aminguse, nu Bajari kena eminge sarira,
“Nanda ambo sose fetari vasa amo, nimori.
Ni nandae sedo isoro edo, namo kaifa urureaso, nanda gitofu jo foa na dae eraera.
Ni nanda God, na nimo tumonduse irena,” aminge sarira.
3 God ni kaifa ururari, ni jo ya vagho jungetero irira aminda teraso fatae arira.
A kotugo, ambari da kae jo foa ninda tamonda vitae arira.
4 Nunda ghabuimi ni gagara edo kaifa ururari, ni eveva iraresa.
Nunda kaifa ari mo, jo nanjigo aminda dadabae arira.
Kau bere tamo gajeraira aminga ava, nu ni kaifa use gajari,
ni ambo numokena sose fetaresa.
5 Dara tumbaghae foa gheraira aindae, jo oju ae aresa.
O gitofu isonga ufena foa, isoro ari dae beje buveoro gi dudukugheraesa aindae, jo oju ae aresa.
6 O taono ambari tumbaghae bu foa gheari, natofo digari buraera,
aindae jo oju ae aresa.
O ambari da kae aimi isonga sosighi eari amburaera,
aindae jo oju ae aresa.
7 Gegenembo 1,000 ninda dengesida fetarera, avata ne isambu ambu fafasarera.
O saone, gegenembo 10,000 ninda ungo gimandu kena fetarera, avata isambu ambududururoro,
ni eveva fetaresa, jo mema eni ninda tamonda sirorae arira.
8 Aminguse, ni ditii fuge gosuse, ari ekoko embo mino rejo buraera ava kasama aresa.
9 Avata nimo, ni benunu seteso Bajari gagara etiri, ni ambo numokena sose fetedo iresa.
Bajari Iká Bekáda ninda tavo kato edo irira.
10 Ava sedo, dara eniko jo foa nimokena sirorae arira,
mema dombu eni dombu eni ava, jo foa ninda kamboda buvae arira.
11 Ainda beká mo: God nunda aneya ni kaifa aoro dae sedo dengoro indari,
ni reda yaresa amo, ne gagara ururoro deingharesa.
12 Aneya nenda ungoimi ni unumbe bu ya foa ghururoro,
ninda ata jo ghamanai de fokughari mema sae arira.
13 Aminguse, ni raiyoni (lions) a jingabu ava dedo atai fati fetaresa.
Raiyoni (lions) tataya kakato a jingabu kaeghae ava dedo atai fati fetaresa.
14 God eminge resira, “Evetu genembo mave na dubo buraera amo, na sonembarena.
Na, evetu genembo mave nandae sise, ‘Bajari’ seraera amo, na ne sonembuse gagara eono, ne namokena ambo sose fetarera.
15 Ne namokena kori sarera amo, sifo daba aminda, na mino sarena.
Ne dara jokáda fetarera amo, na namonde dabade fetarera.
A kotugo, na nemo sonembuse, dara da ungoda ava saghimbe budo, vasa evevada fitido, nenda javo jighono erarira.
16 Na nanda mino eveva, sifo ghousago enda eminda irari, ava mutono, ivuga use dubo jama arera.