22
Genembo Eni Nu Mema Bouvu Jokáda Ireira, Avata Nu God Kena Sakai Sisira.
1 Nanda God, nanda God, redae na dotutusesi? Namo sonembaso dae sorara janjagughae use janje gagojusira,
avata ni redae na jo sonembaeri?
2 Arie, nanda God, na ijighae nimokena kori seraena.
Avata, nanda kori jo ningae eraesa. A na tumbaghae barago kori sise, jo avae eraena.
3 Avata Kini kakarago beká nimori. Israel embo nindae sakai sise,
ninda javono gatise jigheoro ereraesa.
4 Namanenda abua mane nimoa tumondedo ghuseri.
Nenda tumondari nimokena fifiturureoro, nine sonembeoso jebugedo ghuseri.
5 Ne dara jokáda fete irise, nimokena seoro, sore bu esike ya ghedo ghusesi.
Nenda tumondari nimokena fifitusera, ainda beká siroretiri ivuga useri.
6 O namoako mo, jo genembo iraeri, sivoro da kaugori. Evetu genembo isambu namoa gi sari futo use dere jiraera.
7 Evetu genembo mave namo giraera amo, ne
isambu namoa dere jise, aviva sanambughuse gifoa
gitorotoro eraera.
8 Gegha jise seraera, “Genembo nunda bouvu mema Bajari kena fifituse,
gaiga numokena gayeraira, nangetirai jo sari jebugaeri? Bajari nundae ivuga ariá seraira.
Nangetirai nu sonembaeri?”
9 Bajari, bebede ninda sonemba namokena emingusesi!
Namo nine aya da tini jokáda bu fesa jebuga siroruseni. Kotugo, na ami rise ireno, nine tavo eso babojuseni.
10 Na sirorusena ai tano, nanda gaiga nimori, kotugo God na sifo ghousa tumondudo refena amo,
nisuka nimori.
11 Dara buvari dae erira. Erá na do darige esike yeose! Mave eni na jo sonembae arira.
12 Nanda gitofu kau burumakava da kandana aminga aimi na gayari dae erera.
Namoa nene jimbe birurugheteri, kau burumukava babaigo Basani Frovensi iritirira, aimi ari gerera.
13 Nenda beka fafangegerera ava kau laioni (lion) imi oka bayau budo gangara sise,
gambu torere tarere gheraira, namokena amingerera.
14 Nanda fakina dadabetira. Kau uvu endáda averegari getira.
Nanda etu isambu didisugaetira, aminga ava, nanda kotari dadabetiri, bune jarutuse irena.
15 Nanda fakina kikisa gharaseraira aminga ava dadabetira.
Nanda aviva saghedo viti beka ikáda takegha erira. Amingiri, namoa ambono dae fonjada fuge dotesi.
16 Gegenembo ekoko aimi na kosege, sino maneimi ariguse, nanda ungu ata gae babasigerera.
17 Nanda tamo jokáda etu isambu tege tefo ari inonori. Nanda gitofu namoa tataseguse irera.
18 Ne nanda tamo asugari dae kikindoro garuse soroé barera.
19 Arie, Bajari, erá na do esike yeose! Tavaraghe fu, na sonembase!
20-21 Gitofo amo isoro da kaiyaimi na jaoro ambono dae eraera aikena, na sainghimbe bu!
Mendeni gambari sino o laioni (lion) da kaugo namoa gambari dae use irera.
Mendeni, burumukava kandana aminga ava na koreimi gayari dae use irera.
Namokena nenda dombuda fakina tefori. Ágido, na sonembaso jebugaone!
22 Aso, na nanda natofo da dombuda nindae sakai sise, ninda javo jighono erare!
Na natofo totorugarera ainda jokáda ere fetedo, nindae sakai sise, ni rea usesa ava osa sarena.
23 “Bajari da saramana kakato, nemokena resena, nundae sakai sevu!
Jacob da imendi gamendi numoa kakara evu! Natofo Israel embo numoa tumonde bainghevu!
24 Nu mave mema aimi jarutuse sorara eraera ava, jo imboe use, gi gagairego ae eraira.
Nu nemokena gukai mutarigo itako jo ae eraira.
Nanjigo sonemba dae kori seraera amo, nu ningido sonemberaira.”
25 Beká resena, natofo ninda dombuda totorugururoro, ainda jokáda na ere fetedo, ni rea usesa,
aindae ninda javo jighono erarira.
Natofo nimoa tumonde baingheraera ainda dombuda,
na ere nimokena sino fuka rea joba mutari beka gagojusena, ava futuse dungono avarira.
26 Amingaono, makasi embo nenda uju ava inonoda mindarera.
Mave Bajari uju use foa totorugarera aimi, nundae sakai sarera. Nenda janje joká ivugaimi bedo are!
27 Endada evetu genembo Bajari kotae usera, aimi sekago kotarera.
Evetu genembo utu gambari utu gambari irera, aimi jovereghe numokena furarera.
Endada oro oro isasambu numoa tumonde bainghedo gharera.
28 Ainda beká mo, reighi isasambu da kini mo, Bajari numori. Ne isambu nune kaifa eraira.
29 Gogore kakato endada irera isambu aimi numokena tumoi baingharera.
Kotugo, evetu genembo endada irera isambu nébarago, numoa tumonde baingharera.
30 Maveju maveju sifo amboda sirorarera, némbarago numoa tumonde baingharera.
Ai resira amo, evetu genembo oroko irera aimi Bajari da binó ava nenda sasingukena siruroro ningido,
nenda imemesiri amboda sirorarera aikena, osa saoro ningarera.
31 Bajari nange nunda natofokena jebuga futusira ava, evetu genembo amboda sirorarera, aikena barago,