21
Gitofu Sosighi E Rurusera, Ainda Sakai Sari Da Yaruri.
1 Arie Bajari, ninda fakina futusesa aindae, kini ivuga erira.
Ni sonembeteso, gitofu sosoghi e rurusira aindae, ivuga tomanako beká erira!
2 Nunda janje jokáda rea uju usira ava futusesi. Rejodae benunu sisira ava, jo jighi jijinimbaeri.
3 Nu buvurutiri, ni ghaito tero fugutuse joba numo bekáimi esimbugusesi.
Aminguse, kotofu da kekesa auri goldi (gold) numo beká aimi ari ava bu, nunda jiroda asugusesi.
4 Nu nimokena jebugadae benunu setiri, ni jebuga evovodae irari ava futusesi.
5 Ni sonembusesa aimi, nu duró usira. Nine sonembeteso, nu binó a duró budo irira.
6 Geka bekári: ninda esimbugari evovodae numokena irira. Nu ninda dombuda irira aindae, ivuga use irá gheraira.
7 Kini nu Bajari Iká Bekáda ava tumonderaira.
Bajari nu kini barago dubo buraira aindae,
jo rejoimi nu derari durae arira.
8 Nunda gitofu isambu sandi barira. Natofo numokena osogo futo use irera isambu sandi bambarira.
9 Numo buvarira da sifo aminda ne avaraka bubura da vevera aimi dungari avarera.
Bajari, janje eko edo, avaraka mutari, ne avarira.
10 Kini nune, nenda sasingu isambu dari sirivo e tefo arera.
Enda eminda nenda imemesiri gamemisiri ava eniko jo irae arera.
11 Kotugo, numokena osogo use, kotari ekoko ava manaka gayeraera, avata beká jo sirorae arira.
12 Nunda feva aimi nemokena afari gido, ne jovereghe oju sumbarera.
13 Arie, Bajari, ninda fakina tomanako aindae, ni jighoro eraresa.