Buku einda jokáda yaru divari 150 ri. Israel embo totofo banunguse o God dae sakai sise divudo ghuseri. Kotugo God da Tafaroro Kambo Jerusalem aminda o sifo amboda dengoro indari kambo aminda tafaroro use divudo ghuseri, a oroko didiverera o tegeraera. Namonde Iesu tumonderaera evetu genembo buka einda yaru divari barago tegeraera a divuraera.
Yaru divari daba daba mave gefusira, namonde jo kasama aeri. Daba daba, Yaru 23, 51 Kini (king) David nune gembariá koteraera. Dabako Yaru 90 Moses gembariá koteraera. Avata namonde jo kasama e gogoghombaeri.
Geka da Jiro Baiboro mendeni aminda tamburaera, Hebrew geka aimi genembo ana eni gembiri jovereghuseri. Avata jo evetu genembo yaru gefusera aimi gembaeri, kotugo jo sifo ghousa geka Psalm daba daba jokáda irira, jo ijugae eraera.
Ainde dabade yaru mendeni da geka da jiro aminda foyago da geka “of David” tamburaera. Ainda beká jo dabako iraeri. Sifo mendeni ainda tuka mo, “David ai gefusira”, sifo mendeni “David kotise gefuseri.” Ainde dabade, sifo mendeni David da imendi eni kini edo irei kotise, ne “of David” gembudo ghuseri.
Kau daba aminga ava “of Asaph”, “to the sons of Korah” tamburaera amo, Asaph nengae Korah ghae tofo mandi yaru mendeni gefuseri, tano. Avata ainghae dabade nenda imemesiri, Levi ondi yaru God da Tafaroro kambo aminda kaifa edo ghuseri. Ava sedo “of Asaph” kotugo “to the sons of Korah” da beká mo, Asaph da imemesiri o Korah da imemesiri “gasegi edo divoro dae” gefuseri, tano. Avata, namonde oroko aminda sonemba bari jo inono iraeri.
Kau daba ava, yaru mendeni da geka da jiro aminda, Hebrew geka mendeni tamburaera, (shiggaion, maskil, miktam, gittith) ainda tuka beká mave oroko jo kasama ae eraera. Babojegari da kotari ne divari da aito o dubo ijuguse fifituseri. Aminga ava Psalm mendeni ainda geka da jiro aminda geka, “to the director of music” o “with stringed instruments” gefuseri. A evevari, avata namonde oroko aminda sonemba eni jo bae arera. Aindae sedo, Baiboro mendeni Good News Bible avavaga geka da jiro ana dodo, totofo geka Psalm daba daba jokáda irira kotise, geka da jiro seka simbugedo fifituseri. Namane daba ava useri.
Geka Selah yaru mendeni jokáda tamburaera, Hebrew geka eniri. Namonde oroko ainda tuka berefori. Ekaresia da babojegari yaru didivuse ojagho baoro dae sise sariá o songhe kotoro dae sariá ava koteraera. Avata jo gi gogoghombaeri. Ava sedo namane fitari dotutuseri.
1
Ivuga Beká da Kau Isagha Resira.
1 Genembo mave ari ekoko embo da dengoro indari ava jo ningae arira,
dubo ekoko embode dabade jo umo ae arira,
a ari ekoko embode dabade jo tatedo, God dere jirae arira,
genembo amo, nu ivugaghae a dubo jamaghae irarira.
2 Genembo amo, nu Bajari da Agho Dari uju eraira.
Sifo a tumba evia inono, nu dubo evevaghae Bajari da Agho Dari tegutuse, dubo kotise irira.
3 Nu kau ika uvu betuda govetero viviterira, amingori.
Nunda igi baduru use, a sifo furureari beká jighiraira.
Jo sifo reda gharasa edo avae arira.
Nu rea eraira amo, isambu eveva bekári.
4 O ari ekoko embo mo, ne jo kau amingo iraeri.
Ne kau roera eni, susu beká tefori, anoso a ifu vanembori.
Ne sena yaurai fuseari ghumburaira, ainda kaugori.
5 God bekáda bekáda ategi ururari, ne jo fetae arera.
Evetu genembo God kotae eraera amo, ne esike yarera.
Ne jo evetu genembo eveva ainde dabade irae arera.
6 Ainda beká mo: Bajari nu ari eveva embo ava bu tavo use,
nu ari ekoko embo ava fuge kotae ari, ya sirivo arera.
Yaru Divariri 2 ->
Languages