Ekaresia 26

1 Setiri, Kini Agrippa Paul kena sisira, “Tofo ninda geka rejo sari dae uju eresa ava, saso ningarena,” aminge setiri, Paul ungo jighiri eretiri, Kini (King) Agrippa kena eminge sisira, 2 “Kini Agrippa, na ninda dombuda fetedo, geka einda susu ava ijugaono garesa, aindae ivuga erena. Jusi embo rea seraera ainda susu ava, na ijugaono garesa. 3 Ni namane Jusi embo da kiki a agho dari anakora kasama e gogoghombusesi. Ava sedo, na ivuga erena. Erá dubo mema eose! Nanda geka itako ghousa evia sari dae erena.

4 “Na nange nange bajido genembo usena, a nanda irari ava, Jusi embo ne isambu kasama erera. A kotugo, na nange nange nanda frovensi aminda a Jerusalem aminda irá ghedo ghusena ava, ne gido ghuseri. 5 Na gimasa edo Moses da Geka kaifa kato eni useni. Gegenembo mendeni da tumondari God kena mo, jo nanda tumondarigo iraeri. A kotugo, nanda irari kau mavega edo ghusena, ava nene nimokena osa saoro ningaetesi. 6 God anakora namane Jusi embo da abuamanekena beka gagojusira. Na ainda beka gajari tumonderaena. Ava tumonderaena aindae sise, dumo edo na bu koto ari dae siseri. 7 Namane Jusi embo da oro isambu 12, God da beka gajari setena amo kotise, tumonde baingheraera. Avata tumondari resena eindae, na kotoda fifiterera. 8 Avori, God nu inonori. Nune sari evetu genembo ambarida ghe jebuge erarera amo, God numokena inonori. Ava sedo, Jusi embo a kotugo nimbarago, Kini Agrippa, ne redae jo tumondae eraevu?

9 “Avata giti, nambarago ava jo tumondae edo ghuseni. Nanda kotari mo: na aono Nasareth embo Iesu da bino ava eko aeti. 10 Na tuturo edo, Jerusalem aminda emingedo ghuseni: na fristi+ da kokotofu da javoda, God da natofo mendeni mendeni diburada fitido ghuseni. Fiteono, daoro amboro dae sirureoro ningido, na daba ava sedo ghuseni. 11 Na namane Jusi embo da dengoro indari kambo+ mendeni aminda, Iesu da natofo sandido dedo ghuseni. Iesu da bino ighagha aoro dae sedo, ne dedo ghuseni. Na janje eko edo, reighi Israel dodo, namanenda gitofu da reighi reighi aminda, Iesu da natofo ava sandido dari dae, ya foa ghedo ghuseni.

26:12-18 Bajari Iesu Nu Nange Nange Paul Kena Emboroda Isagha Usira Ava, Paul Osa Sisira.

12 “Na aindae sedo, fristi+ da kokotofu da reta bu eredo, nenda javoda reighi Damascus aminda iseni. 13 Avori, Kotofuko, na ena isonga emboro soroda, usasa tomanako janimbetiri gosuseni. A nanda kokomana barago gosuseri. Iji beká da usasa kitakori, usasa janimbusira amo, teriago bekári. 14 Namane isambu endada du fafasuseri. Du fafasetero, beka utuda ghe namokena siri nininguseni. Namane Israel embo da gekaimi eminge sisira, ‘Saul, Saul, ni redae namokena dubo mema futuse fakarago eraesi? Aminguse, ni tofo mandi mema eretafesi.’ 15 Aminge setiri, na siseni, ‘Arie, Bajari, ni mavejori?’ seteno, nu sisira, ‘Ni erá buneose! Na Iesu ri. Ni namokena dubo mema futuse fakarago eraesa. 16 Ere fete! Na nimokena isagha etena da beká mo eviri. Nanda saramana aso dae sedo, ni gateguseni. Ni oroko ningesa, a amboda ijugaono garesa ava, evetu genembokena osa saso ningarera. 17 Ninda natofo Israel embo ni jo daoro ambae aresa. Na ni dirigaono, ninda natofo Israel embo da gitofukena yama nemokena vironu saresa. Aminda iruraresa amo, na ni kaifa arena. 18 Ninda saramana mo: ni vironu saso ninda gitofu da diti basarira. Ne tumba da irari dodo, jovereghe foa nanda usasada teroro dae sedo, a ne Satan da fakina dodo, God da fakina ava baoro dae sedo, vironu saresa. A kotugo, ne nanda javoda tumondaoro, God nenda ari ekoko kote doyari ne, God nunda natofo anakora gategusira, ainda mendeni aoro dae sedo, ni vironu saresa.

26:19-32 Paul Nu Nangedo Gitofukena Ira Vironu Sisira Ava, Osa Setiri Kini (King) Agrippa Niningusira.

19 “Avori, Kini Agrippa, na nimokena isagha resena. God utuda ghedo isagha etiri nanda diti mokoi gosusena, ainda geka ava na jo kote doyae useni. Na ningido aminguseni. 20 Na reighi Damascus a reighi Jerusalem aminda tuturo edo, amboda Frovensi Judia ainda reighi isambu aminda ise, vironu sedo ghuseni. A kotugo, namane Jusi embo da gitofukena barago, ya vironu sedo ghuseni. Ne nenda ari ekoko vujegedo, God tumondedo ari eveva vanembo aoro dae sise, vironu sedo ghuseni. Ari eveva aoro dae sedo ghusena, ainda beká mo eviri: genembo mave ari ekoko dodo, ari eveva vanembo arira amo, evetu genembo isambu kasama arera: genembo amo dubo jovereghusira. 21 Na ainda saramana edo ghusena aindae, Jusi emboi na God da Kambo+ jokáda sandido, na dari dae useri. 22 Na dari dae sisera avata, God tuturo edo na sonembusira. Sonembusira ava sedo, na oroko eminda fetedo sabua a kokotofukena, nunda bino ava osa resena. Na rea resena emo, God da feroveta a Moses giti nene sedo ghuseri. Amo ne, rea amboda sirorarira ava sise, bino emo seoro ningido ghuseri:

23 ‘Namonde evetu genembo da ari ekoko kote doyari dae sedo, God nunda Genembo eni

dirigari, foa mema tafuse ambudo, namonde evetu genembo jo jebuge erae irera ainda

gitida, nune jebugedo erarira. Eredo, namane Jusi embo a gitofude, nunda usasaimi

jaraghururari, God da jebuga evovodae irari ava gido kasama arera,’

ne aminge sedo ghuseri, a na kau daba ava resena.”

24 Paul aminge siri, Festus nu eredo Paul kena koko sise sisira, “Ni daghetesi. Ni teria futo tegeraesa aimi, daghari dae eresa,” aminge sisira. 25 Setiri, Paul sisira, “Tefo, Kotofuko! Na jo daghaeri. Na dubo kotise, geka beká resena amo, eviri. 26 Kini Agrippa, na nimokena isagha resena. Ainda beká mo: geka setena emo, ni anakora kasama usesi. Na kasama erena: ni ainda bino niningusesi. Ainda susu mo: roera setena emo, evetu genembo da dombuda sirorusira. 27 Na kasama erena: namane Jusi embokena, God da feroveta rea sedo ghusera ava tumonderaesa,” aminge sisira. 28 Aminge setiri, Kini Agrippa Paul kena sisira, “Ni erekotesa amo, ni geka tufako evia saso, na Iesu da dorevare eni arena, ai? Amo erá koteose!” aminge sisira. 29 Setiri, Paul sisira, “Resesa, nanda uju a nanda benunu God kena: ni a evetu genembo isambu totorugeteva emo, ne nangedo namongava aetevu. Na jo seiniimi (chains) bundetevo fetirena, eindae saeri. Na Iesu tumonderaena, aminga ava aovo dae resena.”

30 Aminge setiri dadabetiri, Kini Agrippa nu, frovensi da kotofughae, Bernice a natofo isambu dabade eredo, 31 era isaghada buvudo tofo tofo se nininguseri, “Genembo emo dara eni jo aeri. Ava sedo, numo diburada jo fitae aeteri, o jo saoro ambae aeti.” 32 Aminge sedo, Agrippa nu Festus kena sisira, “Ni genembo emo doyaso yaeti. Avata makasí, nu namonde Rome embo da kotofukena yari dae sisira. Ava sedo, mutaso aminda yarira,” aminge sisira.

<- Ekaresia 25 Ekaresia 27 ->