Matthew 4

Di hagamada o Jesus

(Mark 1.12-13; Luke 4.1-13)

1 Nomuli, gei di Hagataalunga gaa lahi a Jesus gi di anggowaa belee hagamada go Setan.[a] 2 I muli nia laangi madahaa ge madahaa boo, gei Mee digi miami, gu hiigai. 3 Gei Setan ga hanimoi gi Mee, ga helekai, “Maa goe di Tama a God, helekai gi nia hadu aanei gii hai nia palaawaa.”

4 Jesus ga helekai, “Ma guu lawa di hihi i lodo di Beebaa Dabu boloo:

‘Tangada la hagalee mouli hua mai di palaawaa,

gei e mouli i nia helekai huogodoo

ala e lloomoi i baahi o God.’ ”[b]

5 Setan gaa lahi Jesus gi Jerusalem, go di Waahale Hagamadagu, gaa dugu a Mee gi di ulu di Hale Daumaha, 6 ga helekai gi Mee, “Maa goe di Tama a God, hobo ia gi daha, gii hai be nnelekai di Beebaa Dabu boloo:

‘God ga helekai gi ana gau di langi i di Goe,

digaula ga daahi Goe gi dee tugi oo wae gi nia hadu.’ ”[c]

7 Jesus ga helekai, “Ma guu lawa di hihi labelaa i lodo di Beebaa Dabu boloo:

‘Gi hudee haga mada ina Dimaadua go doo God.’ ”[d]

8 Setan gaa lahi labelaa a Mee gi tomo di gonduu duuduu i nua ga hagi anga gi Mee nia henua huogodoo o henuailala mo nadau madamada, 9 ga helekai, “Au ga gowadu gi di Goe nia mee huogodoo aanei, maa Goe ga dogoduli, ga daumaha mai gi di au.”

10 Jesus ga helekai, “Tuu i daha mo Au, Setan! Di Beebaa Dabu e helekai boloo:

‘Daumaha ang gi Dimaadua go doo God,

gei deelaa hua go Mee gi hai hegau ginai goe!’ ”[e]

11 Setan guu hana gi daha mo Jesus. Gei digau di langi ga lloomoi, ga hagamaamaa a Mee.

Jesus e daamada ana hegau i Galilee

(Mark 1.14-15; Luke 4.14-15)

12 Di madagoaa Jesus ne longono bolo John la guu lahi gi lodo di hale galabudi, ge Ia gaa hana gi Galilee.[f] 13 Gei Mee digi noho i Nazareth, gaa hana, gaa noho i Capernaum, tama waahale i tongotai di Tai o Galilee, i lodo nnenua Zebulun mo Naphtali.[g] 14 Di mee deenei ne hai bolo gi kila ai nia helekai ala ne hai go soukohp Isaiah:

15 “Tenua go Zebulun mo Naphtali,

i taalinga di ala dela e hana gi di tai

dela i baahi i golo o Jordan,

Galilee go tenua digau tuadimee. [h]

16 Nia daangada ala nogo noho i lodo di bouli,

ga gidee di maalama aamua.

Di maalama ga haga maalama digau

ala nogo noho i lodo tenua bouli o di made.”

17 Daamada i di madagoaa deelaa, gei Jesus ga agoago, “Huli gi daha mo godou huaidu, idimaa, Teenua King o God di Langi la gu hoohoo mai!”[i]

Jesus e gahi nia daangada hai waga daha dogohaa

(Mark 1.16-20; Luke 5.1-11)

18 Jesus nogo haele i tongotai di Tai o Galilee, ga gidee tagahaanau daane hai waga daha dogolua, go Simon e haga ingoo bolo Peter, mo Andrew, e wagadaha i di gubenge i lodo di monowai. 19 Jesus ga helekai gi meemaa, “Lloomoi i ogu muli, gei Au ga aago goolua di haangodo gi nia daangada.” 20 Di madagoaa hua deelaa, meemaa ga diiagi nau gubenge, gaa hula i muli o Jesus.

21 Mee ga hanadu, ga gidee labelaa tagahaanau dogolua go James mo John, nia dama daane ni Zebedee. Meemaa i hongo di boodi i baahi di nau damana Zebedee, e hagatogomaalia nadau gubenge. Jesus gaa gahi meemaa. 22 Di madagoaa hua deelaa, meemaa ga diiagi di nau boodi mo tamana, gaa hula i muli o Jesus.

Jesus e aago, e agoago, e hagahili ana magi

(Luke 6.17-19)

23 Jesus gaa hana gi lodo Galilee hagatau, ga agoago i lodo nia synagogee digaula, e agoago di Longo Humalia Teenua King o God, gei e hagahili ana hagadilinga magi e logo.[j] 24 Di longo o Maa guu dele gi nia gowaa huogodoo i Syria, gei nia daangada ga laha mai gi Jesus nadau gau magi huogodoo i nia hagadilinga magi e logo: digau gu iai di hagataalunga huaidu, hai hoodube, mo digau mmade nadau huaidina, gei Jesus gu haga hili nia magi digaula huogodoo. 25 Nia daangada dogologowaahee nogo daudali a Mee mai i Galilee, Decapolis*Decapolis: Di ingoo deenei dono hadinga i nnelekai Greek boloo, “nia waahale e madangaholu”, Jerusalem, Judea, mo tenua i bahi i dua di monowai Jordan.

<- Matthew 3 Matthew 5 ->