70
[Psalm lal David, Soko On in Asor]
Sie Pre In Suk Kasru
(Psalm 40:13–17)
1 Moliyula, O God!
LEUM GOD, kasreyu inge!
2 Lela tuh elos su srike in uniyuwi
In fohsak ac kutangyukla.
Lela tuh elos su pwarkin keok luk
In folokinyukla ac aklusrongtenyeyuk.
3 Lela tuh elos su isrunyu,
In mwekinla ke kutangyukla elos.
4 Lela tuh elos nukewa su suk kom,
Elos in engan ac insewowo.
Lela elos nukewa su sang kulo ke molela lom
In fahk pacl e nukewa, “God El fulatlana!”
5 Nga munas ac sukasrup;
Aksaye nu yuruk, O God!
Kom kasreyu ac moliyula.