1 Kom fin wi sie mwet fulat muta mongo, esam akwoya lah su el uh. 2 Kom finne ke mongo yohk, kom eis na lupa fal. 3 Nimet oasroasr nu ke mwe mongo yuyu el kite kom kac. Sahp el oru in mwe srike kom.

4 Kom in lalmwetmet, ac tia kemkatula in suk mwe kasrup. 5 Mani lom uh ku in wanginla ke kitin pacl na — oana in oasr posohksok kac, na sohkla oana sie eagle.

6 Nimet mongo yurin sie mwet srowohsr, ku mwel mwe mongo yuyu el oru. 7 El ac fahk mu, “Fahsru eis pac kutu mongo uh,” tusruktu el tia fahk ke inse pwaye. Nunak lal siena. 8 Kom ac wihtacla ma kom kangla, ac kusen eyeinse lom uh wanginla sripa.

9 Nimet srike in sramsram in lalmwetmet nu sin sie mwet lalfon; el tia ku in eis in nunku kac.

10 Nimet mokle sie masrol matu, ku eisla acn lun mwet mukaimtal. 11 LEUM GOD El ac loangelos ke ku lal, ac aolulos in sramsram lain kom.

12 Porongo mwet luti lom, ac sang kuiyom in lutlut.

13 Nimet alolo in kai sie tulik. Sie sringsring fal ac tia unilya, 14 a ma ac molela moul lal.

15 Tulik nutik, kom fin sun lalmwetmet, nga ac arulana insewowo. 16 Nga ac arulana engan ke nga lohng kom fahk kas lalmwetmet.

17 Nimet sok sin mwet koluk, a kom in akfulatye LEUM GOD pacl nukewa. 18 Fin ouinge, kom ac fah sun finsrak nukewa lom.

19 Tulik nutik, porongeyu. Kom in lalmwetmet ac nunak akloalya ke ouiyen moul lom. 20 Nimet kupasr nu sin mwet nim wain yokla ac kainmongo. 21 Mwet lungse nimnim ac mwet kainmongo elos ac sukasrup. Fin pwayena ma kom oru pa mongo ac motul, ac tia paht na kom nukum nuknuk mihsasa.

22 Porongo papa tomom — funu tia el, kom lukun wangin. Ke pacl se nina kiom el matuoh, akkalemye srui lom nu sel.

23 Pwaye, lalmwetmet, lutlut, ac etauk — ma inge kewa fal kom in moli, tusruktu kom in tia kukakunla, mweyen ma inge arulana saok.

24 Mwe insewowo nu sin sie papa tulik natul fin lalmwetmet ac moul suwohs.

25 Oru ma ac akinsewowoye papa tomom ac nina kiom. Kom fin oru ouinge, nina kiom el ac arulana engan.

26 Wen nutik, lohang akwoya, ac lela moul luk in mwe srikasrak nu sum. 27 Mutan kosro su eis molin kosro lalos, ac mutan koluk uh, elos sie kwasrip nu ke misa. 28 Elos soanekom oana mwet pisrapasr, ac oru mukul puspis in tia pwaye nu sin mutan kialos.

29 Su oasr ongoiya yoro? Su oasr asor yoro? Su amei ac lungse anwuk finne wangin sripa? Su srusrala atronmuta? 30 Elos su muta paht ke wain uh, ac elos su kar mwe nim ku. 31 Nimet lela wain uh in srifekomla, finne srusra ac saromrom in cup uh, ac arulana wo emah ke kom ac ukumya uh. 32 Ke lotutang tok ah, kom ac pula mu oana soko wet pwasin el ngaliskomi. 33 Motom ac liye ma sakirik, ac nunak lom ac kaskas lom ac fah tia kalem. 34 Kom ac pula mu kom kalkal meoa — ikwot ikme oana ke kom muta elucng ke kwesu in oak uh. 35 Na kom ac fahk, “Oasr mwet puokyu, nga tia pula. Oasr mwet uniyu tuh nga tiana esam. Efu ku nga kofla in tukakek? Nga enenu sie pac mwe nim ah.”

<- SOAKAS 22SOAKAS 24 ->