Book in Eoksra el sifani kas ke on limekosr ma akkalemye eoksra lun mwet Jew ke musalla lun Jerusalem in yac 586 B. C. (meet liki Christ), oayapa ke ma koluk ma sikyak nu sin mwet uh tukun sisila acn we ac sruoh lun mwet we. Finne srumunyuk mu mwemelil pa yohk in book se inge, tusruktu oasr pac akkalemyeyen lulalfongi ke God, ac finsrak nu ke pacl fahsru uh. Kusen on inge orekmakinyuk sin mwet Jew ke pacl in alu ac lalo lalos ke yac nukewa, su akesmakinyalos ke musalla lun mutunfacl sac ke yac 586 B. C.
Takla Lun Koanon Book Se Inge
Asor ke acn Jerusalem 1:1–22
Kalyeiyuk acn Jerusalem 2:1–22
Mwe kalya ac mwe finsrak 3:1–66
Musalla lun acn Jerusalem 4:1–22
Sie pre in siyuk ke pakomuta 5:1–22
1
Mwet Uh Asor Ke Acn Jerusalem
1 Pakomuta! Fuka mukela lun Jerusalem, su sie pacl ah sessesla ke mwet.
Sie pacl ah akfulatyeyuk el sin faclu nufon, a inge el supwar oana sie katinmas.
Meet el arulana fulat, a inge el putatyang nu in moul in mwet kohs.
2 El tung ke fong nufon, ac sroninmutal sorori ke likintupal.
Inmasrlon mwet kawuk lal meet ah nufon, tiana sie lula in akwoyal.
Mwet asruoki nu sel meet ah sisella, ac inge elos nukewa lainul.
3 Mwet Judah elos mwet kohs ke sripen lillilyak elos liki acn selos.
Elos muta in facl saya, ac wangin acn elos in pangon acn selos sifacna.
Mwet lokoalok lalos raunelosla, ac wangin innek in kaingla lalos.
4 Wanginla mwet tuku nu ke Tempul in pacl inge in tuh alu ke len mutal.
Tulik mutan su tuh alullul we elos muta in keok, ac mwet tol elos sasao na.
Mutunpot in siti uh oalallana, ac acn Zion oan in ongoiya lulap.
5 Mwet lokoalok lal elos kutangulla, ac el oan ye ku lalos.
LEUM GOD El oru elan keok ke sripen ma koluk puspis lal.
Tulik natul uh sruoh ac utukla lukel.
6 Wolana lun Jerusalem wanginla,
Mwet kol lalos elos oana deer ma munasla ke masrinsral,
Su apkuran in wanginla ku la ke elos kaingkin mwet ma ukwalos uh.
7 Ke Jerusalem el musalla ac mukaimtalla in pacl inge, el esamak ma nukewa ma wo nu sel meet ah.
Ke el putatyang nu inpoun mwet lokoalok lal, wangin sie acn ku in kasrel mweuni mwet lokoalok lal.
Mwet kutangulla uh isrunul ke el ikori.
8 Wanginla sunakinyal; el koflufolla, ac sununteiyuk el.
El sao ac wikin mutal ke mwekin.
Jerusalem el aktaekyal sifacna ke ma koluk lulap lal.
9 Ma fohkfok lal arulana mohtotla, tusruktu wanginna nunkeyen ma ac sikyak uh sel.
Ikori lal ah arulana koluk, ac wangin sie mwet ku in akwoyal.
Mwet lokoalok lal elos kutangla, ac el wowoyak nu sin LEUM GOD ac siyuk ke pakoten lal.
10 Mwet lokoalok lal elos pisrala ma saok lal nukewa.
El sifacna liye ke elos utyak nu in Tempul,
Yen LEUM GOD El tia lela mwet pegan in utyak nu we.
11 Mwet lal elos sasao ke sukyen ma elos in kang;
Elos sang ma saok lalos ayaol mwe mongo in sruokya moul lalos.
Ac siti uh wowoyak ac fahk, “Liyeyu, LEUM GOD. Liyeyu in keok luk.”
12 El pang nu selos nukewa su fufahsryesr yen el muta we, ac fahk, “Ngetma liyeyu!
Wangin sie mwet nu pulakin waiok oana nga,
Waiok su ma LEUM GOD El use nu fuk in pacl in kasrkusrak lal.
13 “El supwama e lucng me, sie e su firirrir in nga.
El filiya sie kwasrip nu sik ac sisyuwi nu infohk uh.
Na El sisyula ac likiyuwi in mutana in waiok luk.
14 “El tuni ma koluk luk nukewa ac kapsreni nu sie;
El sripisrya ke kwawuk, ac nga munasla ke toasriya uh.
Leum El eisyuyang nu sin mwet lokoalok luk, ac wangin ma nga ku in oru in lainulos.
15 “Leum El isrun mwet mweun fokoko luk nukewa;
El supwama sie un mwet mweun in tuh kunausla mwet fusr luk.
El itungya mwet luk oana grape ke nien fut wain.
16 “Pa inge sripa se oru sroninmutuk kahkkakla uh.
Wangin mwet ku in akwoyeyula; wangin mwet ku in akkeyeyu.
Languages