JOB 42

1 Na Job el topuk LEUM GOD ac fahk,

[Job]

2 “LEUM GOD, nga etu lah ku nukewa oasr sum,

Ac kom ku in oru ma nukewa kom lungse.

3 Kom siyuk lah fuka tuh nga kusen siyuk ke lalmwetmet lom

Ke wangin ma nga etu.

Nga tuh kaskas ke ma su nga tia kalem kac,

Ke ma usrnguk su yoklala nu sik in etu kac.[a]

4 Kom tuh fahk mu nga in porongo ke kom ac sramsram,

Ac in srike in topuk mwe siyuk lom uh.[b]

5 In pacl meet ah, ma na mwet uh fahk nu sik pa nga etu uh,

Tuh pa inge, nga liye kom ke mutuk sifacna.

6 Ke ma inge nga arulana mwekin ke ma nukewa nga tuh fahk ah,

Ac nga akkalemye auli luk ke nga muta inmasrlon kutkut ac apat.”

Saflaiyen Sramsram Uh

7 Tukun LEUM GOD El kaskas nu sel Job tari, na El fahk nu sel Eliphaz, “Nga toasr sum ac sin mwet kawuk luo lom ingan, mweyen komtal tia fahk kas pwaye keik, oana ke Job, mwet kulansap luk, el oru. 8 Inge, kom fahla ac us itkosr cow mukul ac itkosr sheep mukul an nu yorol Job, ac sang nu sel in mwe kisa lomtal nu sel. Job el ac fah pre keimtal, na nga fah lohng pre lal, ac tia aklusrongtenye komtal oana ma fal in orek nu sumtal. Komtal tuh tia fahk ma pwaye keik oana ke el oru ah.”

9 Eliphaz, Bildad, ac Zophar oru ma LEUM GOD El fahk eltal in oru ah, na LEUM GOD El lohng pre lal Job.

10 Na tukun Job el pre ke kawuk tolu lal ah, LEUM GOD El sifilpa folokonang mwe kasrup lal in pacl luo yohk liki meet ah.[c] 11 Mwet lel Job ac mwet loul, wi mwet kawuk lal nukewa meet, elos tuku nu yorol Job ac welul orek kufwa in lohm sel ah. Elos fahk kas in akwoyal ac akkalemye pakomuta lalos, ke ma nukewa LEUM GOD El tuh akkeokyal kac. Kais sie selos sang mani ac ring gold se nu sel.

12 LEUM GOD El akinsewowoye tafun moul lal Job tok yohk liki na tafun moul lal meet ah. Oasr tausin singoul akosr sheep, tausin onkosr camel, tausin luo cow, ac tausin se ke donkey natul. 13 Oayapa oasr wen itkosr ac acn tolu sasu natul. 14 El sang inen mutan se ma matu ah Jemimah, ac acn se akluo ah pa Keziah, ac acn se ma srik ah Keren Happuch. 15 Wangin mutan fin faclu nufon kato oana acn natul Job inge. Papa tumaltal el tuh sang mwe usru laltal oapana ke el oru nu sin mukul natul ah.

16 Tukun ma inge, Job el tuh sifil moul ke lusen yac siofok angngaul, ac lusen pacl se inge oru el ku in liye fwilin tulik nutin natul, oayapa nutin nutin natul. 17 Na el misa ke el arulana matuoh.

<- JOB 41