27
[Job]
1 Na Job el fahk,
2 “Nga fulahk ke Inen God moul su Kulana,
Su tia lela nununku suwohs in orek nu sik, a El ase nu sik sie moul na upa —
3 Ke lusenna pacl ma God El ase momong nu sik,
4 Ngoasrok ac fah tiana fahk kutena ma koluk,
Ac louk ac fah tiana kikiap.
5 Nga tiana ku in fahk mu pwaye sumtal;
Nga ac sruokyana ku in fahk mu moul luk uh nasnas, nwe ke na nga misa.
6 Nga fah tiana munasla in fahk lah moul luk uh suwosna;
Nunak lun insiuk mwesas na.
7 “Lela tuh mwet nukewa su lainyu ac lokoalok nu sik uh
In kaiyuk oana mwet ma koluk ac sesuwos moul la uh.
8 Finsrak fuka lun mwet ma tia etu God
Ke pacl se El ac eis moul lalos uh?
9 Ke pacl upa ac sikme, ya God El ac lohng pang lalos?
10 Elos funu sulela in eis engan ma El tuh ke sang nu selos ah, lukun wona.
Elos funu oaru na in pre nu sel, lukun wo pac.
11 “Lela nga in luti nu sumtal ke lupan ku lun God uh,
Ac akketeya ma God Kulana El akoo.
12 Tusruktu, pwayeiya uh komtal sifacna liye tari;
Na efu ku komtal kaskas lalfon angan?”
[Zophar]
13 Na Zophar el fahk,
“Pa inge luman akkeok ma God El oru
Nu sin mwet ma koluk ac sulallal uh.
14 Finne pus wen natulos,
A elos nukewa ac fah anwukla ke mweun;
Pacl nukewa ac sufalla mwe mongo nun tulik natulos.
15 Elos su painmoulla liki mweun, ac fah misa ke mas upa,
Ac finne mutan katinmas kialos uh, ac tia pac asor kaclos.
16 Sie mwet koluk ac ku in oasr ipin silver puspis lal liki ma el ku in oakla,
Ac pukanten nuknuk lal liki ma el enenu;
17 Tusruktu, kutuna mwet wo sayel pa ac nukum nuknuk inge,
Ac kutuna mwet suwoswos pa ac eis silver inge.
18 Mwet koluk uh ac musai lohm selos munasna, oana ahng lun pwepenu uh,
Ku oana lac lohm sin mwet foko ma karingin ima uh.
19 Tusruktu pacl se in moul lalos elos ac mau ona in kasrpalos,
A ke elos ac ngutalik, kasrup lalos uh wanginla.
20 Mwe aksangeng fah toki nu faclos oana sie sronot;
Ac sie paka fah tuhyak ke fong ac okulosla.
21 Eng kutulap ac fah pokolosla liki lohm selos;
22 Ac fah tuyang nu faclos arulana upa
Ke elos ac srike ke kuiyalos in kaingla.
23 Eng uh ac fah ngirngir ac isrunulos ke elos kasrusr,