ISAIAH 38

Tokosra Hezekiah El Mas Ac Kwela

(Luo Tokosra 20:1–11; Luo Chronicle 32:24–26)

1 Ke pacl se inge Tokosra Hezekiah el masak ac apkuran in misa. Mwet palu Isaiah, wen natul Amoz, el som nu yorol ac fahk nu sel, “LEUM GOD El fahk mu kom in akoela ma nukewa in wo, mweyen kom ac tia kwela. Kom ac misa.”

2 Hezekiah el forang nu pe sinka uh ac pre: 3 “LEUM GOD, esam lah nga kulansupwekom ke inse pwaye ac suwohs, ac pacl nukewa nga srike na nga in oru ma lungse lom.” Na el mutawauk in tung arulana upa.

4 Na LEUM GOD El sap Isaiah elan 5 folokla nu yorol Hezekiah ac fahk nu sel, “Nga, LEUM GOD lal David, papa matu tomom, lohng pre lom ac liye sroninmotom. Nga ac fah lela nu sum in sifilpa moul ke yac singoul limekosr. 6 Nga fah molikomla ac siti Jerusalem lukel Tokosra Fulat lun Assyria, ac nga fah karinganangna siti se inge.”[a]

7 Isaiah el topuk ac fahk, “LEUM GOD El ac sot sie akul nu sum in akpwayei lah El ac liyaung wulela lal. 8 Ke nien fan se ma musaiyukla sel Tokosra Ahaz, LEUM GOD El ac oru lulin faht uh in foloki fahluk singoul.” Na lul sac foloki ke fahluk singoul.

9 Tukun Hezekiah el kwela liki mas lal, el simusla on in kaksak soko inge:

10 Nga pangon mu nga ac som nu in facl sin mwet misa

Ke pacl se nga sun kuiyen moul luk,

Ac tiana aksafyela moul luk.

11 Nga tuh nunku mu in facl sin mwet moul inge

Nga fah tiana sifilpa liye LEUM GOD

Ku kutena mwet moul.

12 Moul luk uh utukla likiyu,

Oana sie lohm nuknuk ma tuleyuki,

Oana sie nuknuk ma laslasla liki mwe tol nuknuk.

Nga nunku mu God El aksafyela moul luk.

13 Nga tung fong nufon se ke ngal,

Oana lion soko in koteya sri keik.

Nga nunku mu God El aksafyela moul luk.

14 Pusrek munasla ac srikeni,

Ac nga sasao oana sie wule.

Atronmutuk totola ke nga nget nu inkusrao.

LEUM GOD, moliyula liki mwe lokoalok inge nukewa.

15 Mea nga ku in fahk? LEUM GOD pa oru ma inge.

Insiuk keoklana, ac nga tia ku in motul.

16 LEUM GOD, nga ac moul nu sum, nu sum mukena;

Akeyeyula ac lela nu sik in moul.

17 Keok luk fah ekla nu ke inse misla.

Kom molela moul luk liki mwe sensen nukewa;

Kom sisla ma koluk luk nukewa.

18 Wangin sie mwet in facl sin mwet misa ku in kaksakin kom;

Mwet misa tia ku in lulalfongi ke oaru lom.

19 Mwet moul pa kaksakin kom,

Oana ke nga kaksakin kom inge.

Papa uh fahk nu sin tulik natulos lupan oaru lom.

20 LEUM GOD, kom akkeyeyula.

Kut fah srital ke harp ac onkakin kom;

Kut fah alullul ke on in kaksak in Tempul lom ke lusen moul lasr.

21 Na Isaiah el fahk nu sel tokosra elan apisya ono se orekla ke fokinsak fig nu ke faf kacl ah, na el ac fah kwela. 22 Na Tokosra Hezekiah el siyuk, “Akul fuka se ac akpwayei lah nga ac ku in sifilpa som nu in Tempul?”[b]

<- ISAIAH 37 ISAIAH 39 ->