6 Noah el yac onfoko ke sronoti faclu. 7 El, mutan kial, wen natul ac mutan kialos sroang nu in oak uh in kaingla liki sronot uh.[b] 8 Mukul se ac mutan se ke kain kosro ac won nukewa, finne ma nasnas ku ma tia nasnas, 9 welul Noah utyak nu in oak uh, oana ke God El sapkin. 10 Tukun len itkosr na sronot ah tuku.
11 Ke Noah el yac onfoko matwal, in len se aksingoul itkosr ke malem se akluo, unon in kof nukewa ke kof lulap ye faclu fokelik ac kof uh asrma, ac ikakelik inkusrao pac,[c] 12 ac af uh kahk nu fin faclu ke len angngal ac fong angngaul. 13 Ke len sacna, Noah ac mutan kial sroang nu in oak uh, wi wen tolu natultal, Shem, Ham, ac Japheth, ac mutan kialtal. 14 Kain in kosro muna ac lemnak, yohk ac srik nukewa, ac kain in won nukewa welulos utyak nu in oak uh. 15 Mukul se ac mutan se ke kain in ma moul nukewa welul Noah utyak nu in oak uh, 16 oana ke God El sap. Na LEUM GOD El kaleang srungul in oak uh.
17 Sronot uh yokyokelik ke len angngaul, ac kof uh lapak nwe pahtkakunak oak uh. 18 Kof uh loali, na oak ah pahtpat fin kof uh. 19 Lapak nwe eol ma fulat oemeet uh afla pac. 20 Sronot uh kiluk na nu lucng nwe ke na sun fit longoul limekosr lucng liki mangon eol fulat faclu. 21 Ma oasr moul la nukewa fin faclu misa — won nukewa, kosro nukewa, ac mwet nukewa. 22 Ma nukewa ma oasr momong la fin faclu misa. 23 LEUM GOD El kunausla ma moul nukewa faclu — mwet, kosro, ac won. Pwayena ma lula pa Noah, sou lal, ac ma nukewa su welul in oak uh. 24 Kof uh tiana kiluk nu ten, nwe ke sun len aksiofok lumngaul.
<- GENESIS 6GENESIS 8 ->