3 Numa꞉la꞉, la꞉ Godokono tuputupu epolata, ebema꞉ me iyaiya kuba tanalo la꞉godolo akopola꞉nala꞉ — kamiyale ega꞉walo buwelemele pilo tanalo, apa꞉mo iyaiya ilipo osiyodilole tanalo, ega꞉walo mani kawonomamo malagidilo tanalo. Iyo, ebakobako kuba osiyodilole magumulo kuba da꞉peso idinomote la꞉godolo akoitanala꞉, nanitabokobi midia꞉piate la꞉imano ilukuli tanaloma꞉ kuba tabo gelakapoma꞉. 4 Ega꞉walo la꞉ iyaiya daleya woki awokalilaema꞉ tabo akokiyawaonakala꞉, iyo, epetapino ilipo osiyodilole tanaloma꞉ tabo gela꞉no modobola la꞉ wiyasiya iyaiya tetelo kalakala tabo Godotamo nowadipalatelenakiyala꞉. 5 Ebema꞉ modobola la꞉ me tanalo wadenomamo nemalagidilala꞉. Piyate kamiyalela buwelemelela iba꞉tamo pilo tanalo dosiyodilolenaka, ega꞉walo piyate ibino apa꞉mo iyaiya ilipo tanalo dosiyodilolenaka, ega꞉walo piyate mani kawonomamo demalagidilona, ibi bilibilinomo magumulo idite Kelisoko ega꞉walo Godoko ibi netewapino Kawo Elawodawano tanalodo wade walubi tanalo idi a꞉kuminakomene. Numa꞉la꞉, potele mani kawonomamo demalagidilona, ebeno tanalo ebe ida꞉da꞉li amamalateledawano tanalo keba kunula꞉ka꞉ eba kunula.
6 Ebema꞉ la꞉ magumulo idite maigate me opo epono daedale wokiamo la꞉ a꞉da꞉ masigilima꞉ dowagelemene, la꞉ ebeno tabo ako-olowiala꞉. Nanitabola, nale kebe iyaiya kuba tanaloma꞉ la꞉ kawiya kanaletama, ebako osiyodilole tanaloma꞉ Godokono kawo dowa tanalonomote ka꞉pemene, iyo, piyate ebetamo tudila꞉oma꞉ ubia꞉noma꞉ deda꞉ona iba꞉te kuba wiya kelaema꞉na꞉. 7 Ebe mabuma꞉ la꞉ ebako epago tanalo idi osiyodiloa꞉no iba꞉go akokapiyala꞉.
8 Nanitabola, la꞉ dopamo idoko magumulo ilukulinaimata, wiyasiya la꞉ idoko magumune pemaimiawete me tetelo aimano Kawodawano alo magumulo ilukulinamata, ebema꞉ la꞉ alono gudima꞉ eba eda꞉onalo modobola la꞉ alo magumulo wadenomamo nowapata꞉lamenala꞉. 9-10 Iyo, la꞉ Kawodawa Godoko kekalakalaima꞉ema꞉ la꞉imano osiyodilole magumulo gabo wadenomamo numinakiyala꞉, mabu numa꞉la꞉, piyate alo magumulo nanitabolo dilukuliona, iba꞉godone wadewade da꞉imi bilibilinomate pemaimionaka, ega꞉walo iba꞉te Godokono tuputupu okoli tanalo eba awokaliminalo ebeno nani tabono iyaiya tanalo ebo kiyawaonaka. 11 Ebe mabuma꞉ piyate idoko magumulo dilukuliona, la꞉ ebe epono osiyodilole tanalamo iba꞉go akokapiyala꞉, mabu ibino osiyodilole magumune wade da꞉imi idite kapemaiganakoa꞉. Modobola la꞉ wiyasiya Godokono alamo ibino osiyodilole tanalo na꞉pukuilamiyala꞉, epo epetapiate ebe kuba tanalono temeteme magumu wadenomamo kuima꞉, 12 mabu nanitabola, tuputupu lumagite tabo gema꞉ ilipokobi kolowimene iba꞉te diya gabodo dosiyodilolenaka ebe tanaloma꞉!
13 Ega꞉walo me tanalo idila. Epate dowaminalena Godote ebe tanalo bilibilinomo waminale magumune ebeno alamo kowaulatelemene, iyo, ebe tanalono nanitabo magumu ebo kawokalaoma꞉na꞉, 14 ebema꞉ me opono tanalo bilibilinomo magumulo alote kebe tanalo da꞉pukuimene epate wadenomamo kuima꞉na꞉, wamina magumulo walo a꞉kitanamene. Me mabuma꞉ Godokono epate mulo tabo idi ma kunu gelana,
18 Ega꞉walo me tanalo idila. La꞉ elawo gala꞉ipi da꞉imi obo kawiya akoniala꞉, mabu la꞉ eba kunu dowagela꞉ema, la꞉imano nio tetelo daedalema꞉ eba eda꞉olo la꞉ a꞉ka꞉tuwa꞉ la꞉ ebo ka꞉kubailaemamota. Modobola la꞉ wiyasiya Godokono Uliyanano tanalo kawiya na꞉nionakiyala꞉, ebete la꞉imano tepo magumu wadenomamo ketabokailaema꞉. 19 Ebema꞉ la꞉ la꞉imano tepo magumulo iyaiya oale alapio tanalamo Godoko wadenomamo namamatenakiyala꞉. Iyo, ma kunu Godokono Bukano Sam Oale bukalo da꞉pola꞉na ebe oale, ega꞉walo nanitabokobi midipiate Godokono anoano tanalo awokalilaema꞉ dosiyodilolenaka ebe oale, ega꞉walo ebeno Uliyanate la꞉imano tepo magumamo dalomonako ebe oale, la꞉imano iyaiya tetelo epetapiate epetapi ebe iyaiya oaleno tabamo eba waluba꞉tiuilo la꞉imano Kawodawatamo balapionakomata. 20 Ebene la꞉le aimano Kawodawa Ya꞉su Kelisoko waloma꞉ta tanalo kawokalima꞉ema꞉, modobola la꞉imano ilukuli magumulo kebe iyaiya tanalate la꞉tamo ka꞉pemaimione, la꞉ ebe tanalo bilibilinomoma꞉ Nabiwi Godotamo kalakala tabo nowadipalatelenakiyala꞉.
22 Ebema꞉ modobola la꞉ nanitabokobi midipi kamiyala꞉te la꞉imano awiatamo na꞉tudila꞉onakiyala꞉, la꞉le Kelisotamo keba kunu ka꞉tudila꞉wenama eba kunu. 23 Numa꞉la꞉, Kelisote sosi magumulo nanitabokobi midipino watodawama꞉ keba kunu keda꞉nale, eba kunu dubute ebeno kamiyaleno watodawama꞉ keda꞉na, wiyasiya modobola la꞉ dubate me tanalo idi wadenomamo nemalagidilala꞉, sosi epate Kelisokono apema꞉ eba eda꞉onalo, ebete ibi mabuma꞉ ebeno nilakapo kawonomo awokalimite ibino Igilo Mula꞉ledawama꞉ ebo ediya.
24 Ebema꞉ sosi epate Kelisotamo keba kunu ka꞉tudila꞉one, modobola kamiyala꞉te atumu ibino awiatamo eba kunu na꞉ka꞉tudila꞉onakoma꞉na꞉. 25 Wiyasiya nanitabokobi midipi dubala꞉, la꞉ me kawo tanalo idi akododomatiala꞉. Kelisote sosi epo nilakapolo eba malagidilolenalo ibi mabuma꞉ ebeno igilo iyabaiamo keba kunu kiyatiyale, modobola la꞉ eba kunu la꞉imano kamiyale nilakapolo nemalagidilolenala꞉.
26 Numa꞉la꞉, Kelisote ebeno igilo iyabaiamo iyati tanalodo ebete sosi epo gito uwatiya, iba꞉te Godokono talenapima꞉ eba eda꞉onalo ebeno woko kosiyodilonama꞉. Iyo, Kelisote ebe epono kuba osiyodilole tanalo ega꞉walo ibino tepo magumuno daleya woki ebeno tabono iyaiya tanalamo ukulaolenomo dukulaoliya, iba꞉te olioli epoma꞉ ebo eda꞉iya, epate mala꞉ ikila꞉ tanalodo molomoloa꞉noma꞉ keba kunu keda꞉onake eba kunu. 27 Nanitabola, Kelisote ebeno ubi tanalo ma kunu iyatiya, ebeno woko osiyodilo tanalodo sosite agalu buwelema꞉ deda꞉mene, ebene ebe a꞉ka꞉tuwa꞉ ebe wade pukuilame sosi ebeno kamiyalema꞉ kaidimene. Ebema꞉ ebe kamiyalegodolo kuba idi da꞉pesonomote a꞉kitanamene, iyo, ebete dubu idino tanalo iyatawa꞉no tuputupunomolo eba okolinalo, ebete da꞉pulinako ebe kaliku ebe daleya꞉ wade kalikunomola, ebeno a꞉la꞉uwa꞉da꞉le beda꞉ kawonomola꞉ka꞉!
28 Ebema꞉ modobola nanitabokobi midipi magumulo dubu idite ebeno kamiyale nilakapolo nemalagidilonamene, ebe a꞉ka꞉tuwa꞉ ebeno ape keba kunu kemalagidilonale eba kunu. Numa꞉la꞉, dubute kamiyale daidimene ebe tetene wagilimite ibino ilukuli igilote kapiyama꞉ keda꞉mene, ebema꞉ kebe tetelo ebete ebeno kamiyale demalagidilona, ebe atu gabodo ebe a꞉ka꞉tuwa꞉ ebe na꞉kemalagidilona. 29 Nanitabola, me opolo dubu idite ma kunu kokolina꞉, ebete ebeno apeno iyaiya modoboa꞉ tanalo ulame tetelo ebe a꞉ka꞉tuwa꞉ ebe kowalubinakoa꞉. Ao, dubuno osiyodilole tanalo eba kunua꞉. Kebe tetelo bae kape tanalote ibi dulame, ibi a꞉ka꞉tuwa꞉ ibi walubilima꞉ bae okalimiote ebo naonaka, ebema꞉ modobola nanitabokobi midipi dubate ibino kamiyaleno iyaiya modoboa꞉ tanalo magumulo ibi atumu na꞉kowalubilinakoma꞉na꞉. Numa꞉la꞉, Kelisote a sosi epo kawonomamo eba malagidiloenalo ebete a eba kunu walubinako, 30 mabu a nanitabokobi midipi bilibilinomo ebe ebeno apeno iyaiya apuapula.
31 Ebene Godokono Bukalo tabo idite ma kunu itana, “Me mabuma꞉ dubute ebeno menokola nabiwila miyapate ebeno kamiyala꞉go kapiyama꞉ keda꞉mene.” 32 Numa꞉la꞉, me tabono magumu tanalo idite waminalo ditana, nale ebe tanalo la꞉tamo ma kunu awokalimo, sosi epo ebe Kelisokono kamiyalela, ebema꞉ nanitabokobi midipi ega꞉walo ebe iba꞉te kapiyama꞉ nanitabonomolo eda꞉na. 33 Ebema꞉ la꞉ naimano dopo iyatulame tabo eba lawelo, me netewa kawokawo tanalo atumu na꞉kemalagidilola꞉la꞉. Dubute ebe a꞉ka꞉tuwa꞉ ebe keba kunu kemalagidilonale, modobola ebete ebeno kamiyale eba kunu nemalagidilonamene, ega꞉walo kamiyalete ebeno tepo magumuno wokilo ebe a꞉ka꞉tuwa꞉ ebe opamo eba iyatilo ebeno awi unamo nadipatenakomene.
<- Epe 4Epe 6 ->