1 Ebema꞉ la꞉ niyaniyata, a Godokono nani wokopiate eba꞉go woko eba osiyodilonalo, ale la꞉ ma kunu toweolama꞉ta, Godote me opo epatamo dawokalimiya la꞉ piyate ebe nilakapo tanalo delawa꞉ima, la꞉ nanisiwale! Modoboa꞉ ebe nilakapo tanalote la꞉ magumulo nanitabo woko osiyodiloa꞉no la꞉ magumune wadewade da꞉ima꞉te ebema꞉ a꞉kemaimioma꞉na꞉. 2 Iyo, Godote ebeno Bukalo tabo idi ma kunu gena,
“Nale kebe tete wadenoma꞉ degiyamo,
ebe tetenomolo
nale la꞉imano towetowe tabo olowiyamo,
iyo, nale la꞉imano igilo ka꞉mula꞉lema꞉
kebe egela modoboma꞉ degiyamo,
ebe egelanomolo la꞉ nanitabolo owalubiliyamata.”
Ebema꞉ la꞉ wadenomamo nolowiala꞉, me tete ebe Godokono wade tetela, iyo, me egela ebe ebeno igilo mula꞉ egelala.
Polokono Woko Osiyodilo Tanaloma꞉ Iyaiya Temeteme Tanalate Ebetamo Demaimiya
3 Numa꞉la꞉, a ubia꞉nola ale epatamo dosiyodilonama꞉ idite ebe woko kubama꞉ gema꞉, ebema꞉ ale woko wade wokinomago osiyodilonama꞉ ale epetapino agowa ukamidaolepima꞉ eda꞉okapoma꞉.
4 Ebe mabuma꞉ a Godokono nani wokopima꞉ deda꞉onama꞉, ale ebe tanalo aimano osiyodilole bilibilinomo magumulo kawokaliminakoma꞉ aimano woko magumulo kodakodalo ebema꞉ lamota꞉onama꞉, iyo, iyaiya temeteme tanalo ega꞉walo mibomibo tanalo ega꞉walo olalati tanalate atamo demaimionaka, ebe tanaloma꞉ ale woko katepana꞉.
5 Ebema꞉ numa꞉la꞉, tete epetapilo nanitabokobi midia꞉piate a alukoenaka, ega꞉walo tete epetapilo iba꞉te a idoko motamo gito iyalekenaka, ega꞉walo tete epetapilo iba꞉te epatamo elawo ikalamenaka a kanakapuaema꞉. Iyo, tete epetapilo epetapiate a walubia꞉no a a꞉ka꞉tuwa꞉ mibomibo woko osiyodilolenakoma꞉, ega꞉walo tete epetapilo ale u lao tanalo anaetoamidanakoma꞉, ega꞉walo tete epetapilo bae kape tanalote a uamenako.
6 Wiyasiya ebako tanalo bilibilinomo magumulo Godote atamo dikaeamena ebe wade daleya꞉ okoli tanalo, ega꞉walo ebeno mulo iyatawa tanalo, ega꞉walo aimano tepo magumu kodakodailame tanalo, ega꞉walo ebeno nilakapo awokalimi tanalo, ale ebe wadewade tanalo kapiya awokalilamenakoma꞉. Ebene ebeno Wade-talena Uliyanate a magumulo dokolina ebe tanalo, ega꞉walo ale tuputupu gabodo epetapi kawonomamo demalagidilolenama꞉ ebe tanalo, 7 ega꞉walo ale ebeno Nani Tabo da꞉kiyawaonakoma꞉ ebe tanalo, ega꞉walo ebeno elawote a magumulo woko dosiyodilona ebe tanalo, ale atumu ebe iyaiya tanalo kawokalilamenakoma꞉. Numa꞉la꞉, Godokono tuputupu okoli tanalote aimano gowelaono gilima꞉ eda꞉na, ebako gila꞉te aimano netewa kotolo ba꞉pola꞉na.
8 Ebema꞉ nanitabola, tete epetapilo epate a unamo owadipaeatenaka ega꞉walo tete epetapilo iba꞉te atamo ilipo ikaeamenaka, iyo, tete epetapilo iba꞉te a kuba osiyodilolepima꞉ egelanaka ega꞉walo tete epetapilo iba꞉te a emoioenaka. Ebene iba꞉te a a꞉da꞉ elemasigipima꞉ eka꞉minaka, wiyasiya tete bilibilinomolo ale nani tabo kapiya kiyawaonakoma꞉, 9 iyo, iba꞉te a uwatema꞉ ubia꞉noma꞉ eda꞉ona, wiyasiya Godote a kalakalago uwatenako. Ega꞉walo iba꞉te na꞉kegelana aimano olalati tanaloma꞉ tatalila a ka꞉elaomalema꞉, wiyasiya numa꞉la꞉, ale Godokono ubilo igilolo ilukulinama꞉, iyo, ale iba꞉godone kawokawo temeteme iyatawaonakoma꞉, wiyasiya ebete ibi nodiyobolenako aimano igilo nanitabonomolo kiyailiaema꞉. 10 Ebema꞉ tete epetapilo ale ipupagopima꞉ eda꞉onakoma꞉, wiyasiya tete bilibilinomolo aimano tepo magumulo kalakala kapiyate itananako, ega꞉walo epate a nigologolopima꞉ gelanaka wiyasiya ibi bilibilinomo epetapi ale Godokono tepo magumuno wadewade tanalamo dogodogopima꞉ midilinakoma꞉, iyo, iba꞉te a inamabua꞉pima꞉ ka꞉minaka wiyasiya Godokono dogodogo tanalo bilibilinomate agodolo ba꞉pola꞉na.
11-12 O Kolini namutupiala꞉, numa꞉la꞉! Ale la꞉ eba malagidilolenalo aimano tepo magumuno nilakapo gigiyute la꞉tamo a꞉iyamidalo itana, iyo, ale nanitabo tanalo idi wamina꞉no tabo la꞉tamo awokala ebema꞉ kiyawaima꞉. La꞉ wiyasiya la꞉imano tepo magumuno gigiyu atamo emopilimata, 13 ebema꞉ nale la꞉ naimano gudima꞉ eba midilitalo tabo ma kunu kiyawaomo, aimano tepo magumulo la꞉ mabuma꞉ ditana, modobola la꞉le ebe atu nilakapo tanalodo la꞉imano tepo magumuno gigiyu atamo atumu na꞉ka꞉ilama꞉la꞉.
Woko Osiyodilo Magumulo Nanitabokobi Midipiate Nanitabokobi Midia꞉piago Kapiyama꞉ Akoeda꞉oala꞉
14 La꞉ nanisiwale! La꞉le woko idi osiyodilo magumulo nanitabokobi midia꞉piago kapiyama꞉ akoeda꞉oala꞉, mabu piyate Godokono tuputupu osiyodilolepima꞉ deda꞉ona ega꞉walo piyate Godokono totomu tabamo tudila꞉oma꞉ ubia꞉noma꞉ deda꞉ona, iba꞉te tanalo idi kapimiya keba kunu na꞉kosiyodiloma꞉na꞉? Iyo, alo magumulo dowapata꞉lamena ega꞉walo idoko magumulo dowapata꞉lamena, iba꞉te kapimiya keba kunu na꞉kilukulinama꞉na꞉? 15 Eiye! Kelisoko ega꞉walo Saitanako iba꞉te tanalo idi osiyodiloma꞉ ibino woki kapiyama꞉ a꞉ka꞉midima꞉na꞉! Iyo, nanitabokobi mididawa ega꞉walo nanitabokobi midia꞉dawa, ibino wokino tanalate iyaiya eba pola꞉nalo iba꞉te kapimiya ilukulinama꞉ gabote a꞉kitanamene! 16 Ega꞉walo eba kunu Godoko amamatedawa ega꞉walo ida꞉da꞉li uliyana amamalateledawa, ibi netewapino wokino tanalate eba gowelaonalo milo tanalono nopo iyati gabo a꞉kuima꞉na꞉! Numa꞉la꞉, a piyate Igilo Godoko nanitabokobi da꞉midinama꞉, a ebe amamateno iyanomo motola, ebema꞉ ebete ebe tanalo eba malagidilolo ebeno Bukalo tabo dopamo ma kunu giya,
“Nale naimano epago eba okolinalo,
iba꞉te naimano ololo apulo
bowapata꞉lamenama꞉na꞉,
iyo, iba꞉te na kapiya ibino Godoma꞉ eba ka꞉na꞉minalo,
nale atumu ibi naimano nani epoma꞉
beka꞉la꞉minamo.”
17 Ebema꞉ Kawodawate walo ma kunu kegiya,
“Naimano epala꞉,
modobola la꞉le nanitabokobi midia꞉pi magumune
nemaimiala꞉,
la꞉ ega꞉walo ibi la꞉le
netewa iyaiya taneba magumulo
kilukuliawenama꞉.
Ebene nale kebe iyaiya tanalo kubama꞉ degenakomo,
la꞉le ebe kuba daleya tanalo ako-ologilinakala꞉,
mabu la꞉le me tabamo da꞉tudila꞉wenakoma,
nale la꞉ nanitabolo kalakalago buwatenakomata.
18 Iyo, ebe tetelo nale la꞉imano nabiwima꞉ eba eda꞉nalo,
la꞉le naimano gudima꞉ beda꞉onamata,
mabu na Kawodawa Elawonomote
me tabo nanitabolo gemo.”
