1 Ebema꞉ modobola la꞉le na Poloko ega꞉walo Apolosiko ega꞉walo a keba kunula꞉ka꞉ ebako nanitabokobi midipi epetapi, la꞉le aimano tanalo eba malagidilolelo a Kelisokono nani wokopima꞉ na꞉midiyala꞉. Iyo, Godote dopamo dowaminaliya, ebete me tetelo ebe tanalo piyatamo kawokalilamiyale iba꞉te me opono epo wadenomamo kiyatulaema꞉, a ebe ebe wokopila. 2 Numa꞉la꞉, me opolo kawodawa idite ebeno wokopi bilibilinomo magumulo kapiyakapiya kuwatemene iba꞉te epetapino woko namutupima꞉ keda꞉onama꞉, ebema꞉ ebe watowatopiate wokopi epetapino osiyodilole magumulo ibi wadenomamo eba walubilinalo ibino kawodawa ebo kekalakalaima꞉na꞉, iyo, iba꞉te ebe gabodo ibino tepo magumuno nanitabo tanalo ebetamo kawokalima꞉na꞉.

3-4 Ebema꞉ naimano tanalo ma kunula, na a꞉ka꞉tuwa꞉ naimano tanalo anagiyamida꞉no ebe tanalo naimano anagiyamidadawa Godotamo atepanamo. Ebene la꞉le naimano wokono tanalo anagilamelenama꞉wete kubama꞉ degelaema, ega꞉walo gabamaniate atumu naimano tanalo anagiyamida magumulo kubama꞉ da꞉kegelama꞉na꞉, na ebe tanaloma꞉ woki bilibilima꞉ a꞉keda꞉mo. Nanitabola, naimano tepo magumuno mulo wokite na kuba osiyodilodawama꞉ ka꞉midinina꞉, wiyasiya numa꞉la꞉, Godoko kapiyate naimano nanitabo tanalo iyatawala, naimano tepo magumuno wokino tanalotea꞉. 5 Ebe mabuma꞉ Kawodawa Kelisote pea꞉no, la꞉le lumagi idino tanalo anagiyamidama꞉wete ebe kubadawama꞉ akogelala꞉. Nanitabola, Kelisokono nani tetenomolo ebe a꞉ka꞉tuwa꞉ epono tanalo eba panagilamelelamelo, iba꞉te me tetelo kebe tanalo idoko magumamo kowaminalene ega꞉walo kebe ubi tanalo ibino tepo magumamo kowaminalene, ebete ebe tanalo bilibilinomo alamo powaulatelete ebo kawokalilaemene. Ebema꞉ ebe tete ebe Godokono wade tetema꞉ keda꞉mene, ebete ebeno epo bilibilinomono wadewade osiyodilole tanalo mabuma꞉ ibi kemoiolema꞉.

6 Ebema꞉ naimano nanitabokobi midipi ekakiala꞉, la꞉imano woki ka꞉tuputupuilaema꞉ nale Apolosiko ega꞉walo na, aimano wokono tanalo eba awokalimilo me iyaiya tabo la꞉ iyatulaemata. Na ubila la꞉ naimano iyatulame tabono tanalodo wade woki ma kunu kelaemamota, Godote ebeno Bukalo a keba kunu ka꞉totomuatenale, la꞉ ebe wadewade walubi tanalone a꞉kolobila꞉ema, iyo, modoboa꞉ la꞉ magumulo idite idino osiyodilo tanaloma꞉ ebe kapiya eba walogolo lumagi idino tanalo kubama꞉ gito gema꞉. 7 La꞉ ma kunu kemalagidilawitama, Godote la꞉ iyaiya alomotate idi unamo eba adipatelo idi wiyasiya opamo gito iyati? Ao, eba kunua꞉, ebete la꞉ kapiya epoma꞉ a꞉midiliata, la꞉le amamaoa꞉no ka꞉pola꞉wenama꞉. Numa꞉la꞉, kebe wadewade tanalate la꞉godolo ka꞉pola꞉nale, ebe tanalo bilibilinomo Godote nilakapolo la꞉tamo gito ikalamiata, la꞉ a꞉ka꞉tuwa꞉ la꞉imano elawamo wade tanalo idi kelawa꞉wea꞉. Ebema꞉ mabu keleka꞉ la꞉ magumulo epetapiate ibi a꞉ka꞉tuwa꞉ ibino tanaloma꞉ dowalogolena?

8 Eiye, la꞉ piyate damamawenama, la꞉ kubanu malagidilonamata modoboa꞉ tanalo kapiya idite la꞉godolo kitana꞉! Diyala, la꞉imano wokilo la꞉ ma kunu da꞉begelawenama, Godokono Uliyanate nanitabokobi midipiatamo dikalamena, ebe tanalo magumulo la꞉ dogodogopima꞉ eba eda꞉onalo wiyasiya a epetapiate nigologolopima꞉ eda꞉onama꞉! Ega꞉walo la꞉ da꞉ba꞉kegelawenama, Godokono umi magumulo la꞉ kawokawo elawodubuma꞉ iyalo eda꞉imata, wiyasiya aa꞉!

Ebema꞉ na Polote ebako daedale wokiagopiatamo negemo, la꞉le kawokawo elawodubuma꞉ nanitabolo neda꞉wetaleka꞉, a Ya꞉sukono nani alibolepiate la꞉ mabuma꞉ bekalakalaona꞉, iyo, a ebe tanalone biyatawaona꞉, la꞉ ega꞉walo a, ale kapimiya kawokawo elawodubuma꞉ eba eda꞉onalo epo bilibilinomate atamo kalakalago ka꞉tudila꞉oma꞉na꞉. 9 Wiyasiya Godokono ubi tanalo eba kunua꞉, iyo, naimano umi magumulo ebete a nani alibolepi alomoiya nanitabokobi midipi magumulo ale uwomunomopima꞉ keda꞉onama꞉. Ebe mabuma꞉ ebete gabamani kodiyobolena꞉, iba꞉te a nani alibolepino tanalo anagilameleamete a kubakubapima꞉ ka꞉milo epono ololo apulo a gito kanakapuaema꞉. Iyo, ebeno ubi tanalo ma kunu itana, ebeno Unu Duliyomololo dilukuliona ebe nopopi, ega꞉walo kubakuba uliyana ega꞉walo me opo epo atumu, ibi bilibilinomate aimano modoboa꞉ tanalo nanitabonomolo kuima꞉.

10 Eiye! Diyala, la꞉ ma kunu da꞉bemalagidilawenama, a Kelisokono nani alibolepiate ebe mabuma꞉ daedalepima꞉ eda꞉onama꞉, wiyasiya la꞉ ebe magumulo mulopima꞉ eda꞉onamata! Ega꞉walo la꞉ ma kunu da꞉ba꞉kemalagidilawenama, a nanitabokobi midi magumulo elawoa꞉noma꞉ eba eda꞉onalo wiyasiya la꞉ elawonomoma꞉ eda꞉onamata, iyo, epate la꞉ unamo eba wadipalatelelo iba꞉te wiyasiya negelana a kawokawopia꞉!

11-12 Wiyasiya numa꞉la꞉, aimano nanitabo tanalo ebe ma kunula. A woko wagilimi mabune me teta꞉mo pemaiga, tete bilibilinomo epetapilo bae kape tanalote a uamenako ega꞉walo obo kapete atumu atamo a꞉ka꞉penako, iyo, a kubakuba kaliku kapiyakapiya pupulionakoma꞉. Ebe mabuma꞉ a a꞉ka꞉tuwa꞉ aimano modoboa꞉ tanalo ulameleamete tete epetapilo a mani kele kuwatema꞉ kodakoda woko aimano kotamo gito osiyodilonakoma꞉. Ega꞉walo me tanalo idila. Aimano lao moto nanitabolo pola꞉na꞉no, a iyaiya opolo eba wapata꞉lamenalo ebo latepaonatonanakoma꞉, ebene tete epetapilo nanitabokobi midia꞉piate a eba malogoelo a tatakolo dalukoenaka, a wiyasiya ibi mabuma꞉ Godoko toweomenakoma꞉ ebete ibi wadenomamo kowalubilinama꞉. Iyo, kebe tetelo epate temeteme atamo dikaeamenaka, a wiyasiya woko osiyodilo magumulo kodakodalo lamota꞉onanakoma꞉, 13 ega꞉walo iba꞉te ibino tabamo a da꞉kubaiamena, a ibi nilakapo tabamo walubilinakoma꞉. Ebema꞉ modobola la꞉le a nani alibolepino tanalo ma kunu wadenomamo niyatawala꞉, me opo epono umi magumulo a ibino sosowa keba kunula꞉ka꞉ eba kunu eda꞉onama꞉, iyo, iba꞉te a ubia꞉noma꞉ eba eda꞉onalo, a kuba nibo inamabuma꞉ gelate dologala inamabuma꞉ iyalo a꞉midiya.

14 O naimano namutupiala꞉, nale me tabo la꞉tamo ilipo ikalaema꞉ kakulolea꞉. Ao, nale kawonomamo demalagidilolenamo la꞉ ebako gudima꞉ eba eda꞉onalo, naimano ubi ebema꞉ iyatimo la꞉ nanitabo gabo kiyatulametama꞉. 15 Numa꞉la꞉, la꞉imano Kelisoko waloma꞉ta tanaloma꞉ la꞉imano iyatulamepi bilibilinomate eba pola꞉nalo, lumagite ibi ka꞉la꞉miolema꞉ da꞉ ka꞉modobona꞉, wiyasiya na kapiyate la꞉imano nabiwi keba kunula꞉ka꞉ eba kunu eda꞉namo. Iyo, la꞉le Ya꞉su Kelisoko magumulo kilukula꞉wenama꞉, ebeno Wade Tabo la꞉tamo kiyawao magumulo na ebe dopo lumagima꞉ edimo, 16 ebema꞉ naimano guda꞉la꞉, nale la꞉ toweolaemata, la꞉imano ilukuli magumulo modobola la꞉le na la꞉imano nabiwi nibaminatena꞉la꞉. 17 Numa꞉la꞉, ebe tanalo eba malagidilolo nale naimano nanitabokobi midi gudu idi Timotiko la꞉tamo palibomo, mabu nale kawonomamo demalagidilonamo ebete ebako guduma꞉ eda꞉na, iyo, ebete naimano ubi tanalo nanitabonomolo osiyodilolenako. Ebema꞉ ebete la꞉tamo da꞉pemaigamene, nale iyaiya opolo sosi epo Kelisokono okoli tanaloma꞉ keba kunu kiyatulamenakomo, ebete ebe atu iyaiya tanalo eba kunu la꞉ ka꞉ka꞉piyatulaema꞉ta.

18 Na me tanalo iyatawala, la꞉ epetapiate namamaonamata mabu la꞉ kubanu ma kunu malagidilonamata, nale la꞉tamo a꞉ka꞉pemo. 19 Wiyasiya aimano Kawodawate ubi diyatimene, tete tatalila na nanitabolo ka꞉pemamo. Ebema꞉ ebe tetelo nale ebe amamaopino nanitabo tanalo ka꞉puimamo, ma kunu ibino tabo gela kawokawonomola wiyasiya Godogodone da꞉pemaigana ebe nanitabo elawote iba꞉godolo kitana꞉.

20 Numa꞉la꞉, Godote Kawo Elawodawama꞉ deda꞉na ebe tanalono magumute lumagino woki tabono tanalone kemaigana꞉, ao, ebe tanalono magumute kapiya gabodo kawokalamene, ebe Godokono elawote lumagino okoli magumulo ditanamene ebe gabola. 21 Ebema꞉ la꞉ piyate damamawenama, la꞉imano ubi keba kunula꞉ka꞉? Nabiwite ebeno wato kawokawo gudi gaubamo keba kunu kalukolenakole, la꞉imano kuba osiyodilole mabuma꞉ nale la꞉tamo ebako tanalo ba꞉ka꞉posiyodilomo? Wiyasiya na pea꞉no, modobola la꞉ dopamo la꞉imano amamao tanalone nolobila꞉iyala꞉, ebene na nilakapo wokiago ega꞉walo milo tanalago la꞉ naimano guda꞉tamo ebo ka꞉pemamo.

<- 1 Kol 31 Kol 5 ->