1 Ba:bema: naeno baiditi hiya:ma: deda:hanami ba:be komote wiboheno, nale Hunu Habalo tawakalubino kapiyuimi konomote kapimilo da:ga:lui ibino tabo madodo konomo ba:ma ka:na ulimo, “Godoko na:milimihala:! Ka:ka: mula: komote ebegodone nuluhukuna, ba:bene konomo awagaha komo ba:gala konomo helo komote ebegodolo ba:pola:na! 2 Ebeno ododili komo ba: tuputupunomola! Ba:ma ka:na ebete Dubu Bilibili Kamenatamo kuba huiya hibinomolo ikame, mabu ba:be Ko Kamenate kateneno kuba ubi komamo hopo haba konomo ba kubahimina, ebeno mauba ipuwalo Godokono huiyaha: okopi dito anakapulamenakui.”
3 Ba:bene hibima: midipino kapiyuimi konomote ibulunomamo gala na:kaga:luya:, “Godoko na:milimihala:! Ba:baloni konomo habate koelo da:woena, ba:be ahutate emedena emedena tetelo hunamo bodolonamene!”
4 Ba:bene Godote ebeno Ko Gawadalagi emede bahilo ba luta, ebe tametamelo da:pola:nui ba:bi 24 Watowatopi ba:gala netewa-netewa Hiya:nomo Nopopi, iba:te kapimilo ibino holoholo ebeno nato mabamo ba pemiya:te ebe adikumilo na:ga:luya:, “Ba:ba:la! Godoko na:milimihala:!”
5 Ba:bema: Godokono Ko Gawadalagi luta bahini eta tabo madodote da:pi, nale ba:ma ka:na ulimo, “La: puya:te aeno Godotamo papamila:halelo ebeno huiyaha: oko dowatihonama, iyo, la: kokopi ba:gala hegehegepi, wadiyala la: hiliyonomate ebe nawagaminala:!”
6 Ba:bene tawakalubi mumulunomate kapimilo da:ga:luti ibino tabo madodo nale gala na:kulimo, ba:be tabo madodo ba: helonomola, konomo beyate da:goenapenanako ba:gala alomote da:ga:lawatahale ba:bi kokonomo diyamo huiyala. Iba:te ba:ma ka:na ga:luya:, “Godoko na:milimihala:! Aeno Helonomo Kodawate Ko Gawadalagima: eda:na! 7 Ba:bema: wadiyala a hiliyonomate konomamo ba kalakalaha ebe hunamo kadipatiya:! Ba: hibila, Sipi-goe Deha:potoeno Kamenate ya:lo hidote ibino kapiyama: eda: poko tete ba: uluhuku, 8 ba:bene ba:be pokoeno komoma: Godote hidohido a:la:mina kaliko keyakeyanomo ba:be Kamenatamo ba: ikame.” Ba:ba tetelo na Yonete ba:moe komo iya:tawuimo, ba:bi pupulino ilina ba: hibima: midipino tuputupunomo ododili komokomola.
9 Ba:bema: Godokono nopodawate natamo na:goi, “Ama: Bukamo tabo ba:ma ka:na na:miya:ta:, Sipi-goe Deha:potote ebeno Kamenago kapiyama: eda: poko habamo kopelamema: pui ka:ka:lamiholiya:, ba:bi tawakaluba:te na:kalakalahamina:!” Ba:bene nopodawate ebeno tabo moga:melo gala na:kagoi, “Ba:moe ba: Godokono hibi tabola.”
10 Ba:bema: nale ebe adikumima: ebeno nato mabamo dito guimo, ebete huiyatiya natamo na:goi, “Ao, ama: na akadikunama:la:! Na ba: ama: ba:gala komo hibima: midipi ekaki huiyala, mabu na Godokono huiyaha: okodawa etala, iyo, Ya:suti ebeno hibi komo da:hawakalimiya:, la:le ba:be komo kodakodalo keba ka:na ka:laweonama, na ba: ba:ba ka:na kalawenamo. Ba:bema: wadiyala ama: Godoko kapiya nadikuma:.” Ba:ba tetelo na Yonete ba:moe komo iya:tawuimo, a hibima: midipa:te Ya:sukunu hibi komo hawakalimima: kebe tabo dolamagiminakoma:, ba:be tabo ba: Godokono ukui hawakalimipa:te dopamo da:hawakaliminakui ba:be atu tabola.
11 Ba:bema: naeno baiditi hiya:ma: deda:hanami ba:be komote wiboheno, Hunu Haba a:hiya:mida ba itana nale keyakeya oso-goe ebeno namutudawate ebe hunulu lutalo ba:bo umimo. Ba:be oso-goe namutudawoeno mahilo ba: Hibi Komo Hawakalimidawala, mabu ebete tuputupu gabodo tawakalubino komo ba anagilamelelamena kuba ododilipa:go ba:bo alaholohona. 12 Ebeno baiditi koe powamo ba wamoteme ebeno watolo hiliyonomo koko gawadubuino pake ilinate pola:ma:nui, ba:gala ebete ebeno apa:mo ebeno mahilo ya:lo a:miya:tiya: huiyatiya eta dawate ba:be mahiloeno komo iya:tawaha:. 13 Ba:bene tawakaluba:te ebe da:ka:minaka ba:be mahilo ba: Godokono Tabola, ba:gala ebete da:puli ba:be ga:ga: kaliko hawa:goenola, ba:be hawi ba: puya:te eba:go dalaholohona ba:bi dubuino hawila. 14 Ba:bema: Hunu Habanapi alaholohopa:te hidohido keyakeya kaliko pupuliti ibino hiya:hiya: kapiyuimi ipuwalo komo keyakeya oso-goegoe hunulu ba pola:na ba:be Kodawa ba:bo ta:matuya:. 15 Ba:bene ebeno tabo ipuwane giha giliti da:puluhukuna ebete ba:be gila:mo hiya:hiya: hoponapi kanakapulamema:ne, ba:gala ibi ipuwalo puya:te ebetamo papamila:haleheno ebete auli kukamo ibi kubamo kalukulima:ne, iyo, ba:ba tetelo ebete hopo haboeno gala:ipi gao hiliyonomo uwateholete ihi adilutihoeno nakola bobo ipuwamo iya:hekete Helonomodawa Godokono konomo mauba komamo ibi ba:bo konimikimoelema:ne. 16 Ba:bene ebeno ga:ga: kaliko hunamo ba:gala ebeno oke hunamo ebete ebeno mahilo kohawakalimima: tabo ya:lo ba:ma ka:na miya:tiya:, “Hopo habanapino hiliyonomo kokopi ba:gala gawadubu ipuwalo na kapiya ba: Kodawanomola, ba:gala na kapiya ba: Ko Gawadalagila!”
17 Ba:ba tetelo nale eta nopodawate hegela hunulu la:nalo ba:bo umimo, ba:bene ebete alomo hunudu da:puilahalenaka ba:bi holahola hiliyonomo ba ka:lami iba:tamo ibulunomo ba:ma ka:na goewatui, “La: mamo na:pelama:la:, Godokono konomo pokoeno ilina kopenahama:! 18 Alaholoho ipuwalo da:ha:lahamena:, ba:bi koko gawadubuino katene ba:gala ibino alaholohopino katene, ba:gala alaholohopino komo watowatopino katene ba:gala ibino oso-goegoeno katene, wadiyala la:le ba:bi hiya:hiya: katene na:penaliya:la:! Iyo, puino ka:ka:te alaholoho ipuwalo da:wibohomena:, ba:bi koko tawakalubi ba:gala hegehege tawakalubi, mani oko dowatina ba:gala huiyaha: oko dowatihona, wadiyala la:le pelamete ibi hiliyonomoeno katene na:pehawaminadigaliya:la:!”
19 Ba:bene nale Hiya:nomo Holoholo Ilina ba:gala hopo habanapino koko gawadubu ibino alaholohopi hiliyonomago, iba:te ba pekapiyuimita nale ba:bo ulamimo, iba:te ibino ubi tabo kapimilo ba:ma ka:na ihatiya:, iba:te oso-goe hunulu da:luti ba:be Kodawa ba:gala ebeno alaholohopi iba:go kalaholoma:. 20 Ba:bema: alaholoho ipuwalo Hiya:nomo Holoholo Ilina ba:gala Godokono mahilamo Ha:da Amiho Tabo Olamagidawa, Kodawate ibi netewapi ka:ka:lo uwatelete Saitanakono Koe Bobamo dito niya:heki, ba:be Bobolo helonomo nibote patena. Hibila, dopamo ba:be Ha:da Amiho Tabo Olamagidawate Hiya:nomo Holoholo Ilinoeno dopo hapulu koko hanohano komo dododilinakui, ebete ba:bi komamo hibima: midiha:pi ha:da ba:bo amiholamenakui, iyo, puya:te Hiya:nomo Holoholo Ilinoeno kukala uwatete ebeno ida:da:li dadikuminakui ba:bi tawakaluba:te ebeno kuba gabamo emogabuimi komamo dito gudinakuya:. 21 Ba:bema: Kodawate oso-goe hunulu da:luti, ebeno tabone da:puluhukuna ba:be gila:mo ebete Hiya:nomo Holoholo Ilinoeno komo ta:matapi hiliyonomo dito anakapulami, ba:bene holahola hiliyonomate pelamete ba:bi alaholohopino ha:laha katene konomamo da:penali ba:bo wigulameholi.
<- Haw 18Haw 20 ->