Salmo 9
9
Din Nalinteg Ay Pangokoman Diyos Sin Nanasyon
1 Naimposoan ay man-iyamanak en sik-a, Apo,
dad-atek am-in din nakaskasdaaw ay inamag mo.
2 Diyos ay Kangatoan, gapon sik-a palaloy ragsak ko,
mankantaak ay mangidaydayaw sin ngadan mo.
3 Lomayaw dan kalaban ko mo sangoen daka,
matokang da ya matey da.
4 Tan din iyat mo ay mangokom yan kosto,
inkeddeng mo ay magay basol ko.
5 Dinosam din ipogaw sin kailiili ay mangam-amag si lawa,
pinonas mo et malinglingan das eng-enggana.
6 Din kalaban mi, namingpingsan ay naabak da.
Binakas mo din siyodad da,
et malinglingan das eng-enggana.
7 Ngem sik-a pay ay Diyos, magay pap-eng di panturayam.
Insaad mo din tronom ay pangokomam.
8 Am-in ay ipogaw isnan labaw di daga,
Nalinteg ya kosto di iyat mo en daida.
9 Din ipogaw ay paligaten di iib-a da,
sik-a ay Diyos di pankamangan da
sin timpon di ligat da.
10 Talken daka sin nangammo en sik-a,
tan adi kan baybay-an din mankamang en sik-a.
11 Mankanta kayo ay mangidaydayaw en Diyos ay manturay ed Zion.
Dad-aten yo din inamag na sin am-in ay nasyon.
12 Adi linglingan Diyos din mapalpaligat ya din adawag da,
et dosaena din mamalpaligat en daida.
13 Maseg-ang ka ay Apo,
ilaem nan pomalpaligatan di kaibaw ko.
Sin pese omisalakan ka koma,
14 ta sin sangoanan di ipogaw ed Jerusalem, idaydayaw kos sik-a
ya manragsakak tan inmisalakan ka.
15 Din nanasyon yan nankaot da si bito ay nag-asan da
yan siya met laeng di naknaan da.
16 Inpaammom mo sino ka ay Apo
babaen sin nalinteg ay panangokom mo.
Ngem din mangam-amag si lawa,
kaman tagdey ay mangna en daida
din mismo ay am-amagen da.
17 Pese di pantongpalan di mangam-amag si lawa.
Katet-ewa na, am-in ay nanigaan en Diyos et say pantongpalan da.
18 Ngem din kakkaasi, baken kanayon ay mabaybay-an da,
adi aben makaan din namnama da.
19 Apo, man-gonay ka koma,
adi ka ipalobos ay makalisi di ipogaw en sik-a.
Sinopem din nanasyon ta okomem daida.
20 Apo, kibtotem man daida ta ammoen da