Salmo 8
8
Din Kinangaton Diyos Ya Kinabanol di Ipogaw
1 Diyos ay Apo mi, din panakabalin mo et maila
sin intiro ay daga,
din maidaydayawam et omabot ed daya!
2 Olay din anan-ak ya momoyang ay mansossoso
et ikankanta da din nabanol ay ngadan mo.
Begew sina, gominek da din kaibaw mo.
3 Mo tangadek ed daya ay inamag mo
et mailak din bowan ya talaw ay insaad mo,
4 Masmasdaawak et kankanak sin nemnem ko,
“Sino aya di kasasaad di ipogaw ta nemnemnemem?
Ay tan nabanol da od ta as-asikasoem?”
5 Ngem insaad mo ay nababbaba si at-atik mo din nailangitan ay parsua.[a]
Kaman din dayaw di ari et indayaw mos daida,
6 tan inpaituray mo en daida din am-in ay wada.
7 Iturayan da din matalaken ay karnero ya baka
ya din atap ay aanimal sin kada.
8 Siya abe din titit ay mantaytayaw ed daya,
din nigay ay wada sin baybay ay annawa.
9 Diyos ay Apo mi, din panakabalin mo et maila
sin intiro ay daga.
<- Salmo 7Salmo 9 ->
-
a Di esa abe ay kaiologan nina sin Hebreo et: …nababbaba si at-atik mo si sik-a. Ilaen abe sin Hebreo 2:6-8.