Salmo 72
72
Kararag Ta Itdoan Ya Bindisyonan Diyos Din Ari
1 Apo Diyos, itdoam din ari koma
ta magay pabpaborana sin pangowisana.
Idawtam komas sisya sin kinalinteg mo
2 ta say nalinteg di pangiturayana sin ipogaw mo,
din kalintegan di nabiteg et itontona ay kosto.
3 Mayat koma di apit sin daga
ya din ipogaw et nalinteg da.
4 Din kalintegan di nabibiteg et itonton din ari koma.
Din an-ak di kakaasi et tolongana koma
ya dosaena din mamalpaligat en daida.
5 Matagotago koma din ari si eng-enggana
ay kaman din kabayag di agew ya bowan ed daya.
6 Maiarig koma sin odan ay manibsibog si mola
ya mamasbasa sin namgaan ay lota.
7 Wada koma di kinalinteg ya talna sin timpo na
dalo et mo din bowan yan mawawada.
8 Sapay koma ta din kaannawan di iturayana,
manipod isnan ginawang ay Eufrates enggana sin gedeng di daga.
9 Paiturayan da koman sisya
din amin ay kalabana.
10 Din man-ari ed Mediterranean ya Espania
ya siya abe ed Arabia ya Etiopia,
iali da koma din bowis ya sagot da.
11 Amin koma ay ari yan manpaituray dan sisya
ya amin ay nasyon yan mansilbi dan sisya.
12-13 Tan isalakana din nabiteg ay mankedaw si badang na
ya din nabaybay-an ay makasapol en sisya.
Seg-angana ya isalakanas daida.
14 Isalakana din biyag da sin mamalpaligat en daida,
tan nabanol din biyag da en sisya.
15 Omando koma din biyag na
ya isagotan da si balitok ay mapod Arabia.*Din sigod ay ngadan di ili ay nay et Seba.
Kanayon koma ay ikararagan da
ta mantoltoloy di bindisyon Diyos en sisya.
16 Mawada koma di ad-ado ay makan sin daga.
Olay din toktok di dontog yan mamolaan da
ya kaman mola ed Lebanon ay ad-adoy lames da.
Din siyodad yan mapno si ipogaw koma
ay kaman din logam sin dontog di kaad-ado da.
17 Adi koman maliw-an din ngadana
ya mantoltoloy din dayaw na
basta mawawada din agew ed daya.
Mabindisyonan din kaipoipogaw begew en sisya
et amin ay nasyon yan idaydayaw das sisya.
18 Yahweh ay Diyos di Israelita, madaydayaw ka,
tan magay makaamag si kaeetnga
mo adi et anggoy sik-a.
19 Madaydayaw din napateg ay ngadan mo si eng-enggana
ya maammoan din kinadiyos mo sin intiro ay daga.
Amen, Amen.
20 Siya na din nakdengan di karkararag David ay anak Jesse.
<- Salmo 71Salmo 73 ->
- a Din sigod ay ngadan di ili ay nay et Seba.