Salmo 32
32
Din Ragsak Di Ipogaw Ay Napakawan Di Basbasol Na
1 Nagasat di pinakawan ya pinonas Diyos di basbasol na.
2 Nagasat di ipogaw ay inbilang Diyos ay magay basol na
ay dadlon naimposoan ay nanpodno en sisya.
3 Idi adiak pay laeng ipodno din nankolkolangak,
nabbanabbayak sin kanayon ay nan-og-ogaak.
4 Inagew ya linabi ay dinmosdosa ka, Apo,
et nay ay kinmapoyak si kosto,
kamanak nanling-eling-et sin man-atong ay timpo.
5 Idi siya di, inpaammok en sik-a din basbasol ko,
adiak intabtabon din lawa ay inam-amag ko.
Ninemnem ko ay ipodnok am-in da na en sik-a, Apo,
et laton met kayman ay pinakawan mo.
6 Isonga am-in ay mantalek en sik-a,
sik-a koma di pankararagan da
sin kosto ay timpo ay maanap ka,
ta mo omali di kaman layos ay problima,
adi domteng en daida.
7 Sik-a, Apo, di enak pantabtabonan
et omisalakan ka sin enak panligatan,
isonga ipigsak ay mankanta tan en ka omay-ayowan.
8 “Itdoak sik-a,” say kanan di Apo,
“ta say maammoam san danan ay kosto.
Ipangok sik-a ta adi ka masangaw sin danan mo.
9 Baken ka koma kaman atap ay kabayo
ay siyat mabosalan asi pay omamo.”
10 Ad-adoy ligat ay nam-osen di mangam-amag si lawa,
ngem kanayon pay ay laylayden ya seg-angan Diyos di mantalek en sisya.
11 Manragsak kayo ay nalinteg ya managtongpal en Apo.
Begew sin seg-ang na en dakayo,