Salmo 3
3
Kararag Sin Agsapa
1 Sik-a ay Diyos, ilaem kod di kaad-adon di komonkontra,
din kaibaw ko et ad-ado da.
2 Lomaslasoy da pay ay kankanan da,
“Ilaen yo et adi man badangan Diyos sisya.”
3 Ngem kaman kan kasay ay salaknib ko,
isonga laton ay abakek din kaibaw ko.
Idawat mo kasin din dayaw ko,
et papigsaem nan nemnem ko.
4 Mo man-adawagak ay mankedaw si badang mo,
songbatam sak-en sin nasantoan ay dontog mo.[a]
5 Ed labi, inbaktad ko ta maseyepak,
et laton ay maga di nandanagak
enggana sin kasinak binmangonan,
tan wada ka ay mangay-ayowan.
6 Olay mo linmilikob di kalibolibo ay kagobat ko,
adiak emegyat tan sik-a di salaknib ko.
7 Diyos ay Apok, dalasem ta omisalakan ka.
Tan din kagobat ko et kanayon ay dinosdosam daida
et kinakaan mo san kabaelan da.
8 Sik-a anggoy di makaisalakan,
sapay koma ta din ipogaw mo et bindisyonam.
<- Salmo 2Salmo 4 ->
-
a Din dontog ay Zion et say kad-an din Timplo.