Salmo 29

Din Napigsa Ay Kalin Diyos

1 Dayawen yo si Diyos, dakayo ay wadad daya,

bigbigen yo din kinangato na ya panakabalina.

2 Idaydayaw yo din nakaskasdaaw ay ngadana,

mandokmog kayo en sisya

begew sin mankoniniing ay kinasanto na.*

3 Madnge din kali na sin danom ya baybay ay annawa,

manakabalin si Diyos, kaman kido di kali na.

4 Mo mankali sisya, maila din panakabalina

ya din nangatongato ay turay na.

5 Olay din mankanakneg ay sidro ed Lebanon, magotlo da,

6 din dontog ay Lebanon ya Hermon yan papadtokena

ay kaman din iyat di anak di baka.

7 Babaen met laeng sin kali na, din kimat yan pansilapena,

8 din lugar ay magay omili ed Kades yan ikiweg na.

9 Pati abe din kadadak-an ay kaiw yan iwagawag na

enggana ay maspak da.

Sin Timplo na pay, ibogbogaw da,

“Sik-a ay Diyos, madaydayaw ka!”

10 Sin timpon di layos ed idi,

enggay nanturturay si Diyos ay ari.

Maga abey patinggan di panturturayana,

tan man-ari sisya si eng-enggana.

11 Papigsaen Diyos din ipogaw na,

ya bindisyonanas daida si talna.