Salmo 25
25
Kararag Ay Mankedaw Si Panangiturong Ya Badang Diyos
1 Mankararagak sin pandayawak en sik-a, Apo.
2 Mantalekak en sik-a ay Diyos ko.
Adim kod ipalobos ay maibabainak, Apo,
begew sin omabakan di kalaban ko.
Adi ka kod ipalobos ay somiyek da, Apo.
3 Adi maabak din mantalek en sik-a,
ngem din manlipot ya mangietek si iib-a da
et maibabain da.
4 Itdom kod din pandanak ay kosto
ta say amagek din laydem, Apo.
5 Itdom di iyat ko ay mangonod sin ibilang mo ay tet-ewa,
tan din Diyos ay omisalakan et sik-a,
isonga di pantalkak ay kanayon et sik-a.
6 Nemnemem koma din seg-ang mo
ya adi manbalbaliw ay layad mo
ay inpappailam manipod ed nabaon, Apo.
7 Pakawanem koma din basbasol ko sin kakitkittoy ko.
Nemnemem komas sak-en gapo sin kinasiged mo
ya adi manbalbaliw ay layad mo.
8 Sik-a ay Diyos, gapo ta siged ya nalinteg ka,
itdom sin managbasol din danan ay onodan da koma.
9 Iturong mo din napakombaba sin kosto ay danan da
ya itdom din laydem en daida.
10 Kanayon ay matalek ka ya ipailam din layad mo
sin managtongpal sin intolag mo ya bilbilin mo.
11 Ad-ado kayman di basbasol ko,
ngem pakawanem koma gapo sin ngadan mo.
12 Din mangipateg en sik-a et itdoam daida
sin kosto ay danan ay onodan da.
13 Kanayon to ay mayat di biyag da
ya din inkarim ay ili et tawiden din an-ak da.
14 Gagayyem Diyos din mangipateg en sisya
et ipasigurado nan daida din intolag na.
15 Naimongsan din nemnem kon sik-a, Apo,
tan omisalakan ka sin am-in ay ligat ko.
16 Somagong ka, Apo, ta maseg-ang ka,
tan magay bomadang yan pomalpaligat da.
17 Palag-anem koma nan problimak,
omisalakan ka sin am-in ay panligatak.
18 Ilaem kod nan ladingit ya ligat ko
ta pakawanem am-in ay basol ko.
19 Ilaem man nan kaad-adon di kalaban ko
ya din liget dan sak-en ay napalalo.
20 Somalaknib ya omisalakan ka koma,
adi ka ipalobos ay omabak da
tan din pankamangak et sik-a.
21 Gapo ta siged ya nalintegak,*Di esa abe ay kaiologan nina sin Hebreo et: Gapo ta siged ya nalinteg ka … omayowan ka koma,
tan mantalekak en sik-a.
22 Apo, isalakan mo kod din Israelita
sin am-in ay ligat da.
<- Salmo 24Salmo 26 ->
- a Di esa abe ay kaiologan nina sin Hebreo et: Gapo ta siged ya nalinteg ka …