Salmo 113
113
Kanta Ay Pangidayaw En Diyos Ay Managseg-ang
1 Madaydayaw din Apo!
Dakayo ay mansilsilbin sisya,
dayawen yos sisya.
2 Madaydayaw koma din ngadana
ed wani ya si eng-enggana.
3 Manipod sin balaan di agew enggana sin diposana,
madaydayaw koma din ngadana.
4 Iturayan Diyos din intiro ay daga,
din kinangato na yan nangatngato mo ed daya.
5 Si Yahweh ay Diyos tako yan magay makaiso en sisya.
6 Nangatongato din trono na,
ngem manyakog-ong ta osdongana
din kad-an di talaw ed daya ya nan daga.
7 Badangana din nabiteg sin ligat da,
et pasigedena din biyag da.
8 Patokdoenas daida sin kad-an di mabigbigbig ay ipogaw na.
9 Idawtana din basig ay babai si an-ak na,
et maragsakan sisya sin beey na.