1 Dengngem tan man-ay-ayag din sirib, din panakaawat yan ipigsa nan kali na. 2 Pinmipika sin toktok di dontog, sin asag-en di nansisianan di danan. 3 Pinmipika abe sin kad-an di eneb ay pandanan di amin ay senggep sin siyodad yan kanana ay manbogaw, 4 “Ay-ayagak dakayo amin ay ipogaw isnan daga. 5 Mabalin ay lomaing din magay ammo na ya manemneman din naong-ong. 6 Dengngen yo tan nabanol ya kosto din ibagak. 7 Tet-ewa amin din ibagak tan kaliliget ko ay man-etek. 8 Din amin ay kalik et matalek, maga polos di iaw-awana ono ietekana. 9 Mo waday panang-awat yo ya layden yo ay matapian di ammo yo, maila yo ay nalawag din kalik ya magay kaipaksawana. 10 Ibilang yo koma din pamagbagak ay nabanbanol mo palata ya din panakaammo ay nabanbanol mo din kanginaan ay balitok. 11 Tan nabanbanol din sirib mo din nangingina ay al-altin di awak. Olay sino ay laylayden yo yan adi makaiso en sisya.

12 “Sak-en si Sirib ya si Annad din kakostoan ay gayyem ko. Wada aben sak-en di panakaammo ya panakaawat. 13 Mo patgen yo si Diyos et sigaan yo din lawa. Kaliliget ko din pangipangatoan si awak, lawa ay amag ya etek. 14 Manakabalinak yan mapon sak-en di siged ay pamagbaga ya nalinteg ay nemnem. 15-16 Babaen en sak-en, manturay di aari ya odom ay oopisyal isnan daga ya amagen din tuturay di kostokosto ay linteg.

17 “Laylaydek amin din manglaylayad en sak-en, yan din napasnek ay oman-anap, detngen das sak-en. 18 Kabaelak ay idawat di mantoltoloy ay kinabaknang, dayaw ya kinalinteg. 19 Din bindisyon ay mapon sak-en et nabanbanol mo din kasigedan ay balitok ya palata. 20 Say am-amagek din kosto ya nalinteg, 21 tan pabaknangek din amin ay manglaylayad en sak-en et pon-ek din pan-idoldolinan das gameng da.

22-23 “Sin damodamo, idi daan pay laeng parsuaen Diyos din amin, inpawada nas sak-en. Nangon-onaak ay naparsua mo nan lobong. 24 Nawawadaak idi maga pay laeng di baybay ya obbog, 25 sin daan kaparsuaan di dontog ya bilbilig, 26 din daga, papayew ya olay din tapok. 27 Idi insaad Diyos din daya sin kosto ay kad-ana sin ngaton di baybay, wadaak sidi. 28 Iso na abe idi inpeey na din liboo ed daya ya sin namarsuaana sin obbog ay kapoan di danom sin baybay. 29 Wadaak idi inbilina di gedeng di baybay ta say tongpalen din danom ya idi insaad na din lanad di daga. 30 Tinatakdok si Diyos ya binadangak ay nanplano ya nanparsua. Naragsakan sisya en sak-en sin inag-agew yan naragsakanak abe ay naitatakdo en sisya. 31 Peteg abe di ragsak ko begew sin daga ay pinarsua na ya sin ipogaw.

32 “Dengngen yo ay an-ak ko. Nagasat din manongpal sin pamagbagak. 33 Esten yo ay dengngen din itdok ta lomaing kayo. Adi kayo baybay-an. 34 Nagasat din omali si inag-agew sin beey ko ay mandenge sin pamagbagak. 35 Din manteng en sak-en et mawadaan si biyag ya malaydan si Diyos en sisya. 36 Din adi makadteng en sak-en et paligatena di awak na. Din manigaan en sak-en et laylaydena ay matey.”

<- Proverbio 7Proverbio 9 ->