1 Anak ko, ay waday tinakderam ay otang di odom ay ipogaw? 2 Ay kaman kan nakna si tagdey gapo sin karim? 3 Mo siya di, tengel daka sin panakabalin di ipogaw ay sana, ngem siya na di amagem ta mailisi ka: emey ka ay dagos ta manpakombaba ka ay manpakaasi en sisya. 4 Adi kan man-illeng pay laeng ono maseyep. 5 Ipakat moy kabaelam ay bomolos ay kaman din iyat di ogsa ta ilayawana din manganop ono din iyat di titit ta ilisiana din tagdey.

6 Sik-a ay nasadot, adalem din biyag di koton ta lomaing ka. 7 Maga di pangolo da, 8 ngem man-olnong das kanen da sin tiyagew ya pinag-aani ta say maisagana di kasapolan da sin pinag-oodan. 9 Ay daetan pay sas seyep mo? Pig-an pay di bomangonam? 10 May, maseseyep ka pay, man-illeng ka pay, 11 ngem di pantongpalana et bigla ay bomiteg ka ay kaman din inakewan di tollisan.

12 Din makedse ay ipogaw ay magay silbi na yan lomikeliked ay man-et-etek. 13 Mankedyakedyat ya mansinyasinyas ta ietekan daka. 14 Sinisikap di naigto sin nemnem na, pag lawa di panggep na ya sisya di mangiloglogis adi pankikinaawatan. 15 Gapo isdi, bigla ay domteng di dosa na ay magay rimidyo na.

16 Waday pito*Din kanana sin Hebreo et: Waday enem ay banag ay kalkaliget Diyos, pito ay kadodogis sin pangila na. Din silbin di dowa ay bilang et manparis da, tan manparis abe din dowa ay linya ay kad-an da ya lawa di kadngeana mo owat maipidwa din bilang ay pito. Din kaman nina ay paris et madtengan abe sin kapitolo 30. ay ogalin di ipogaw ay kalkaliget Diyos, kadodogis da sin pangila na: 17 din mangipapangatos awak na, din maetek, din manpeses ipogaw ay magay basol na, 18 din manplano si lawa, din alisto ay en man-amag si lawa, 19 din mangitistigos baken tet-ewa ya din mangilapo si adi pankikinaawatan di sinpamilya.

20 Anak ko, tongpalem din bilbilin amam yan adi kan liwliw-an din init-itdon inam. 21 Kanayon koma ay nemnemnemem dasa. 22 Din init-itdo da di mangipango en sik-a mo waday emeyam ya manilib en sik-a mo maseyep ka. Mo bomangon ka et say mamagbaga en sik-a. 23 Tan din bilbilin ya pamagbaga da et maiarig si silaw ay mangipaila si iyat mo ay manbiyag. 24 Ilisi daka sin makasolisog ay kalin di makilallalaki ay babai. 25 Adi kan aklongan din kinapintas na ono maawis sin mata na. 26 Tan banol di tinapay di ibayad mo sin hostess, ngem dilikado di biyag mo sin babai ay waday asawa na. 27 Ay mabalin aya ay ibolsikom di apoy yan adi mapooan din badom? 28 Mo gatinan di esay ipogaw di man-ganggangab ay oling, ay adi maatongan din siki na? 29 Siya abe sin makidaag sin asawan di ib-a na, magay adi madosa ay mangamag sina. 30 Adi maoyaw di ipogaw ay mangakew ta pangagas nas dagaang na. 31 Ngem mo mad-asan, bayadana pay dedan di mamin pito ay banol din inakew na ono idawat na am-in ay wadan sisya. 32 Ngem din makibabai et magay nemnem na, tan owat nan dadaelen di awak na. 33 Sakit di awak ya kaibabainana ay adi kaponas di magon-od na. 34 Tan palalo ay bomonget din asawan di babai gapo si imona, et magay seg-ang na mo man-ibaes. 35 Adi kabaew di bonget na olay mo pigay idawat mo.

<- Proverbio 5Proverbio 7 ->