1 Anak ko, estem ay dengngen din pamagbagan di esay ama ta mawadaan kas panang-awat. 2 Kosto din it-itdok en sik-a, isonga adi kan liwliw-an. 3 Sin kakitkittoy ko pay laeng, esaak ay anak sin beey da amak yan bogbogtong ay anak sin pangilan inak. 4 Kanan amak ay namagbaga en sak-en, “Adi ka liwliw-an din ibagak. Tongpalem din bilbilin ko ta matagotago ka. 5 Gon-odem di sirib ya panang-awat yan adi kan tetewengen ya liwliw-an din pamagbagak. 6 Adi kan dokdokogan et say mangayowan en sik-a, ipateg mo et salakniban daka. 7 Say kapatgan ay banag din sirib, isonga ipakat moy am-in ay kabaelam ay mangon-od olay intoy kaligat na, siya abe sin panakaawat. 8 Dakdake ay dayaw di magon-od mo mo awatem ya banolem din sirib. 9 Mo say iyat mo di, manbalin din sirib ay kaman mankanapteng ay sabsabong ay maikorona en sik-a.”

10 Anak ko, dengngem ya patiem din ibagak ta omando din biyag mo. 11 Init-itdoak sik-a ta lomaing ka ya onodam di kosto ay danan. 12 Mo mandan kas di, magay manawad en sik-a ya adi kan maisokba mo managtag ka. 13 Adi kan linglinglingan din inad-adal mo. Ayowanam tan say poon di biyag mo. 14 Adi kan em-emey sin em-emeyan di mangam-amag si lawa ya adi kan on-onodan din am-amagen da. 15 Addawiam din mangam-amag si lawa, dokogam ya taynam daida. 16 Tan adi da maseyep mo adi da man-amag si lawa ya mo magay ipogaw ay kedsean da. 17 Din pangam-amagan das lawa ya kinekedse et kaman makan ya inom para en daida.

18 Din pomatpat-aana sin agsapa et say kaiarigan din danan di nalinteg. Pomat-a ay pomat-a enggana ay komayang din agew. 19 Ngem mabolinget ay kaman labi din danan di managbasol et adi da ammo di kaisokbaan da.

20 Anak ko, estem ay dengngen din kalik ya pamagbagak. 21 Adi kan liwliw-an mo adi et igtom sin nemnem mo. 22 Tan say poon di biyag ya salon-at di olay sino ay mamati isna. 23 Ilaem ta mas es-estem din nemnem mo mo olay sino ay nabanol en sik-a, tan say poon di biyag mo. 24 Adi ka man-et-etek ono manbolboladas. 25 Estem ay ilan din kosto ay sangoanam 26 ta doritso ya mapteng di pandanam. 27 Addawiam din lawa. Adi kan masangsangaw ay mandan sin kannawan ono kannigid mo adi et idoritsom sin kosto ay danan.

<- Proverbio 3Proverbio 5 ->