1 Inbilin Diyos en Moses 2 ay ibaga na sin Israelita ay mo wada di manbasol ay mangamag si iparit di linteg Diyos ngem adi na in-gagara, masapol ay tongpalena da nay ay bilbilin.

3 Mo manbasol di kangatoan ay padi et maibilang ay nanbasol abe din kaipoipogaw, masapol ay man-a din padi ay sana si bomaro ay baka ay magay kolang na ta ena idaton en Diyos ta say malinisan din doy ay basol na. 4 Iey na din baka sin pantew di Tolda ay Panpappailaan Diyos et asi na ikapay din takkay na sin toktok di baka et paltiena sin sangoanan Diyos. 5 Asi man-a sin dadan di napalti et isgep na sin oneg di Tolda. 6 Mo wadas sisya sin oneg, isiwsiw nan gomot na sin dada et asi na pay iwalsi si mamin pito sin sangoanan Diyos sin sangon di kurtina ay nanasalin sin Kasasantoan ay Kowarto. 7 Pag nan iponas din odom ay dada sin kaman sakngod sin solin di altar ay panpoppooan si insinso ay wada met laeng sin oneg di Tolda. Mo makdeng di, isoyat na din am-in ay nabay-an ay dada sin naisaadan di altar ay panpoppooan si daton ay wada sin pantew di Tolda. 8 Ilasina abe din am-in ay taban di eg-eges di baka ay napalti, 9 din dowa ay batin ya din taba da pati din kamayatan ay partin di atey na 10 ay kaman met laeng di iyat da ay mangaan sin taban di baka ay idaton da ay pan-ookoban ya makikadkadwaan da en Diyos, asi na pooan sin altar ay doy. 11 Ngem alaena din kopkop, am-in ay lames, din toktok, din eg-eges ay adi nasosotan ya din sikin di animal, 12 et iey na ay pooan si kaiw sin lasin di pankamkampoan da ay maiwaswasitan di dap-o, tan say ibilang da ay nalinis ay lugar maibasar sin linteg da.