15
Din Kantan Da Moses En Miriam
(15:1-11,20-21)
1 Pag kantaen da Moses ya din Israelita din kanta ay nay ay pangidayaw da en Diyos.
“Sik-a ay Diyos di idayaw ko isnan kansiyon ko,
tan nakaskasdaaw din inyat mo ay nangabak sin kalaban mo,
tan inilned mo sin baybay din sosoldado ya kabayo.
2 Sik-a ay Diyos di pankamangak,
tan begew sin inyat mo et naisalakanak.
Sik-a ay Diyos di idayaw ko,
Diyos ay dinaydayaw di ap-apo,
din kinangatom et say ikankansiyon ko.
3 Si Yahweh di ngadan mo ay en ka inpaammo,
mo maipanggep si gobat, palaloy laing mo.
4 En ka et intep-a sin baybay ay annawa
din sosoldadon di Egipto pati din loglogan da.
Nalned din kalaingan ay ap-apon di soldado da
ed baybay ay Mandalangdang ay kanan da.
5 Sin malosong ay baybay et nalim-otan da,
kaman dan bato ay nalned sin lanad na.
6 Kaeegyat san bikas di takkay mo, Apo,
tan mekmekena tet-ewa amin ay kalaban mo.
7 Madaydayaw ka sin panakabalin mo
ay nangabak sin kalaban mo.
Kaman apoy din bonget mo,
et kaman dan garami ay domapo.
8 Sinib-okam din baybay et nansian din danom,
danom ay man-oy-oyas et natood ay kaman bonton,
kaman dan kinmenteg ay ginminek din dalloyon.
9 Din kalaban mi yan kanan da,
‘Apayawen tako ta depapen takos daida,
asoten tako din kampilan tako et maabak da.
Alaen tako amin ay sanikwa da,
panbibingayan tako din gamgameng da.’
10 Ngem esay sib-ok mo
yan nalned dan taga-Egipto,
nalned da ay kaman ismay
sin kaeegyat ay baybay.
11 Magay didiyosen si makaiso en sik-a ay Apo,
tan magay makaiso sin kinasantom ya kinasiged mo,
maga abe di makaamag sin nakaskasdaaw ay inyat mo.” 12 13 14 15 16 17 18 19
20 Makdeng pay di, si Miriam ay esay mamadto ay manang da Aaron et nan-as tambol. In-onod din amin ay babbabai et nanambol da dowan dan mansala.
21 Inkantaan Miriam daida yan kanana,
“Idayaw takos Diyos isnan kansiyon tako.
Nakaskasdaaw din inyat na ay nangabak sin kalaban tako,
tan inilned na sin baybay din sosoldado ya kabayo.”
Din Manpait Ay Danom Ed Mara
22 Makdeng pay di inpangon Moses din Israelita et tinaynan da din baybay ay Mandalangdang. Nanturong da sin lugar ay magay omili ay manngadan si Shur. Nandad-an das di si tolo ay agew, ngem magay danom si dinteng da. 23 Pag dan domateng ed Mara, ngem adi kainom di danom isdi tan palalo ay manpait. Siya nay gapo na ay nangadanan din lugar ay nay si Mara.*Din olog di Mara et “manpait.” 24 Kanan din ipogaw ay nanriri en Moses, “Into ngin di inomen tako?” 25 Siya di nankararag si Moses ay manpabadang en Diyos, et pag ipailan Diyos di esay kaiw ay say intep-an Moses sin danom et pag somiged et mabalin ay mainom.
Isdi ay pinadas Diyos daida ya inbilina di kosto ay amagen da. 26 Kanana en daida, “Mo patien yos sak-en et amagen yo din kosto sin pangilak ya tongpalen yo din am-in ay bilbilin ko, adiak ipalak-am en dakayo din saksakit ay inpalak-am ko si taga-Egipto. Tan sak-en si Diyos ay mangagas en dakayo.”
27 Intoloy da ay nandan enggana ay sinmawang da ed Elim ay kad-an di sinpo ya dowa ay obbog ya pitopolo ay kaiw ay palma. Isdi ay nankampo da sin asag-en di danom.
<- Exodo 14Exodo 16 ->- a Din olog di Mara et “manpait.”