4 Din napipigsa ay soldado et magotlo din pana da,
ngem din nakapsot et pomigsa da.
5 Din mansobsobra ed idi si kanen da,
makilagbo dad wani ta mangan da.
Ngem din madagdagaangan ed idi
et laton da ed wani.
Din basig et nakaanak si pito da,
ngem din ina ay ad-adoy anak na
et nataynan ay magay olay esa.
6 Si Diyos et ena peslen ya biyagen,
ipababa nay ipogaw sin kad-an di natey ya kasinan tagoen.
7 Waday pabitegena, waday pabaknangena,
waday ipababa na, wada abey ipangato na.
8 Din nababa ya kaseseg-ang di kasasaad da,
et ipangato na ya kaanenan kaibabainan da.
Pakitokdoenas daida sin ipogaw ay way banol na,
et nangato ay turay di pangisaadana en daida.
Din naisaadan di lobong, si Diyos di akin oka,
sisya di nangisaad isnan daga.
9 Ay-ayowanana din biyag di ipogaw na,
ngem din managbasol et sin mabolinget ay kad-an di natey di panturongan da,
tan adi mabalin ay matago di ipogaw
si bokbokod na ay pigsa.
10 Dadlon abaken Diyos din kalabana,
tan kaman kido ay mapod daya ay bomaba sin kad-an da.
Kadi et okomena am-in ay ipogaw isnan daga.
Idawtanas panakabalin din ari ay pinili na
ta say sisya di pangabakena.”
11 Idi makdeng di, sinmaas da Elkana ed Rama, ngem nataynan si Samuel ay anak da ed Shilo ta mansilbi en Diyos sin babaen Eli ay padi. 1213141516171819 Tinawtawen ay man-amag si Hanna si nagayad ay bado ay idawat nan Samuel mo maikoyog en asawa na ay man-idaton sin idatdatonas tinawtawen. 20 Pag bindisyonan Eli da Elkana ay sin-asawa yan kanana, “Sapay koma ta idawtan Diyos dakayo sin asawam ay nay si odom ay anak ay kasokat din indaton yo ay nay ay mansilbi en sisya.” Makdeng pay di yan sinmaa da.
21 Pag bindisyonan tet-ewan Diyos si Hanna et indawtanas tolo ay anak ay lalaki ya dowa ay babai. Mo si Samuel pay et nadakdakdake ay mansilsilbi en Diyos. 2223242526 Nasepsep abe ay laylayden Diyos ya din kaipoipogaw sisya.
Din Naipadto Maipanggep Sin An-ak Eli
Ngem lawlawa pay din ogalin da Hofni en Finehas ay an-ak Eli, isonga inbaan Diyos di mamadto ay mamagbaga en sisya. Kanana ay nangipadto en gapo ta inpalobos Eli ay nan-am-amag din an-ak na si lawa, mandesan da ay matey. Maga abe di polin Eli ay makay, mo adi et masapa da am-in ay matey. Kedngan Diyos din kinapadin da Eli ya din poli na ta natken di isaad na ay padi. Et pag mankedaw din polin Eli si obla sin naiskat ay padi ta say waday katagoan da. (2:27-36)
