1 Anile ani ensole kanomoꞋa nagola ala tikefa, hamaimu neꞋamamia tina naveli-maine. Ani limona telelalayamaꞋa omalegeno galasifima age-hagalo nehia kava nehigeno ani limoꞋa Anumaya KotiꞋene Sipi sipi nafaꞋnemogani mainaꞋa sialeti ani limoꞋa elavi-maine. 2 Elavia timoꞋa aiyayeno ala kumaꞋmo kamona amuꞋnopi nelavigeno ani timona aluga aluga agegayale hamaimu neꞋamamia yosayaga hane. Ani yosayagamoꞋa nago kafumo aguꞋafina tuelufuꞋa (12) kanale ikamaꞋahe ikamaꞋahe ani alagamoꞋa afula neleane. Ani yosamo haisamoꞋa mukiꞋa kotega veaꞋma kali alisagenofena alino falu hu-matesia yosa haisa hane.

3 NagoꞋa Anumaya KotiꞋa hinageno ali haviya humatesia yana omalegahigi Anumaya KotiꞋene Sipi sipi nafaꞋnene nemaiꞋa sialatana ani kumatela hanesigeꞋya Anumaya Koti aliꞋya veaꞋmoꞋya agia alisaga nehuꞋya maigahae. 4 MaineꞋya Anumaya Koti aufina neꞋagesageno agaiꞋa agia hamanilela kaemategahie. 5 Ani kumatela nagoꞋene hanina okigahie. Anumaya Koti hale yamoꞋa aivasa humategahianagiꞋya nagoꞋene kaꞋnila hanagalisaya yaꞋene yagemoꞋenena aivasa ohugahie. Amaku amamema agigati-mainea veaꞋmoꞋya agola kava yagaiꞋya maigahae.

6 Ani ensole kanomoꞋa mage huno hie “Manima nehavina kea kelamage kea hanegeka kagupi malesana ke hane. Anumaya KotiꞋa amaune veaꞋneꞋahena ‘NaꞋa hutama hamapaiho.’ huno amaku amakesa neꞋamamia kanomoꞋa ensole kanoꞋamona agai aliꞋya veaꞋnele hutegeno eaꞋamo mukiꞋa yamoꞋa aupaꞋama falote hisia yana amave-lisiafene huno hutegeno umaine.” 7 Haviho. YisasiꞋa mage huno humaine “Nagaya aupa kanafi egahue.” huno higeꞋna nagaya mage hue “NagoꞋa veaꞋmoꞋya Anumaya KotiꞋa haenaga falote hisia yafe mani avopima hu-mainea kemo akave nemalesaya veaꞋmoꞋya tusiꞋa muse hugahae.”

8 Nagaya YoniꞋna ani yaꞋyaga ageteꞋna mani kea ago havimainoe. MukiꞋa ani yana nave-ligeꞋna ageteꞋna havimaineꞋna ensole kanomo agia alisaga hugahe aiyaꞋafi ape humainoe. 9 Huanagi ani ensole kanomoꞋa mage huno hie “Kagaya naꞋa ohuo. Nagaya kagaiꞋene amaune kafu-kaganaꞋyaene mukiꞋa mafima Anumaya Koti avopima hanea kemo akave nemalaya veaꞋnene aliꞋya amafaluꞋna mainoanagika nagai nagia alisaga ohuganagi nagoke Anumaya Kotina agaiꞋage agigeꞋya alisaga huo huno hie.” 10 Huteno mage huno hie “Manima Anumaya Koti avopima hanea kemoꞋa aupaꞋa falote hisia yafe kagaya ani kea fala okio. 11 Ani kanamoꞋa aupaꞋa falote hugahe nehiafe kefo yama nehisaya veala nagoꞋene ani kefo yana maiꞋya hisae. Kumai yama nehisaya veala ani kava maiꞋya hisae. Fatago kavakeꞋyama nehisaya veala ani kavakeꞋya maiꞋya hisae. Alu aotage auꞋava yapima nemaisaya veaꞋmoꞋya nagoꞋene ani kava nehuꞋya maisae.” huno humaine. 12 Nehigeno YisasiꞋa mage huno hie “Haviho nagaya aupaꞋa esuana mukiꞋa veaꞋmoya hu-mainesaya avamete amamisua anonaꞋamia aliꞋna egahue. 13 Nagaya mukiꞋa yamona aepaꞋa maiteꞋna kava yagai-mainoanagiꞋna mukiꞋa aliꞋyana aliꞋna avaya-yesua kano mainoe. UhagoteꞋna maitena haenaga-lafana mainoe. 14 KasagoꞋya veaꞋmoꞋya kefo yaꞋamihema haviꞋya amakuꞋama seseꞋma humalenesaya veaꞋmoꞋya musena hugahae. AmakuꞋa agoꞋma sese hu-malenayafe hamaimu amamisia yosamo alaga aliꞋya neneꞋya ala kumaꞋmo fiatela afaꞋa hai falegahae. 15 Hai falegahayanagi kefo yamaꞋage veaꞋnene, hanageke kava nehaya veaꞋnene, kumai heꞋya vaineꞋayaya veaꞋnene, vea hamaeꞋya falineꞋamataya veaꞋnene, ago fali-mainaya veafe ‘Anumayati maine.’ huꞋya amakisana neꞋvaiya veaꞋnene havigehe muse huꞋya akave nemalaya veaꞋnene ani kumaꞋmona malaga maigahayanagiꞋya Anumayamo ala kumatela haiꞋya omaigahae. 16 Nagaya YisasiꞋna ensole kanoꞋnimona hutogeno tamakaitega eaꞋamo nagaifema havitama tamakupi malenaya veaꞋmo-gatamina mani kea hufalote huno tamahapaisie huꞋna hutenoe. NagaiꞋnige Teviti nofipiti aginagomoꞋna maineꞋna Teviti nafaꞋneꞋa mainoe. Nagaya hale yamaꞋaene kaꞋnefila, natema hagoteno vaꞋyi nehia kaꞋnefi mainoe.” huno humaine. 17 Higeno Alu Aotage AvamuꞋamoꞋene Yisasina amakuꞋa amitafa humainaya veaꞋnene Yisasife mage hae “Kagaya eno.” huꞋya hageꞋya mani kema havisaya veala Yisasife mage huꞋya hisae “Kagaya eno.” huꞋya hisae. HisageꞋya tifema amakesia veaꞋmoꞋya etama Anumaya KotiꞋma afaꞋa tamamisia timoꞋa maige maige hisaya tamahaimu tamamisia tinagi tamahaisigetama me neho.

18 Nagaya manima Anumaya Koti kefima aune laga humale kema mani avopima hanea kema havisaya veaꞋmogatama mani kene alu kene moli lokaetama ayaꞋaya kea ohiho. TokiyaꞋage ke tamahanepaugi naꞋama hisayana Anumaya KotiꞋa mani avopima tamahanepaiya havi yama falote hulamatesia yamoꞋa tamakata aisia yanagino tamakaila tamamigahie. 19 Tamamigahigi nagoꞋa veaꞋmoꞋya manima Anumaya Koti avopima hanea aune kema ali talesayana Anumaya KotiꞋa mani avomoꞋma tamahapaiya kanale yana otamamigahianagitama ani veaꞋmogatama maige maige hisaya tamahaimu tamamisia yosamo alaga nesaya yana tamaha-falesigetama Anumaya Koti alu aotage kumatela oꞋugahae.

20 YisasiꞋa mani kema tahapaiya kanomoꞋa mage hie “Tamage nagaya aupaꞋa egahue.” huno humaine. HigeꞋna nagaya YoniꞋna mage huꞋna nehue “E, tamage Anumayati Yisasiga eno.” huꞋna nehue.

21 AnumayatimoꞋa YisasiꞋa kayonema nehia yamaꞋamoꞋa mukiꞋa amakuꞋama amitafa nehaya veaꞋmo-gatamina tamamisie. Mani kea tamage.