Leveleseni 11

Tole kanolatamo-gania Anumayamo kea huhaleꞋana hu-mainaꞋe.

1 Nago kanomoꞋa maleꞋna agege gege hisua ayopa kana kaꞋyona namiteno mage hie “Kagaya hetika Anumaya Koti mono noꞋene* kae salamana nehaya folamoleꞋene mo maleka agege gege huka hapalika ago. Ani nopina Anumaya Koti agima alisaga nehaya veala hapalika ago. 2 Hapaligananagi malagama hanea mopa* maleka agege gege huka ohapalio. Ani kaiyaga Anumaya Koti kema nohavisaya veaꞋmogami amamineanagiꞋya tagufa (3) kafuene sikisiꞋa (6) ikaꞋene ani veaꞋmoꞋya Anumaya Koti kumala alu aotage kuma meli haviya hugahae. 3 NehisageꞋna nagaya tolea nagai kema huhaleꞋana hisaꞋa kanolatana tokiyaꞋnia anamisugeꞋana kayavo kena fai-lineꞋana tagufa (3) kafuene sikisiꞋa (6) ikaꞋene nagai kea huhaleꞋana hugaꞋe.” huno hie.

4 Ani lole kanolatana ma mopafi kava humainea Anumayamo aule heti-mainaꞋana tole olivi yosa kana huteꞋana tole kaꞋni kana humainaꞋe. 5 NagoꞋa veaꞋmoꞋya ani kanolatana ali haviya hugahema hisagenoꞋa ani kanolatamogani anavayafitila atamo aikalu huno kame veaꞋania temasagalisigeꞋya faligahae. E, anakaiꞋma ali haviya hunatesaya veaꞋmoꞋya faligahae. 6 Ani lole kanolatamo-gania tokiyaꞋanileti “Kola oꞋaiyo.” huꞋana hisaꞋageno kema huhaleꞋana hisaꞋa kanafina kola oꞋaigahie. Tifema “KolamaꞋage huo.” huꞋana hisaꞋagenoꞋa aniꞋa hugahie. Anakesama havisaꞋa kanafina “TusiꞋa kana yaꞋene kaliene falote huo.” huꞋana hisaꞋagenoꞋa ma mopafi veala nagoꞋene nagoꞋene huꞋana hamaegaꞋe.

7 HamaegaꞋanagi Anumaya KotiꞋma anaminea kea hu haꞋno hutesaꞋageno kefo afai afumoꞋa ayola omaleno afepinaga tavi-mainea komufinagati ehaino me hanaesigeꞋana faligaꞋe. 8 FalisaꞋageno anaugafamoꞋa ala kumaꞋmo kateꞋma, AnumayaꞋanimona Yisasina yafaga yosaleꞋma haeꞋya asai-malenaya kumaꞋmo, yegegate malegahae. Avame kefima hu-maleꞋya nehaya ala kumaꞋmo agia Sotomuene Isipienene huꞋya nehae. 9 FalisaꞋa anaugafa yegegate tagufa (3) kanaene ani kanamo yagemoꞋa amuꞋnote eneꞋvigeꞋya nagoꞋa veaꞋnea alu kote kote veaꞋnene, alu make lu make neꞋaiya veaꞋnene, alu maugafa lu maugafa kalimai veaꞋneyagaene, ani kanolatamo-gani anaugafa ageme-geme vayanagi nagoꞋa veaꞋmoꞋya aliꞋya hevainategahe hayanagi ani veaꞋmoꞋya “AꞋao.” huꞋya hageꞋya aliꞋya hevai oꞋanatenae. 10 Hevai oꞋanatenagi ani kanolatamogania mukiꞋa kotega veaꞋma tusiya huꞋana ali haviyama hu neꞋamataꞋa kanolatama faliꞋa yafenagiꞋya tusiya huꞋya musena nehuꞋya muse yana amafaluꞋamimo-gamina momami memami hugahae. 11 Hugahagi tagufa (3) kanaene ani kanamo yagemoꞋa amuꞋnote evia kanamoꞋa haꞋno hutegeno Anumaya KotiꞋa ani kanolatamo-gani anaugafafi hanaimula huvainategeꞋana ani kanolatana eteꞋana hetiꞋageꞋya mukiꞋa veaꞋmoꞋya ani yana agageno amamaꞋyoa aigeꞋya kolia humainae. 12 Koli nehuꞋya haviyana ikapinagati ala kegefafiti ani kanolatafena mage huno hie “Tanakaya ehaitana eꞋo.” huno higeꞋya kame veaꞋanimoꞋya age-mainageꞋana siapi hai-faleꞋana ikapinaga hai-mainaꞋe. 13 Hai-mainaꞋa anayufina tusiꞋa imila aliteno ani ala kumakefa teniꞋafi (10) ali fako hu-malageno anifiti ani imiꞋmoꞋa nago kaiyaga ali haviya higeno seveni tauseniꞋa veaꞋne (7,000) hamaegeꞋya fali haꞋno humaine. NaꞋa hu-mainayafe ofaliꞋyama afaꞋa mainaya veaꞋmoꞋya tusiꞋa koli huteꞋya ikapinagama mainea Anumaya Koti agia alisaga humainae.

14 Tole kana yana ago haꞋno hianagi avoꞋnio nagoꞋke kana yana aupa kanafi falote hugahe higeꞋna nahau hu nelamatoe.

Seveni (7) molia ensole kanomoꞋa ufena humaine.

15 Anile seveni (7) molia ensole kanomoꞋa agaiꞋa ufena higeꞋna havugeno ikapinagati nagoꞋa veaꞋmoꞋya ala kegefafiti mage huꞋya humainae “Anumaya KotiꞋene taugafama aligatisiafene huno hutenea kanoene ma mopafi kava veaꞋmogamina ago amakasaꞋageꞋya anaiyafinaga mainayanagino Anumaya KotiꞋa agola maige maige huno kava yagaigahie.” huꞋya humainae. 16 Anile Anumaya Koti aule hanea sialeꞋma mainaya vayala tueti foꞋa (24) kava vayaꞋmoꞋya mopafi asaga hu-laviꞋya amakoꞋya ye-maineꞋya Anumaya Koti agia alisaga huꞋya mage hae

17 “Vae Anumaya Kotigae tusiꞋa tokiyakaꞋa haneanagika nayona mainananagika menia mainananagika tusiꞋa tokiyakaleti aepa heka mukiꞋa yatela kava neꞋyagaina yafe tagaya kagaifena tusiꞋa musekaꞋa nehune. 18 Kagai kema nohavia veaꞋmoꞋya kagaifena amaipa kafa henegatayafe kagaya kaipa kafa hemateka mukiꞋa fali-mainaya veaꞋnema kaiyeke humateka kefo yaꞋamimo anonaꞋamia amamisana kanamoꞋa ago falote humaine. Ani kanafina kagai kema haviꞋya amakupi malenaya veaꞋnene kagai amaune veaꞋnene mukiꞋa kagai kagima alisaga huꞋya kaiyafinagama nemaiya veaꞋnene ala amakima hanea veaꞋnene osi amakima hanea veaꞋnene kanale anona yaꞋamia amamigane. Amamiteka nagoꞋa veaꞋmoꞋya ma mopafi veaꞋmogamima ali haviya huneꞋamataya veaꞋmogamina kefo yaꞋamimo anonaꞋamia kagaya ali haviya humategane.” huꞋya humainae.

19 Hageno Anumaya Koti nona ikapinaga hanea mono nona yaki-talageno Anumaya KotiꞋma alino hagelafimatenea kema hanea pokisia ani mono nopina fufu yate hanegeꞋya neꞋagageno anile ala agegefa neꞋaigeno monagemoꞋa tusiya nehigeno imila neꞋaligeno koꞋmopamoꞋa talagufe-lavino aimaine.

<- Leveleseni 10 Leveleseni 12 ->