1 Anile nagaya YoniꞋna agoana nagola tokiyaꞋage ensole kanoa ikapinagati elavino egeꞋna age-mainoe. Ani ensole kanomo augafamona siaꞋmoꞋa alino anoꞋvai-tegeno anutela fulagenaꞋmoꞋa maleno kagi-mainegeno augosamoꞋa yagemoꞋma hia kava huno aivasa nehigeno tole aiyamoꞋa ata anefeꞋmo nehia tunage yosa kana nehigeno emaine. 2 EgeꞋna agogeno nagola osi avona ayapi hanegeno tamaga aiyamoꞋa hagelimo agupile ayegeno haoga aiyamoꞋa mopafi ayegeno huteno aye hala hale humaine. 3 Humaineno agema aiyana laiyoni afumoꞋma vale vale nehia avamete huno keha keha nehigeno seveniꞋa (7) akali kalu ko nelino tusiya huno monagemoꞋa humaine. 4 SeveniꞋa (7) akali kaluma hia kea haviteꞋna avopi ago kaegahe huanagi ikapinagati nago kea falote huno mage huno higeꞋna havue “SeveniꞋa (7) akali kaluma hia kea avopina okaeka fala-kilio.” huno higeꞋna havue.

5 Havugeno timo agupileꞋene mopafiꞋenema aiya aye hala halema hu-mainegeꞋna agoa ensole kanomoꞋa tamaga ayana ikate alisaga hie. 6-7 Huteno mage hie “HaimuꞋene kanogino Anumaya KotiꞋa mukiꞋa kanafina maige maige huno ikaꞋene ikapinaga hanea yaꞋene mopaene mopafima hanea yaꞋene hageliꞋene hagelipima hanea yaꞋyagaene talo hu-malenea kanomo agile tamage nehue. Anumaya KotiꞋa nagoꞋene agava omaigahigi seveni (7) molia ensole kanomoꞋa agaiꞋa ufena hugahe nehinageno Anumaya KotiꞋa nayoma falakino hanea kea, agaiꞋa aliꞋyama ali-mainaya amaune vayaꞋma hamapai-mainea kemoꞋa falote huno tamage hugahie.” huno hie.

8 HigeꞋna hagoteno ikapinagatiꞋma higeꞋna havua kemoꞋa eteno nagoꞋene mage huno hie “Hagelimo agupileꞋene mopafiꞋene aiyama aye hala hale huno heti-maiya ensole kanomo ayapima hanea ali vakaye-linea avona kagaya molio.” huno hie. 9 HigeꞋna ani ensole kanomote vuaꞋamoꞋna mage huꞋna hue “Kagaya ani osi avo omana namio.” huꞋna hugeno mage huno nahapaiye “Kagaya alika no. Nesanana kavayafina tumemo timoꞋma hia kava huno hagaꞋage hugahianagi nakaisanana kaipafinaga atuꞋage hugahie.” huno hie. 10 HigeꞋna ani osi avona ensole kanomo ayapiti aliꞋna nogeno navayafinaga tumemo timoꞋma hia avamete huno hagaꞋage hianagi neꞋnama nakauvana naipafinaga atuꞋage humaine.

11 HigeꞋya Yoninia mage huꞋya nahapaiye “Kagaya nagoꞋene alu amaugafa kalimai veaꞋnene, alu kote kote mainaya veaꞋnene, alu make lu make neꞋaiya veaꞋnene ala sauve veaꞋnenefena kaune kea laga huka hamapaigane.” huno nahapaiye.

<- Leveleseni 9Leveleseni 11 ->