1 Anumaya KotiꞋma kava yagai-mainea yamo aepa hesia kanamoꞋa maꞋa hugahie YisasiꞋa avame kea mage huno hie nago kanomoꞋa aꞋnea meni kanoꞋa ali-mainea kanoa egahe higeꞋya teniꞋa (10) vele omainaya munaꞋnemoꞋya lamuꞋamia neꞋaliꞋya katega neꞋuꞋya avalegahe umainae. 2 Vayana faefuꞋa (5) munaꞋnemoꞋya aifoꞋnafo hageꞋya faefuꞋa (5) munaꞋnemoꞋya kanale havi haviꞋyamia hane. 3 Ani aifoꞋnafo munaꞋnemoꞋya kanaleꞋya huꞋya lamua aliꞋya vayanagi ata kaesaya tina oꞋaliꞋya umainae. 4 VageꞋya kanale havi haviꞋyaꞋamima hanea munaꞋnemoꞋya kanaleꞋya huꞋya lamuma hanagalisaya tina keꞋayopi taki-liꞋya lamuꞋamiene aliꞋya umainae. 5 Umainageno ani aꞋma alisia kanoa aupaꞋa omegeꞋya ani munaꞋnemoꞋya agava-mainageno amau lokotoko higeꞋya faeꞋya mainae.

6 FaeꞋya mainageno kege amuꞋnona nagola ala kemoꞋa mage huno hie “AꞋma alisia kanoa ago neꞋegi tamakaya kategati movaletama eho.” huno hie. 7 HigeꞋya mani teniꞋa (10) veleꞋma omainaya munaꞋnemoꞋya hetiꞋya lamuꞋamia hanagaliꞋya talo tala hae. 8 HageꞋya aifoꞋnafo munaꞋnemoꞋya kanale havi haviꞋyamima hanea munaꞋnehena mage huꞋya hae “Tagai lamumoꞋa ago asu hisia kava nehigi atama nelea tina keꞋayopitamifiti takitama tamiho.” huꞋya hae. 9 HageꞋya kanale havi haviꞋyamima hanea munaꞋnemoꞋya kenonaꞋamia mage huꞋya hae “TagaiꞋene tamakaiꞋenema aye halesuna timoꞋa kosa ohenegi tamakaya afeno nopiti mo miya hiho.” huꞋya hama-paiye. 10 HageꞋya ani timaꞋa miya hugahe vageno aꞋma alisia kanoa anile egeꞋya talo talaꞋma hu-malaya munaꞋnemoꞋya agaiꞋene ala kave negahe nopinaga hai-falageno fita agola ki-malene.

11 Ki-malenegeꞋya haenaga aifonafo munaꞋnemoꞋya mage huꞋya me hae “Ala kanomogae ala kanomogae fita yaki-la-to.” huꞋya me hae. 12 Me hageno aꞋma alisia kanomoꞋa mage huno kenonaꞋamia hie “AꞋao tamage huꞋna tamaha-nepauve no-tama-koa anaga emainae.” huno hie. 13 YisasiꞋa mage huno hie “Nagayama esua yupamona kanaꞋaenena ohavinaya yafe menia kava yagaiho.” huno hie.

14 YisasiꞋa Anumaya KotiꞋa kava yagai-mainea yamoꞋa maꞋa hu-maine “Nago kava kanomoꞋa ayaꞋaya kotega ugahe nehuno aliꞋya vayaꞋamofena ke higeꞋya ageno monea ali fako huno amamite amamite hie. 15 AliꞋya aepaꞋamia ageteno nago kanomona faefu tauseni kina (K5,000) amino nago kanomona tole tauseni kina (K2,000) amino nago kanomona vani tauseni kina (K1,000) amino huno amamite amamite huteno alu kotega umaine. 16 Umainegeno faefu tauseni kinama (K5,000) amigeno ali-mainea kanomoꞋa ani moneleti aliꞋya aligeno aꞋva monea nago faefu tauseni kina (K5,000) aliteno teni tauseni kina (K10,000) higeno ali-maine. 17 Ali-geno tole tauseni kinama (K2,000) ali-mainea kanomoꞋa ani moneleti aliꞋya aligeno aꞋva monea nago tole tauseni kina (K2,000) aliteno foꞋa tauseni kina (K4,000) higeno ali-maine. 18 Ali-geno vani tauseni kinama (K1,000) ali-mainea kanomoꞋa ani monea alino mopafi kafino kava kanomo monea he-vai-malene.

19 Ani aliꞋya vayaꞋmogami kava kanomoꞋa ayaꞋaya kanagefa umaiteno eteno eno mage hie ‘Monema fako huꞋna tamaminoa monea naꞋmagi mone malenae?’ huno hama-vige. 20 Hama-vigegeno faefu tauseni kinama (K5,000) aminea kanomoꞋa teni tauseni kina (K10,000) alino neꞋeno mage huno hie ‘Kava kanomogae musekaꞋa nehugi faefu tauseni kinama (K5,000) naminapitila eteꞋna aꞋva monene alugeno teni tauseni kina (K10,000) hane.’ huno hie. 21 Higeno kava kanomoꞋa mage huno hie ‘Kagaya kanale kano maineka kanaleꞋya huka osi mone kanoꞋa kaminofitila efi efi huka aliꞋyana alinageno ala hu-maineafe ala yakefa kagaila kava yagaisanafe kamigahue. Nopinaga ehaigetaꞋa tokaetaꞋa muse hutaꞋa maiꞋano.’ huno hie 22 Higeno tole tauseni kinama (K2,000) aminea kanomoꞋa mage huno me hie ‘Kava kanomogae musekaꞋa nehugi kagaya tole tauseni kina (K2,000) naminapitila aꞋva monene tole tauseni kina (K2,000) higeꞋna aliꞋna neꞋoe.’ huno hie. 23 Higeno kava kanomoꞋa ani kanomofena mage huno hie ‘Kagaya kanale kano maineka kanaleꞋya huka osi mone kanoꞋa kaminofitila efi efi huka aliꞋyana alinageno ala hu-maineafe ala yakefa kagaila kava yagaisana yafe kamigahue. Nopinaga ehaigetaꞋa tokaetaꞋa muse hutaꞋa maiꞋano.’ huno hie. 24 Higeno vani tauseni kinama (K1,000) aminea kanomoꞋa eno mage hie ‘Kava kanomogae musekaꞋa nehugi kagaya keꞋage kanoa alu kanomo yana alika kaugafa hegeka omai kano mainane. Nago kanomoꞋa hoyaꞋafima kali-malenea yaꞋene alika negeka omai kano mainane. 25 Mainanafe kolikaꞋa huꞋna vani tauseni kinama (K1,000) naminanaꞋmaga mopafi kafiꞋna he-vaiꞋna ka-tenoanagiꞋna menia kagaikaꞋa yanagiꞋna negamue.’ huno hie. 26 Higeno kava kanomoꞋa ani aliꞋya kanohena mage hie ‘Kagaya havi kanoe. FeluꞋage aliꞋya kano mainane. Kagaya ago nehavine nago kanomoꞋma hoyaꞋafima kali-malenea yaꞋene aliꞋna negeꞋna omai kano mainoa yafena kagaya ago havimainano? 27 NaꞋa higeka monema nemalaya nopina moneꞋnima malenateꞋasina menia nagaya nagoꞋa aꞋva monene aluleꞋasine. 28 Vani tauseni (K1,000) kinaꞋnia hafaletama teni tauseni kinama (K10,000) malenea kanomona amiho. 29 Nagaya tamaha-nepauve nagoꞋa yaꞋamima hanesia veaꞋmogamina nagoꞋene amamisigeno kasago hu-ma-tegahianagi nagoꞋa yaꞋamima omalenesia veaꞋmogamina ali-linesaya yamaꞋa hamana-falegahie. 30 Ani havi kavaꞋma nehisia aliꞋya kanomona hani yapinaga avaletama hagaꞋyu hu-talesageno tusiya huno avia neꞋateteno avekemoꞋa hugahie.’ huno hie.”

31 YisasiꞋa nagoꞋene mage huno hie Ikapinagati emainoa kanoa vayaꞋmo natenea nafaꞋnemoꞋna kava yagaigahema esuana tokiyaꞋage hale yaniꞋaene ensole vayaꞋene tokiyaꞋage hale yaniꞋaleti kava yagaisua siale maigahue. 32 MainesugeꞋya mukiꞋa kotega veaꞋmoꞋya nagaite melitalu hisageꞋna sipi sipile neꞋyagaiya kanomoꞋma memene sipi sipiene ali fakoma nehia avamete huꞋna mukiꞋa veala ali fako hugahue. 33 Ali fako huteꞋna sipi sipiyaga tamaga nayatega neꞋamateꞋna memeyaga hauga nayatega amategahue.

34 AmateteꞋna ala sauve kanomoꞋna tamaga nayategama amatesua veafena mage huꞋna hugahue “NenafaꞋa kanale manua tamaminea vealagi eho. Ma mopama taloma hu-mainea kanaleti aepa heno tamakaife huno talo tala hu-maleteno kava yagai-mainea kumatelagi emaiho.” huꞋna hugahue. 35 “Nagaila nagaꞋma tegetama kavela naminae. Tifema nagegetama afaꞋa naminae. Natu kanoma ogetama navaletama falu fala hu-natetama notamifina na-tenae. 36 KenaꞋnima omalegetama kena fai-natenae. Kalima alugetama navaletama yagai-natenae. Kinafima mainogetama nagegahena emainayane. NaꞋa kavaꞋma hu-mainayafe talo hu-lama-tenea kumatela emaiho.” huꞋna hugahue.

37 HugeꞋya tamaga nayategama fatago kavaꞋma nehaya veaꞋmoꞋya mage huꞋya hugahae “Anumayamogae na yu kagala tegeta kageteta kavela kaminone? Na yu tifena kagegeta tina kaminone? 38 Na yu natu kanoa evaꞋyi hanageta alita kanale huta ka-tenone? Na yu kenakaꞋa omalegeta kena kaminone? 39 Na yu kalia alinageta kage-mainone? Na yu kinafina mainanageta mo kage-mainone?” huꞋya hugahae. 40 HuꞋya hisageꞋna ala kava kanomoꞋna kenonaꞋamia mage hugahue “Tamagelafa huꞋna tamaha-nepauve tamakaya amakima omale naganaꞋnimogamima ani kavaꞋma hu-ma-tayana nagai ani kavala hu-natenae.” huꞋna hugahue.

41 Hugahuanagi haoga nayatega veafena mage huꞋna hugahue “Tamakaya hu-haviya hu-matenoa kefo kavakeꞋya nehaya veaꞋmogatama mai-haletama viho. SataniꞋene aliꞋya vayaꞋaenena agola tegelege nehia atafi maisaya kumala ago talo hu-malenogi ani kumate agola umaiho. 42 Nagaila nagaꞋma liana kavela onaminae. Tifema nagegetama tina onaminae. 43 Natu kanoma ogetama navaletama falu fala hu-ona-tenae. KenaꞋnima omalegetama kena fai-ona-tenae. Kalima alugetamao kinafima maugetamao me onagegenayane.” huꞋna hugahue. 44 HisugeꞋya kenonaꞋnia mage huꞋya hugahae “Anumayamogae na yu kagala tegeta kage-mainone? Na yu tifena kagegeta kage-mainone? Na yu natu kanoa anageta kage-mainone? Na yu kenakaꞋa omalegeta kage-mainone? Na yu kalia alinageta kage-mainone? Na yu kinafina mainanageta kage-mainone? Tagayama kage-mainoteꞋasina ago kaya hu-mainoteꞋasine.” huꞋya hugahae. 45 HisageꞋna nagaya eteꞋna amakaifena mage hugahue “Tamagelafa huꞋna tamaha-nepauve tamakaya amakima omalenea naganaꞋnimogamina ani kavaꞋma hu-oꞋama-tayana namona nagaiꞋene hu-ona-tenayane.” huꞋna hugahue. 46 Huteno kefo yama nehaya anonaꞋamia hu-ma-tenageꞋya agola amakata aisia hani yapi maisaya kumate ugahagi fatago kavaꞋma hu-mainesaya veaꞋmoꞋya ofaliꞋya agola maige maige hisaya kumate ugahae huno hie.

<- Matiu 24Matiu 26 ->