1 HaenagaꞋa YisasiꞋa eteno agaiꞋenema tokaeꞋya nemaiya anagaꞋamogami amaule ma kava huno Taipiliasi tikotumo agegayalega evaꞋyi hu-maine. 2 Saimoni PitaꞋene, Tomasina nago agia TitimasiꞋe, tagai kefina kuyave nafaꞋne, NatanioloꞋa, Kalili hanea kumala Kena kumate kanoene, tole Sepeti nafaꞋnelataꞋa YoniꞋene, aganaꞋamoꞋene, tole Yisasina aleveniꞋa (11) anagaꞋaene mainae. 3 Mainageno Saimoni PitaꞋa mage huno hama-pai-maine “Nagaya noyame kuꞋya hugahe neꞋue.” huno higeꞋya mage hae “KagaiꞋene ugahune.” huꞋya hapaiteꞋya tipi kalefi hai-saga humaiꞋya ani kegela vayanagi nagoke noyamea oꞋalinae.

4 OꞋaligeno yagea hai vaꞋyi hugahe nehigeno YisasiꞋa ti agegayalega he-ti-maiyanagi agaiꞋenema tokaeꞋya nemaiya anagaꞋamoꞋya YisasiꞋe huꞋya agelama ohunae. 5 Agelama ohageno YisasiꞋa mage huno hama-vige “Vae nafaꞋneꞋnimogatama nagoꞋa noyamea neꞋalifi noꞋaliye?” huno hamavi-gegeꞋya “AꞋao noꞋalune.” huꞋya hapai-mainae. 6 Hapaigeno YisasiꞋa mage huno hama-paiye “Tamakaya kukonagona tipi kalemona tamaga kaiyagamo haikanagati hagaꞋyu hutama malesayana noyamea aligahae.” huno hama-paigeꞋya kukonagona aniꞋa huꞋya hagaꞋyu hayana tusiꞋa noyame aligeno kanaꞋage higeꞋya alisaga hisaya yafena tusiꞋa ya hu-mainae.

7 YisasiꞋenema tokaeꞋya nemaiya anagapiti nehaiya kanoꞋamoꞋa Pitana mage huno hapaiye “Agaya AlatimoꞋe.” huno hapaiye. Hapaigeno Saimoni PitaꞋa anima hia kea nehavino aupaꞋa augafale anoꞋya asagi-taleno aliꞋyana neꞋalileti eteno aupaꞋa alino vai-lino tipina asaga hu-lavino Yisasitega neꞋvie. 8 VigeꞋya ani tipi kalea aluꞋalelomagi vani hataleti (100) mita aupaꞋale maineꞋya nagoꞋa YisasiꞋenema tokaeꞋya nemaiya anagaꞋamoꞋya kukonagona avayu huꞋya ti agegayalega emainae. 9 Ti agegayalega me maleteꞋya agayana ata nelegeno nago noyamene hame mayaene ani atafina hanegeꞋya age-mainae. 10 NeꞋagageno YisasiꞋa mage huno hama-paiye “Menima aliya noyamefitila nagoꞋa alitama eho.” huno hama-pai-maine. 11 Hama-paigeno Saimoni PitaꞋa tipi kalefi hai-saga hu-maino kukonagona avayu huno ti agegayalegama eana kasagoꞋya noyame, vani hataleti fifiti taliꞋa (153) noyameyaga ani kukonagopina hiya hu-maiyanagi ani kukonagomoꞋa ailagatoa ohune. 12 YisasiꞋa mage huno hama-paiye “Tamakaya etama kavela me neho.” huno hama-paigeꞋya agaiꞋenema tokaeꞋya nemaiya anaga amamaꞋyoma aiya yafe “Kagaya lagae.” huꞋya haviokenagi “Alatimo maine.” huꞋyama amakesafinaga haviya yafe haviokenae. 13 YisasiꞋa atale eaꞋyamo hame mayaene noyamene melino amamine.

14 Yisasina komufima he-vai-tageno etenoꞋma he-ti-maineana tole yupa age-mainaleti eteno mani kavaꞋma hiana napa tali (3) kanale evaꞋyi higeꞋya agaiꞋenema tokaeꞋya nemaiya anagaꞋamogata taulagafiti age-mainone.

15 Kavela netageno YisasiꞋa Saimoni Pitana mage huno havige “Saimonigae Yoni nafaꞋnemoga kagaya ma vayala amakaseka nagoꞋene kaguꞋa nenamino?” huno havige. Havigegeno PitaꞋa mage huno hie “E, AlaniꞋamogae kagaya ago nehavine kagaifena nenahaiye.” huno higeno YisasiꞋa mage huno hapaiye “Kagaya nagai sipi sipi nafaꞋneyaga kavela amamio.” huno hapai-maine.

16 Hanepaino nagoꞋene mage huno hie “Saimonigae Yoni nafaꞋnemoga kaguꞋa havika ago nenamino?” huno havigegeno PitaꞋa mage huno hapaiye “Kagaya ago nehavine nagaya kagaifena nenahaiye.” huno higeno YisasiꞋa mage huno hapaiye “Kagaya sipi sipiyagaꞋnilela kava yagaiyo.” huno hapaiye. 17 Hapaiteno nagoꞋene napa tali (3) kanale mage huno havige “Saimonigae Yoni nafaꞋnemoga nagaifena negahaiyo?” huno higeno napa tali (3) kanaleꞋma “Kagaya nagaifena negahaiyo?” hunoꞋma havigea yafe Pita aipamoꞋa kanaꞋage higeno mage huno hie “AlaniꞋamogae mukiꞋa yana ago havi-mainane. Nagaya kagaifema nenahaiya yafena ago nehavine.” huno hapaigeno YisasiꞋa mage huno hie “Kagaya sipi sipiyagaꞋnia kavela amamio.” huno hapai-maine. 18 Hapaiteno mage hie “Tamage-lafa huꞋna kaha-pauve kagaya neyama maineka kamu nofila ki-takalo hu-maleteka ‘Visue.’ hukama hana kumatela neꞋvananagi haenagaꞋa kosunama lesanana kayana alisaga hu-linesanageꞋya nagoꞋa vayaꞋmoꞋya kenaka fai-ga-teteꞋya ‘OꞋugahuema.’ hukama nehisana kumatela afaꞋa kavaleꞋya ugahae.” huno hie. 19 Anima hia kemona aepaꞋamoꞋa mage huno hu-maine “HaenagaꞋa kefo vayaꞋmoꞋya katafa huꞋya kahaesagekama falisana yateti Anumaya Kotina ala agi amigane.” huno aepaꞋa huteno YisasiꞋa Pitafena “Nakave eno.” huno hu-maine.

20 YisasiꞋene tokaeꞋya nemaiya anagapiti hau ayamopafima hau-mainea kanoa kaveꞋma ne-mainaya yupa Yisasina avaꞋale maineno mage huno havige-maineane “AlaniꞋamogae kagaila kagesiꞋma huno kamema hu-ga-tesia kanoa hana kanomoꞋe?” huno havigea kanomoꞋa YisasiꞋene Pitagani anakave neꞋvigeno PitaꞋa maiyahae huno age-maine. 21 Ageteno PitaꞋa Yisasina mage huno havige “AlaniꞋamogae ani kanoa haenagaꞋa hana augafa kava hugahie?” huno havige. 22 Havigegeno YisasiꞋa mage huno hapaiye “NakaiꞋma nahaisigeꞋnama ma mopafima eteꞋna esua yupa afaꞋa mainesigeꞋnama esuana kagai yano? Kagaya nakave eno.” huno hapaiye. 23 Hapaiya kemoꞋa anagaꞋamogamipina mani kema hia kemoꞋa ute ete higeꞋya mage hae “YoniꞋa ofaligahie.” huꞋya hayanagi YisasiꞋa “Ofaligahie.” huno hu-oꞋa-tenegi “NagaiꞋma nahaisigeꞋna ma mopafima eteꞋna esua yupa afaꞋa mainesigeꞋnama esuana kagai yano?” huno hu-maine. 24 Ani kema hayana Yoninihe hu-maine. Nagaya mukiꞋa YisasiꞋma hu-mainea kavafena tamaha-nepaiꞋna avona kae-malenoe. Nagayama nehua kea tamage-lafa huꞋna havilinoa ke tamaha-nepauve.

25 YisasiꞋa mukiꞋa alu ya alu yana hu-maineanagi nagoꞋa vayaꞋmoꞋya mani kema mukiꞋa nagoke nagoke avopima kayaleꞋasina mani avoꞋyagamoꞋa kasago higeꞋya malesaya kumaꞋmoꞋa mukiꞋa ma kotega nagesa havuana hiya hileꞋasine huꞋna nehue.

<- Yoni 20